ကြုၢ်တုပယီၤသုး(၅၄၆)သုးရ့ၣ်ခးလီၤကျိဖးဒိၣ်ကိးမုၢ်နံၤဒဲးအဃိသ၀ီဖိက့ၤအိၣ်လၢသ၀ီပူၤတဘူၣ်ဒံးဘၣ်

လါမးရှး ၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကီးတရံးကီၢ်ရ့ၣ် ကြုၢ်တုကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်ဆူ(ကြုၢ်တု)ကလံၤထံး ဒူသ၀ီတဖၣ်အပူၤတလီၢ်လီၢ်အဃိလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤက့ၤအိၣ်လၢသ၀ီပူၤတဘူၣ်ဒံးဘၣ်ဒီးဘၣ်ဟးစံၣ်အိၣ်၀ဲတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်ဖဲအပူၤကွံာ်လါဖ့ၤဘြူၤအါရံၤလၢၤတုၤလၢခဲအံၤန့ၣ်ပယီၤသုး(ခလရ–၅၄၅/၅၄၆)သုးရ့ၣ် လၢအိၣ်ကြုၢ်တုပူၤအံၤတဖၣ်ခီဖျိအ၀ဲသ့ၣ်ခးလီၤကျိဖးဒိၣ်ဆူကီၣ်ကၤႇကါမယဲၣ်ႇမံၣ်ကလိၤႇကါနံၤသ၀ီပူၤတလီၢ်လီၢ်အဃိ ဘၣ်ဟးဂီၤ၀ဲၦၤဟံၣ်ၦၤဃီအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

“စှၤသီအံၤပယီၤသုး(၅၄၅/၅၄၆)သုးရ့ၣ်တဖၣ်အံၤခးလီၤကျိဖးဒိၣ်ႉဖဲလါဖ့ၤဘြူၤအါရံၤ ၂၈ သီန့ၣ် ခးလီၤကျိဖးဒိၣ်လၢ(ကီၣ်ကၤ)သ၀ီပူၤအဃိၦၤဟံၣ်ဟးဂီၤႉၦၤသ၀ီဖိလၢအစံၣ်တဖၣ်န့ၣ်တုၤလၢခဲအံၤဟဲက့ၤအိၣ်လၢသ၀ီပူၤတဘူၣ်ဒံးဘၣ်ႉဖဲအပူၤကွံာ်စှၤသီအခါနါက့ခးလီၤကျိဖးဒိၣ်လၢကါမယဲၣ်ႇမံၣ်ကလိၤႇကါနံၤသ၀ီတကပၤန့ၣ်ဒံးမီၤနီၤႉအ၀ဲသ့ၣ်န့ၣ်ပျံၤ၀ဲလၢကညီသုးကဟဲခးအ၀ဲသ့ၣ်လၢ(ဒြိ)မီၤနီၤ”အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဒီးကြုၢ်တု ပယီၤသုးကလၢၤအံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢကီးတရံးဟီၣ်က၀ီၤအပူၤခီဖျိပယီၤသုးဒီးသုးခိးကီၢ်ဆၢ(BGF)အံၤနုာ်လီၤဟူးဂဲၤဆီလီၤသုးကလၢၤႇဖီၣ်သမံသမိးတၢ်လၢဒူသ၀ီပူၤဒီးတၢ်လီၢ်လၢ(KNLA)သုးပာ်ဖှိၣ်ဟူးဂဲၤ၀ဲအလီၢ်သ့ၣ်တဖၣ်ကိးမုၢ်နံၤဒဲးအဃိ ကီးတရံး–ကြုၢ်တုဟီၣ်က၀ီၤသ၀ီအဖျၢၣ်(၃၀)ဃၣ်ဃၣ်ကမျၢၢ်တဖၣ်က့ၤအိၣ်လၢအ၀ဲသ့ၣ်သ၀ီပူၤတဘူၣ်ဒံး၀ဲဘၣ် အဂ့ၢ်န့ၣ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲလၢ“ခဲအံၤမ့ဘၣ်တဲကီးတရံးဒီတဘ့ၣ်န့ၣ်သ၀ီအဖျၢၣ်(၃၀)န့ၣ်ၦၤအိၣ်လၢအပူၤတဘူၣ်လၢၤဘၣ်ႉအိၣ်၀ဲပယီၤသုးဒီး(BGF)န့ၣ်လီၤႉၦၤသ၀ီဖိတဖၣ်အါဒၣ်တက့ၢ်န့ၣ်လဲၤအိၣ်၀ဲလၢသ၀ီလၢအဂၤႇ သ၀ီဖိတနီၤန့ၣ်လဲၤအိၣ်၀ဲလၢအကျီးပူၤဒ်န့ၣ်လီၤႉတၢ်လီၢ်လၢအဘူးညါန့ၣ်ပလဲၤဟ့ၣ်လီၤတၢ်အီၣ်တၢ်အီၣ်အိၣ်ႉၦၤလၢအလဲၤစံၣ်အိၣ်ယံၤတဖၣ်ညါဒုပလဲၤဟ့ၣ်လီၤတတုၤဘၣ်”အဂ့ၢ်န့ၣ် စံး၀ဲန့ၣ်လီၤႉ

ကီးတရံး–ကြုၢ်တုဟီၣ်က၀ီၤအပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်စရီခီန့ၣ်တၢ်တသ့ၣ်ညါ၀ဲလီၤတံၢ်လီၤဆဲးဘၣ်ဒီး ခီဖျိအ၀ဲသ့ၣ်ဟးအိၣ်လၢအံၤတဒူၣ်လၢန့ၣ်တဒူၣ်အဃိမ့က့ၤဒွးကဒါလၢသ၀ီၦၤနီၣ်ဂံၢ်အသိးန့ၣ် ၦၤတဟဲက့ၤအိၣ်ဘၣ်ဒံးလၢသ၀ီပူၤဘၣ်န့ၣ်ၦၤနီၣ်ဂံၢ်ကအိၣ်အဂၤ(၅၀၀၀)ဃၣ်ဃၣ်ဒံးညါအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးအတၢ်မၤနီၣ်စရီပူၤန့ၣ်လီၤႉ

လၢကီးတရံး–ကြုၢ်တုဟီၣ်က၀ီၤအပူၤ ခီဖျိပယီၤသုး(ခလရ–၅၄၅/၅၄၆)ႇကီးတရံး(၉၇)သုးရ့ၣ်ႇ လဲၤ၀ၣ်ကျိဖးဒိၣ်သုးဒီးကျိဖးဒိၣ်ပယီၤသုးလၢအိၣ်တီၤကၠၤအ့တီၤထီကၠိကရၢၢ်ပူၤတဖၣ်အံၤခးလီၤကျိဖးဒိၣ်ဆူဟီၣ်က၀ီၤဒူသ၀ီပူၤတလီၢ်လီၢ်အဃိဘၣ်ဟးဂီၤ၀ဲကမျၢၢ်အဟံၣ်အဃီႇကၠိႇတၢ်ဆါဟံၣ်ႇသီခါဖၠၣ်ႇတၢ်ဘါယွၤသရိာ်ႇဃိၣ်သ့ၣ်တဖၣ်အါအါဂီၢ်ဂီၢ်ဒီးၦၤနီၢ်ဒိၣ်နီၢ်ဆံးဖိဒံဖိသၣ်ဃုာ်ဒီးသီဘူၣ်သီခါတဖၣ်သံဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ