Home တၢ်ကစီၣ် (KNLA)သုးရ့ၣ်၀ဲၤလီၢ်လၢပယီၤသုးထီၣ်န့ၢ်၀ဲအံၤတၢ်က့ၤထီၣ်န့ၢ်ကဒါ၀ဲလံအဂ့ၢ် တၢ်ပၢၢ်ဆၢသုးပ၁်ဖှိၣ်စံး၀ဲ

(KNLA)သုးရ့ၣ်၀ဲၤလီၢ်လၢပယီၤသုးထီၣ်န့ၢ်၀ဲအံၤတၢ်က့ၤထီၣ်န့ၢ်ကဒါ၀ဲလံအဂ့ၢ် တၢ်ပၢၢ်ဆၢသုးပ၁်ဖှိၣ်စံး၀ဲ

253
0
Photo: KNDO

လါဖ့ၤဘြူၤအါရံၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢ(မၠၣ်၀တံၣ်)ကလံၤထံး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၀၃)၀ဲၤလီၢ် လၢပယီၤသုးထီၣ်န့ၢ်၀ဲအံၤ ဖဲမဟါလါဖ့ၤဘြူၤအါရံၤ ၂၂ သီ မုၢ်ထူၣ်အဆၢကတီၢ်န့ၣ် တၢ်က့ၤထီၣ်န့ၢ်ကဒါ၀ဲလံအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ ကီးတရံးကီၢ်ဆၣ် တီၢ်နီၢ်မုၢ်ထီၣ် မၠၣ်၀တံၣ်ကလံၤထံးန့ၣ် ဖဲလါဖ့ၤဘြူၤအါရံၤ ၂၁ သီ မုၢ်ထူၣ်အဆၢကတီၢ် ပယီၤသုးအဂၤ(၅၀)ဃၣ်ဃၣ် ဟဲထီၣ်မၤန့ၢ်ဒွဲၣ်အူအီၣ်ကွံာ်၀ဲ KNLA သုးရ့ၣ်(၁၀၃)၀ဲၤလီၢ်အံၤအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ

သုးကလၢၤလၢပယီၤသုးထီၣ်န့ၢ်၀ဲအံၤန့ၣ်ခီဖျိကညီဒီကလုာ်ဂၢၤသးကရၢဘံၣ်ဘၢသုးရ့ၣ်(၈)ဒီး ခီၣ်မဲဒိၣ်သုးရ့ၣ်လီၤဆီႇ(Federal Wings)သုးပာ်ဖှိၣ်တဖၣ်အံၤလဲၤခးကဒါ၀ဲလၢ(ဒြိ)တပယူာ်ဃီအဃိ ဖဲလါဖ့ၤဘြူၤအါရံၤ ၂၂ သီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် မၤန့ၢ်ကဒါက့ၤသုး၀ဲၤလီၢ်ခိၣ်သ့ၣ်အံၤလံအဂ့ၢ်န့ၣ် သုးပာ်ဖှိၣ်သုးခိၣ်တဂၤစံး၀ဲန့ၣ်လီၤႉ

“အ၀ဲသ့ၣ်နုာ်လီၤဒွဲၣ်အူအီၣ်ပသုးကလၢၤဒီးပ၀ဲဒၣ်နါက့ပလဲၤတ့ၢ်လီၤအ၀ဲသ့ၣ်လၢ(ဒြိ)တပယူာ်ဃီအဃိ တနၤဃီ၀ဲန့ၣ်အ၀ဲသ့ၣ်ဂုၤက့ၤအလီၢ်ခံလၢတၢ်ခံးကျါန့ၣ်လီၤႉကဘၣ်ဖဲမုၢ်ထူၣ်န့ၣ်ပက့ၤထီၣ်မၤန့ၢ်ကဒါက့ၤပသုးကလၢၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

Photo: KNDO

ဖဲလါဖ့ၤဘြူၤအါရံၤ ၂၁ သီ ပယီၤသုးထီၣ်န့ၢ် KNLA သုးရ့ၣ်(၁၀၃)၀ဲၤလီၢ်အခါန့ၣ် ပယီၤသုးအံၤဒွဲၣ်အူအီၣ်ကွံာ်၀ဲတၢ်သူၣ်ထီၣ်တဖၣ်ဒီးမ့မ့ၢ်သုးဖိသံၣ်ဖိခီန့ၣ်တၢ်သံတၢ်ဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်န့ၣ် (KNLA)စံး၀ဲန့ၣ်လီၤႉ

KNLA သုးရ့ၣ်(၁၀၃)၀ဲၤလီၢ်လၢပယီၤသုးထီၣ်န့ၢ်၀ဲအံၤန့ၣ် အိၣ်ယံၤ၀ဲဒီးသုးခိၣ်ကျၢၢ်ဖိ စီၤနၢၤဒါမၠး တီခိၣ်ရိၣ်မဲ ကီၢ်သူလ့ၤသုးမုၢ်ဒိၣ်(KTLA)သုး၀ဲၤလီၢ်ခိၣ်သ့ၣ် အူကြ့ၣ်ခံသုးကလၢၤအံၤထဲအကဲး(၁၀၀)ဘျဲၣ်ဧိၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါဖ့ၤဘြူၤအါရံၤ ၈ သီအနံၤစ့ၢ်ကီး လၢဂီၤလ့ၤဟီၣ်က၀ီၤပူၤ ခီဖျိတၢ်ဒုးကဲထီၣ်၀ဲလၢ တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအဃိ သ၀ီအဖျၢၣ်(၁၀)ဘျဲၣ် လီၢ်က၀ီၤကမျၢၢ်အဂၤ(၃၀၀၀)ဘျဲၣ် ဘၣ်လဲၤဃ့ၢ်ထီၣ်၀ဲဆူကီၢ်ကၠီၣ်တဲၣ်ပူၤဒံးန့ၣ်လီၤႉ