ကြုၢ်တုတၢ်ဒုးအခါကမျၢၢ်လၢအဃ့ၢ်ထီၣ်တဖၣ်တၢ်ကီတၢ်ခဲအိၣ်လၢအီၣ်အီအိၣ်ဆိးလီၢ်ကျဲ

လါမးရှး ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ်အပူၤ တၢ်နုာ်လီၤခးကြုၢ်၀့ၢ်ပၢၤကီၢ်၀ဲၤလီၢ်အခါ ခီဖျိတၢ်ဒုးကဲထီၣ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်အိၣ်လၢအထိညါဒီးတကီၢ်ခါခဲအံၤကမျၢၢ်တဖၣ်အံၤထံၣ်ဘၣ်၀ဲတၢ်ကီတၢ်ခဲအကလုာ်ကလုာ်အဂ့ၢ်န့ၣ် လီၢ်က၀ီၤကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ

တၢ်ဒုးကဲထီၣ်အဃိၦၤသူၣ်က့သးၦၢ်ႇဖိဒံဖိသၣ်ႇၦၤမိၢ်ဒၢလၢအဃ့ၢ်ထီၣ်တဖၣ်အံၤခီဖျိတၢ်ကိၢ်ဆါအဃိ တၢ်ကီတၢ်ခဲအိၣ်လၢတၢ်အီၣ်တၢ်အီႇတၢ်အိးတၢ်ဆိးလီၢ်ကျဲဒီးတၢ်အိၣ်ဆူၣ်အိၣ်ချ့အဂီၢ်အဂ့ၢ်န့ၣ် ကြုၢ်တုလီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ

အ၀ဲစံး၀ဲလၢ“ပစံၣ်ထီၣ်ကရီကဒးအဃိပစိာ်တၢ်တချုးဘၣ်ႉၦၤတနီၤန့ၣ်စံၣ်ထီၣ်ဆ့ကၤတဘ့ၣ်လၢလိၤလီၤႉၦၤစံၣ်ထီၣ်တဖၣ်အကျါန့ၣ်ပၣ်၀ဲဒၣ်ဖိဒံဖိသၣ်ႇၦၤသူၣ်က့သးၦၢ်ႇၦၤမိၢ်ဒၢတဖၣ်ဒီးတၢ်ကိၢ်အဃိတဘၣ်ဂီၢ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲမဟါလါမးရှး ၂၇ သီအနံၤ ခံခီခံကပၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ် ခီဖျိပယီၤသုးခးလီၤကျိဖးဒိၣ်ဒံးအဃိ ကမျၢၢ်လၢအဃ့ၢ်ထီၣ်တဖၣ်အံၤက့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

“တနံၤညါအံၤခီန့ၣ်တၢ်ဒုးတကဲထီၣ်လၢၤဘၣ်ႉမ့မ့ၢ်ၦၤသ၀ီဖိလၢအစံၣ်ထီၣ်တဖၣ်န့ၣ်က့ၤအိၣ်လၢဟံၣ်တဘူၣ်ဒံးဘၣ်ႉ တယံၤတမီၢ်န့ၣ်ပယီၤသုးခးလီၤကျိဖးဒိၣ်တလီၢ်လီၢ်လီၤႉဘၣ်ပျံၤပၠၤဒီးကျိဖးဒိၣ်ဒီးတၢ်ကိၢ်ဆါအဃိတၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲဒီးလၢတၢ်အိၣ်ဆူၣ်အိၣ်ချ့အဂီၢ်န့ၣ်တဘၣ်ဂီၢ်နီတစဲးဘၣ်”အဂ့ၢ်န့ၣ် လီၢ်က၀ီၤကမျၢၢ်လၢအစံၣ်ထီၣ်တဂၤ စံး၀ဲန့ၣ်လီၤႉ

ဖဲအပူၤကွံာ်လါမးရှး ၂၅ သီအနံၤ ခီဖျိတၢ်ဒုးကဲထီၣ်ဖဲကြုၢ်တုႇကီးတရံးႇမၠၣ်၀တံၣ်ဟီၣ်က၀ီၤပူၤအဃိ ယ့ၤပူၤႇကီၣ်၀ါလဲႇ(နွားခြံကုန်း)ႇ(ငါတိုင်)သ၀ီဖိတဖၣ်ဘၣ်ဃ့ၢ်ထီၣ်လၢအကထိညါအဂ့ၢ်န့ၣ် သ၀ီၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်(၂၀၂၂)လါဒံၣ်စ့ဘၢၣ်တၢ်ဒုးကဲထီၣ်အခါစ့ၢ်ကီး(ကီးတရံးကီၢ်ဆၣ်)လီၢ်က၀ီၤကမျၢၢ်လၢအဘၣ်ဃ့ၢ်ထီၣ်တဖၣ်အံၤတုၤလၢခဲအံၤတစုတနီၤန့ၣ်တက့ၤအိၣ်ဘၣ်ဒံးလၢအဟံၣ်အဃီဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ