Home တၢ်ကစီၣ် ပယီၤသုးဖီၣ်က့ၤကိး သၣ်တီၣ်(ဘိုတဲကုန်း)သ၀ီဖိ ၂ ဂၤဒီး ပျၢ်လီၤက့ၤ၀ဲတဂၤဒံးလီၤ

ပယီၤသုးဖီၣ်က့ၤကိး သၣ်တီၣ်(ဘိုတဲကုန်း)သ၀ီဖိ ၂ ဂၤဒီး ပျၢ်လီၤက့ၤ၀ဲတဂၤဒံးလီၤ

223
0
Photo: Crd.

လါမးရှး ၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် သၣ်တီၣ်(၁၃)မဲၤ၀့ၢ်ကပၤ (ဘိုတဲကုန်း)သ၀ီအပူၤ ဖဲလါမးရှး ၂ သီအနံၤန့ၣ် ပယီၤသုးဆိမိၣ်လၢတၢ်ပၢၢ်ဆၢသုးအိၣ်ခူသူၣ်လၢသ၀ီ၀ဲန့ၣ်ပူၤဒီးဖဲအနုာ်လီၤတၢ်လၢသ၀ီပူၤအံၤအခါ ဖီၣ်က့ၤကိး၀ဲကမျၢၢ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဖဲအပူၤကွံာ်စှၤသီအခါလၢ(၁၃)မဲၤ ပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိ(ဘိုတဲကုန်း)သ၀ီဖိတဖၣ် ဃ့ၢ်ထီၣ်၀ဲဒီးကမျၢၢ်လၢပယီၤသုးဖီၣ်၀ဲ(၂)ဂၤအံၤအကျါတၢ်ပျၢ်လီၤက့ၤ၀ဲတဂၤလံဘၣ်ဆၣ် မ့မ့ၢ်အ၀ဲတဂၤန့ၣ် တုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ

“မ့ၢ်(PDF)တကပၤဘၣ်ၦဲၤဂၤလဲၣ်ဒုပတသ့ၣ်ညါဘၣ်ႉၦၤအိၣ်ဖဲသ၀ီပူၤတဖၣ်အံၤပျံၤကျိဖးဒိၣ်အဃိအ၀ဲသ့ၣ်ဟးစံၣ်အိၣ်လၢအဂၤႇလၢအဟဲက့ၤအိၣ်လၢသ၀ီပူၤဒုအိၣ်တနီၤဟဲက့ၤဒုးအီၣ်အဆၣ်ဖိကီၢ်ဖိအဆၣ်မီၤနီၤႉဖီၣ်က့ၤကိး၀ဲသ၀ီဖိခံဂၤႉပယီၤသုးန့ၣ်မ့ထံၣ်တၢ်လီၤဆီလၢၦၤလီတဲစိပူၤတခါခါန့ၣ်ဟံ၀ဲအရ့အိၣ်အသိးလီတဲစိပူၤမ့တထံၣ်တၢ်နီတမံၤဘၣ်နါက့ၦၤမ့ဟ့ၣ်တၢ်ကစီၣ်န့ၣ်ဖီၣ်၀ဲလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဖဲပယီၤသုးနုာ်လီၤခးတၢ်လၢသ၀ီပူၤအခါန့ၣ်ဒွဲၣ်အူအီၣ်ကွံာ်၀ဲအပူၤကွံာ်တၢ်အိၣ်ဖှိၣ်သရၣ်ဒိၣ်အဟံၣ်အံၤဒီးဟံၣ်လၢပယီၤသုးဒွဲၣ်အူအီၣ်၀ဲအံၤခီဖျိၦၤတအိၣ်လၢအပူၤနီတဂၤလၢၤဘၣ်အဃိတၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်အဂ့ၢ်န့ၣ် လီၢ်က၀ီၤသ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဒ်န့ၣ်အသိးတုၤလၢလါမးရှး ၂ သီတစုန့ၣ် ပယီၤသုးခးလီၤဒံးကျိဖးဒိၣ်ဆူသၣ်တီၣ်(၁၃)မဲၤ၀့ၢ်ပူၤတပယူာ်ဃီဒီး ပယီၤသုးနုာ်လီၤခးတၢ်လၢ(ဘိုတဲကုန်း)သ၀ီပူၤအံၤန့ၣ်ခီဖျိၦၤဟ့ၣ်အ၀ဲသ့ၣ်တၢ်ကစီၣ်အိၣ်လီၤတံၢ်လီၤဆဲးအဃိ ပယီၤသုးနုာ်လီၤခးတၢ်လီၤအဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၂၁ သီအနံၤစ့ၢ်ကီးလၢ(၁၃)မဲၤန့ၣ် တၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇတၢ်ဒီသဒၢကမျၢၢ်သုး(PDF)ဒီးပယီၤသုးအဘၢၣ်စၢၤ၀ံၤအလီၢ်ခံ ပယီၤသုးခးလီၤကျိဖးဒိၣ်ဆူ၀့ၢ်ပူၤတကးဒံးဘၣ်အမဲာ်ညါဒွဲၣ်အူအီၣ်၀ဲက၀ီၤဒ့ပူၤကမျၢၢ်အဟံၣ်(၇)ဖျၢၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ