Home တၢ်ကစီၣ် ပယီၤသုးခးလီၤကျိဖးဒိၣ်လၢချၢၣ်လွံၢ်ထူၣ်ကီၢ်ရ့ၣ်ပူၤအဃိကမျၢၢ်သံဘၣ်ဒိဘၣ်ထံးအိၣ်ဒီးၦၤဃ့ၢ်မှံဟးဖျိးနီၣ်ဂံၢ်အါထီၣ်

ပယီၤသုးခးလီၤကျိဖးဒိၣ်လၢချၢၣ်လွံၢ်ထူၣ်ကီၢ်ရ့ၣ်ပူၤအဃိကမျၢၢ်သံဘၣ်ဒိဘၣ်ထံးအိၣ်ဒီးၦၤဃ့ၢ်မှံဟးဖျိးနီၣ်ဂံၢ်အါထီၣ်

226
0
Photo: FBR

လါမးရှး ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲအပူၤကွံာ်လါဖ့ၤဘြူၤအါရံၤအတီၢ်ပူၤ ခီဖျိပယီၤသုးခးလီၤကျိဖးဒိၣ်ဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤပူၤအဃိ ကမျၢၢ်သံဘၣ်ဒိဘၣ်ထံးအိၣ်၀ဲဒီးၦၤဃ့ၢ်မှံဟးဖျိးအနီၣ်ဂံၢ်စ့ၢ်ကီး ဟဲအါထီၣ်၀ဲကွ့ၢ်ကွ့ၢ်အဂ့ၢ်န့ၣ် (Free Burma Ranger)ကရူၢ် ထုးထီၣ်ပာ်ဖျါ၀ဲဖဲလါမးရှး ၈ သီအနံၤန့ၣ်လီၤႉ

ခီဖျိပယီၤသုးခးလီၤကျိဖးဒိၣ်ဆူချၢၣ်လွံၢ်ထူၣ်ကီၢ်ရ့ၣ်ပူၤအဃိလါဖ့ၤဘြူၤအါရံၤတလါအတီၢ်ပူၤ ကမျၢၢ်သံ(၅)ဂၤႇဘၣ်ဒိ၀ဲ(၁၇)ဂၤဒီးကမျၢၢ်ၦၤဃ့ၢ်မှံဟးဖျိးနီၣ်ဂံၢ်ဟဲအါထီၣ်တုၤလၢအဂၤ(၁၀ႇ၀၀၀)ဘျဲၣ် အဂ့ၢ်န့ၣ် (FBR)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဖဲအပူၤကွံာ်လါဖ့ၤဘြူၤအါရံၤ ၁၀ သီတုၤလၢ ၁၂ သီအနံၤ ခီဖျိပယီၤသုးခးလီၤကျိဖးဒိၣ်တပယူာ်ဃီအဃိ (ညောင်ပင်ကြီး)သ၀ီဖိပိာ်မုၣ်ဘၣ်ဒိ(၃)ဂၤတကးဒံးဘၣ်အမဲာ်ညါဖဲလါဖ့ၤဘြူၤအါရံၤ ၁၈ သီအနံၤစ့ၢ်ကီး ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢ(မိကီၢ်ဆၣ်)ကၠိတီသ၀ီပူၤအဃိၦၤမုၢ်ၦၢ်သံတဂၤဒီး ၦၤမုၢ်ၦၢ်တဂၤအံၤအဖိမုၣ်ဖိခွါ ခံဂၤအံၤစ့ၢ်ကီးဘၣ်ဒိဘၣ်ထံးနးနးကျံၤကျံၤအဂ့ၢ်န့ၣ် (FBR)လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ

ၦၤလၢအိၣ်ဘူးဒီးၦၤဃ့ၢ်မှံဟးဖျိးတဂၤစံး၀ဲလၢ“လၢအံၤတကပၤန့ၣ်တၢ်လီၢ်လၢခ့ၣ်အဲၣ်ယူၣ်ပၢဟီၣ်က၀ီၤပူၤန့ၣ်ယီၤသုးဟဲထီၣ်တဘူၣ်ဘၣ်ႉအဃိန့ၣ်အ၀ဲသ့ၣ်သူ၀ဲကဘီယူၤႇကွၢ်ဖဲကဘၣ်န့ၣ်ခးလီၤနါစိၤကျိဖးဒိၣ်လီၤႉကမျၢၢ်လၢအဘၣ်ကျိဖးဒိၣ်တဖၣ်အါဒၣ်တက့ၢ်န့ၣ်ခီဖျိအ၀ဲသ့ၣ်သးတလၢၤအဟံၣ်အဃီဘၣ်အဃိအ၀ဲသ့ၣ်တဲ၀ဲလၢပယီၤသုးဟဲထီၣ်တတုၤလၢအံၤဘၣ်ဒီးဖဲအက့ၤအိၣ်လၢသ၀ီပူၤအခါန့ၣ်ဘၣ်၀ဲဒီးကျိဖးဒိၣ်အံၤလီၤမီၤနီၤႉတၢ်ဘူၣ်မ့တဂ့ၤဘၣ်ဒုဘၣ်လီၤႉတၢ်ဒုးကဲထီၣ်ကိးမုၢ်နံၤဒဲးအဃိၦၤဃ့ၢ်မှံဟးဖျိးအနီၣ်ဂံၢ်စ့ၢ်ကီးဟဲအါထီၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

Photo: FBR

ခီဖျိၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်ဒီးချၢၣ်လွံၢ်ထူၣ်ကီၢ်ရ့ၣ်ပူၤတၢ်ဒုးကဲထီၣ်ကိးမုၢ်ဒဲးအဃိ တၢ်ကရၢကရိလၢအဆီၣ်ထွဲမၤစၢၤၦၤဃ့ၢ်မှံဟးဖျိးတဖၣ်စ့ၢ်ကီးတၢ်ကီတၢ်ခဲအိၣ်လၢကလဲၤဆှၢတၢ်အီၣ်တၢ်အီတၢ်ဖိတၢ်လံၤတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤ(Free Burma Ranger)တၢ်ကရၢကရိဆီၣ်ထွဲမၤစၢၤအ၀ဲသ့ၣ်လၢ ကသံၣ်ကသီႇဟုသးဒီးတၢ်ဖိတၢ်လံၤလၢအဂၤသ့ၣ်တဖၣ်အဂ့ၢ်န့ၣ် ပာ်ဖျါ၀ဲလၢအလံာ်တၢ်ပာ်ဖျါပူၤန့ၣ်လီၤႉ

ဒ်န့ၣ်အသိးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်လၢချၢၣ်လွံၢ်ထူၣ်ကီၢ်ရ့ၣ်ပူၤအဃိ စးထီၣ်(၂၀၂၂)လါအီကူးတုၤလၢတနံၣ်အံၤလါဖ့ၤဘြူၤအါရံၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ် (၈၀ႇ၀၀၀)ဘျဲၣ်လံဒီးတကီၢ်ခါခဲအံၤလၢကီၢ်ရ့ၣ်ဒီတဘ့ၣ်အပူၤန့ၣ်ၦၤဃ့ၢ်မှံဟးဖျိးအနီၣ်ဂံၢ်အိၣ်(၁၄၀ႇ၀၀၀)ဘျဲၣ်လံအဂ့ၢ်န့ၣ် ကညီတၢ်တိစၢၤမၤစၢၤတၢ်မုာ်တၢ်ခုၣ်ၦၤဘျးစဲ(KPSN)ထုးထီာ်ပာ်ဖျါ၀ဲဖဲလါဖ့ၤဘြူၤအအရံၤ ၂၇ သီအနံၤ န့ၣ်လီၤႉ