လါမးရှး ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ်အပူၤ လီၢ်က၀ီၤကမျၢၢ်လၢအိၣ်ဒ၀ဲၢ်ကီၢ်ဆၣ်ပူၤဒီးမုၢ်ထီၣ်ခိခိၣ်ဒူသ၀ီပူၤတဖၣ် တဘၣ်သူတၢ်ဖိတၢ်လံၤလၢသုးမီၤစိရိၤထုးထီၣ်ရၤလီၤ၀ဲသ့ၣ်တဖၣ်အံၤဘၣ်အဂ့ၢ်န့ၣ်ဒ၀ဲၢ်ကီၢ်ဆၣ်(ဥသြ)သုးကျိၤ ထုးထီၣ်ဒုးသ့ၣ်ညါ၀ဲဖဲလါမးရှး ၁၁ သီအနံၤန့ၣ်လီၤႉ
စးထီၣ်ဖဲတလါအံၤလါမးရှး ၁၁ သီန့ၣ် သိလ့ၣ်တီၣ်တၢ်ဖိတၢ်လံၤဒီးလီၢ်က၀ီၤကမျၢၢ်လၢအဟးထီၣ်က့ၤလီၤဖဲဒ၀ဲၢ်–ထံခံကျဲတဖၣ်အံၤ စိာ်ထိၣ်စိာ်လီၤတီၣ်ဃုာ်တၢ်ဖိတၢ်လံၤလၢသုးမီၤစိရိၤထုးထီၣ်၀ဲအံၤတန့ၢ်ဘၣ်ဒီး တၢ်တဘၣ်သူစ့ၢ်ကီး၀ဲဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
(ဥသြ)သုးကျိၤ တၢ်ဘိးဘၣ်ရၤလီၤမူဒါခိၣ်တဂၤစံး၀ဲလၢ“ခဲအံၤန့ၣ်ပသမံသမိးကမျၢၢ်တဖၣ်မ့ၢ်အတီၣ် တၢ်ဖိတၢ်လံၤန့ၣ်ပၣ်ဃုာ်ဒီးသုးမီၤစိရိၤအတၢ်ဖိတၢ်လံၤဧါႉပဟ့ၣ်ပလီၢ်အ၀ဲသ့ၣ်လၢတဘၣ်သူတၢ်တဖၣ်အံၤဘၣ်ဒ်န့ၣ်မီၤနီၤႉပဟ့ၣ်ပလီၢ်လံအ၀ဲသ့ၣ်မ့တီၣ်ဒံး၀ဲဒုပကဖီၣ်ဒီးပကမၤဟးဂီၤအီၤတဘျီဃီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်(ဥသြ)သုးကျိၤအလံာ်တၢ်ပာ်ဖျါပူၤအသိးန့ၣ်သုးမီၤစိရိၤအတၢ်ဖိတၢ်လံၤလၢတၢ်တဘၣ်သူဒီးဆါအီၤတဖၣ်ဘၣ်န့ၣ်အိၣ်၀ဲအကလုာ်(၃၀)ဘျဲၣ်အကျါပၣ်ဃုာ်၀ဲမီာ်ထူႇဘံၣ်ယၢၣ်ႇတၢ်အီၣ်တၢ်အီတၢ်‚ဖိတၢ်လံၤတနီၤဒီးတၢ်ဆါဟံၣ်ႇဟိၤထဲ(hotel)ႇစ့တၢးသ့ၣ်တဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၃၁ သီအခါစ့ၢ်ကီး လီၢ်က၀ီၤတၢ်ဒီသဒၢကမျၢၢ်သုးအိၣ်ခိးသမံသမိး တၢ်လၢဒ၀ဲၢ်–ထံခံကျဲမုၢ်ခိၣ်သတူၢ်ကလာ်ဒီး ဖဲန့ၣ်ဖီၣ်န့ၢ်၀ဲ(WY)ကသံၣ်မူၤဘှီးအဖျၢၣ်(၆၀၀)ဘျဲၣ်အံၤလၢ ၦၤသၢဂၤအအိၣ်ဒံးအဂ့ၢ်န့ၣ် တၢ်ဒီသဒၢကမျၢၢ်သုးထုးထီၣ်ပာ်ဖျါတ့ၢ်၀ဲန့ၣ်လီၤႉ
