လါဖ့ၤဘြူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)တၢ်ပၢဟီၣ်က၀ီၤအပူၤ တၢ်ဖ့ၣ်ဆၢလၢအဟဲကဲထီၣ်၀ဲလၢကီၢ်သူလ့ၤသုးမုၢ်ဒိၣ်(KTLA)ဒီး KNU(သုးက့ ၄)အဘၢၣ်စၢၤတဖၣ်အံၤ ခံခီခံကပၤခိၣ်နၢ်ကထံၣ်လိာ်သးဘှါဆှဲအီၤလၢအဆိအချ့အဂ့ၢ်န့ၣ် တနီသရံၣ်ကီၢ်ဒိၣ် ကညီကမျၢၢ်ဃ့ထီၣ်ကဒီး၀ဲ ဖဲလါဖ့ၤဘြူၤအါရံၤ ၂၀ သီအနံၤန့ၣ်လီၤႉ
လၢတၢ်ဘှါဆှဲတၢ်ဖ့ၣ်ဆၢလၢအဟဲကဲထီၣ်သးလၢကညီဖီၣ်စုက၀ဲၤကရူၢ်ကဒဲကဒဲအဘၢၣ်စၢၤအံၤအပူၤန့ၣ် တဘၣ်ဘှါဆဲအီၤလၢစုက၀ဲၤဘၣ်န့ၣ်တနီသရံၣ်ကီၢ်ဒိၣ်ကမျၢၢ်ထုးထီၣ်ပာ်ဖျါတ့ၢ်၀ဲဖဲအပူၤကွံာ်လါဖ့ၤဘြူၤအါရံၤ ၇ သီအနံၤလံဘၣ်ဆၣ် တကီၢ်ခါခဲအံၤခံခီခံကပၤအဘၢၣ်စၢၤတၢ်ဖ့ၣ်ဆၢဒိၣ်ထီၣ်ကွ့ၢ်ကွ့ၢ်အဃိ ဘၣ်ထုးထီၣ်ဃ့ကညးကဒီး၀ဲဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လံာ်တၢ်ပာ်ဖျါလၢပၣ်ဃုာ်၀ဲတၢ်ဂ့ၢ်(၅)ထံၣ်အံၤန့ၣ်စံး၀ဲလၢ(KTLA)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ခိၣ်နၢ်ဒိၣ်ထီတဖၣ် ကထံၣ်လိာ်တၢၣ်ပီၣ်တဲသကိးတၢ်လၢအဆိအချ့အဂ့ၢ်န့ၣ် ဆီၣ်တခူထီၣ်၀ဲန့ၣ်လီၤႉ
ပနၢ်ဟူလၢ(ခ့ၣ်အဲၣ်ယူၣ်)လီၢ်ခၢၣ်သးပျၢ်လီၤ၀ဲဒၣ် သုးခိၣ်ဒိၣ်စိ စီၤလ့မူဒ်သိးကဟံးထီၣ်ဖိၣ်ထီၣ်(သုးက့ ၄) သုးက့ခိၣ်မူဒါဒီးအဃိပသးအိၣ်ဃ့ထီၣ်သုးခိၣ်ဒိၣ်စိ စီၤလ့မူအံၤ လၢကဃုကျဲမၤဘၣ်လိာ်ဘၣ်စးက့ၤတၢ်အိၣ်သး အံၤဒီးကညီဖိဖီၣ်စုက၀ဲၤကဒဲကဒဲဒ်သိးအသုတခးလိာ်သးတဂ့ၤအဂီၢ်ကဟံးမူဟံးဒါကမၤဆိတၢ်အဂ့ၢ်န့ၣ် ဆဲးဆီၣ်တခူထီၣ်၀ဲန့ၣ်လီၤႉ
တၢ်ဖ့ၣ်ဆၢလၢအဟဲကဲထီၣ်သးလၢ(KTLA)ဒီးခ့ၣ်အဲၣ်ယူၣ်(သုးက့ ၄)အဘၢၣ်စၢၤလၢတကီၢ်ခါခဲအံၤသ့ၣ်တဖၣ် မ့ၢ်ခ့ၣ်အဲၣ်ယူၣ်(လီၢ်ခၢၣ်သး)ဘှါဆှဲ၀ဲအကျိၤအကျဲအိၣ်ဒ်လဲၣ်န့ၣ် ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး၀ဲဒီးစံးဆၢကဒါက့ၤလၢတအဲၣ်ဒိးတဲတၢ်နီတမံၤဒံးဘၣ်န့ၣ်လီၤႉ
တနီသရံၣ်ကီၢ်ဒိၣ်ကညီကမျၢၢ်လံာ်တၢ်ပာ်ဖျါအပူၤစံး၀ဲလၢပ၀ဲကညီထံဖိကီၢ်ဖိကမျၢၢ်သ့ၣ်တဖၣ်သးအိၣ်ဘိးဘၣ်သ့ၣ်ညါခိၣ်နၢ်သ့ၣ်တဖၣ်လၢကညီဖီၣ်စုက၀ဲၤကရူၢ်ကရၢထီရီၤတဖုလၢအအိၣ်ဒီးသးလၢအအ့ၣ်လိာ်ထီဒါတၢ်ႇ တၢ်မၤနၢၤမၤဃၣ်တၢ်ႇတၢ်ပာ်မၢ်ကွံာ်ကညီကလုာ်ဒီးထံဖိကီၢ်ဖိသ့ၣ်တဖၣ်အတၢ်ဘၣ်ဘျုးအဂီၢ်ဒီးကွၢ်ဒၣ်ထဲလၢ(နီၢ်ကစၢ်တၢ်ဘၣ်ဘျုးအဂီၢ်ဒီးၦၤလၢအဘၣ်ထွဲဒီးအီၤသ့ၣ်တဖၣ်အဂီၢ်ဧိၤ)န့ၣ်ပတတူၢ်လိာ်အီၤလ့ၤတက့ၤဘၣ်န့ၣ်လီၤႉ
ကီၢ်သူလ့ၤသုးမုၢ်ဒိၣ်(KTLA)အံၤ ဖဲအပူၤကွံာ်(၂၀၂၂)လါယူၤလံ ၁၉ သီအနံၤန့ၣ် ကညီဒီကလုာ်ဂၢၤသးကရၢ (KNDO)သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ် စီၤနၢၤဒါမၠး ဒုးအိၣ်ထီၣ်၀ဲဒီး ဖဲန့ၣ်(KNDO)သုးဖိသံၣ်ဖိလၢအိၣ် ခ့ၣ်အဲၣ်ယူၣ်(သုးက့ ၄)ဟီၣ်က၀ီၤပူၤတဖၣ်တနီၤန့ၣ်အိၣ်ဆၢထၢၣ်က့ၤ၀ဲဒ်(KTLA)အသိး၀ံၤအလီၢ်ခံ ခံခီခံကပၤတၢ်ဖ့ၣ်ဆၢစးထီၣ်ကဲထီၣ်၀ဲဒၣ်န့ၣ်လီၤႉ
