လါမးရှး ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢအ့ၣ်ယၣ်၀တံၣ်ကီၢ်ခီ ဟ့သၤတၣ်ကီၢ်ရ့ၣ်(ကျုံပျော်)ကီၢ်ဆၣ် ဒူသ၀ီတနီၤအပူၤ ပယီၤသုးဖီၣ်က့ၤကိး၀ဲလီၢ်က၀ီၤသ၀ီဖိ(၆)ဂၤဒီးသီခါ(၁)ပါလၢတၢ်ဂ့ၢ်တအိၣ်နီတမံၤဘၣ်ဒီးတုၤလၢခဲအံၤအဟံၣ်ဖိဃီဖိဆဲးကျိးအ၀ဲသ့ၣ်တန့ၢ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဖဲအပူၤကွံာ်လါမးရှး ၂၁ သီအခါ လၢကၠိၤပၠီၤကီၢ်ဆၣ် (အင်းဖျား)ကရူၢ် (အင်းဖျား)သ၀ီပူၤန့ၣ် တၢ်ခးသံ၀ဲသုးမီၤစိရိၤအသ၀ီသးၦၢ်(အူထိဆါ)ကဲထီၣ်၀ံၤလီၢ်ခံပယီၤသုးဖီၣ်က့ၤကိး၀ဲ(အင်းဖျား)သ၀ီဖိ ၂ ဂၤႇ သီခါ(၁)ပါဒီးသ၀ီဖိလၢအဂၤ(၄)ဂၤအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
“ၦၤလၢပယီၤသုးဖီၣ်အီၤတဖၣ်အါဒၣ်တက့ၢ်န့ၣ်မ့ၢ်ၦၤစ့အိၣ်ဖိတဖၣ်လီၤႉအဟံၣ်ဖိဃီဖိလဲၤလူၤအ၀ဲသ့ၣ်ဘျီတထံၣ်၀ဲလၢၤဘၣ်ႉမ့ၢ်ၦၤဖီၣ်အီၤလၢတၢ်ဂ့ၢ်မနုၤလဲၣ်န့ၣ်ပတသ့ၣ်ညါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
လီၢ်က၀ီၤကမျၢၢ်လၢပယီၤသုးဖီၣ်အီၤသ့ၣ်တဖၣ်န့ၣ်မ့ၢ်၀ဲၦၤလၢအတီၣ်ထီၣ်(အင်းဖျား)သ၀ီဖိအူပၠ့ၣ်စိၤႇ(လေလံရိုး)သ၀ီဖိ ကသံၣ်သရၣ်မုၣ် ဒီၤမ့ၤမၠၣ်မိၤဒီးအ၀ၤအူစ့ၤ၀့ထိႇ (အင်းဖျား)သီခါတဖၣ်အံၤ၀ံၤလီၢ်ခံ တၢ်ဖီၣ်ကဒီး၀ဲ(အင်းဖျား)ကရူၢ် (လိမ်မာကုန်း–လိမ်ကုန်းကြီး)သ၀ီဖိ အူလ့လ့ဒီးအပုၢ်ခွါသ့ၣ်တဖၣ်အံၤ အဂ့ၢ်န့ၣ် ၦၤလၢဘူးအိၣ်ဘူးဖဲန့ၣ်တဖၣ်စံး၀ဲ န့ၣ်လီၤႉ
(အင်းဖျား)သ၀ီသးၦၢ်လၢတၢ်ခးသံအီၤတဂၤအံၤအပူၤကွံာ်တၢ်ဒုးကဲထီၣ်လၢပယီၤသုးဒီးလီၢ်က၀ီၤအဘၢၣ်စၢၤ ဖဲ(ကျုံပျော်)ကီၢ်ဆၣ် လ့ၤဆွဲသ၀ီပူၤအံၤအခါန့ၣ် မ့ၢ်ၦၤတဂၤလၢအမံၤဟူသၣ်ဖျါလၢအကဲ၀ဲဒၣ်သုးမီၤစိရိၤ တၢ်မဲာ်ချံတဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဘၣ်ဃးတၢ်ခးသံသုးမီၤစိရိၤသ၀ီသးၦၢ်အံၤမ့ၢ်ကရူၢ်ကရၢဖဲလဲၣ်တဒူၣ်မၤ၀ဲလဲၣ်န့ၣ်တၢ်တသ့ၣ်ညါ၀ဲဒံးဘၣ်ဒီး ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်စ့ၢ်ကီးပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်အသိး ပယီၤသုးတကပၤစ့ၢ်ကီး ထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ
ဖဲအပူၤကွံာ်(၂၀၂၁) လါယူၤ ၅ သီအခါစ့ၢ်ကီး လၢ(ကျုံပျော်)ကီၢ်ဆၣ် (သောင်ကြီး)ဟီၣ်က၀ီၤ (ဇရစ်ရိုး)ကရူၢ် (လှေဆွဲ)သ၀ီပူၤန့ၣ် တၢ်ဒုးကဲထီၣ်၀ဲလၢလီၢ်က၀ီၤသ၀ီဖိလၢအတမ့ၢ်(PDF)ဘၣ်အံၤဒီးပယီၤသုးအဘၢၣ်စၢၤဒီး ဖဲန့ၣ်ပယီၤသုးဖီၣ်လီၢ်က၀ီၤကမျၢၢ်အါမးကဲထီၣ်တ့ၢ်အသးဒံးန့ၣ်လီၤႉ
