Home တၢ်ကစီၣ် မိကီၢ်ဆၣ်ပူၤပယီၤသုးဖီၣ်လီၢ်က၀ီၤကမျၢၢ်(၂၂)ဂၤအကျါပၣ်ဃု၁်သးစၢ်လၢအသးနံၣ်တၦဲၤဒံးဘၣ်(၃)ဂၤ

မိကီၢ်ဆၣ်ပူၤပယီၤသုးဖီၣ်လီၢ်က၀ီၤကမျၢၢ်(၂၂)ဂၤအကျါပၣ်ဃု၁်သးစၢ်လၢအသးနံၣ်တၦဲၤဒံးဘၣ်(၃)ဂၤ

177
0
Photo: Crd.

လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢချၢၣ်လွံၢ်ထူၣ်ကီၢ်ရ့ၣ် မိကီၢ်ဆၣ်အပူၤ ဖဲလါမးရှး ၂၀ သီ ဂီၤခီအဆၢကတီၢ်န့ၣ် ပယီၤသုးနုာ်လီၤလၢ (ဥသျှစ်ကုန်း)သ၀ီပူၤဒီးဖီၣ်က့ၤကိး၀ဲလီၢ်က၀ီၤကမျၢၢ်အဂၤ(၂၂)အကျါပၣ်ဃုာ်၀ဲသးစၢ်လၢအသးနံၣ်တၦဲၤဒံးဘၣ်(၃)ဂၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ဖဲမဟါဂီၤခီန့ၣ်ပယီၤသုးနုာ်လီၤလၢသ၀ီပူၤဒီးဖီၣ်က့ၤကိး၀ဲကမျၢၢ်(၂၂)ဂၤႉအဖီၣ်၀ဲအကျါန့ၣ်ပၣ်ဃုာ်သးစၢ်လၢအသးနံၣ်တၦဲၤဒံးဘၣ်န့ၣ်(၃)ဂၤႉပၣ်ဃုာ်ဒီးၦၤဃ့ၢ်တၢ်ဒုးလၢအဟဲစံၣ်အိၣ်လၢသ၀ီပူၤအံၤ(၄)ဂၤႉယဆိမိၣ်ကဘၣ်အကသူ၀ဲဒ်တၢ်ဒီသဒၢစုက၀ဲၤတခါအသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၀ သီအနံၤန့ၣ်လီၤႉ

ဖဲန့ၣ်၀ံၤအလီၢ်ခံတၢ်ကစီၣ်ဟူထီၣ်သါလီၤလၢကမျၢၢ်လၢပယီၤသုးဖီၣ်အီၤတဖၣ်အကျါန့ၣ် တၢ်ပျၢ်လီၤက့ၤ၀ဲၦၤလၢအသးၦၢ်(၂)ဂၤဘၣ်ဆၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ပာ်ဂၢၢ်ပာ်ကျၢၤ၀ဲလီၤလီၤ ဆီဆီတန့ၢ်ဒံး၀ဲဘၣ်န့ၣ်လီၤႉ

တကီၢ်ခါခဲအံၤပယီၤသုးက့ၤကိးလီၢ်က၀ီၤကမျၢၢ်တဖၣ်ဒီးဆီလီၤသးအိၣ်၀ဲလၢ(အုန်းပင်စု)သ၀ီပူၤဒီး ခီဖျိပယီၤသုးခးလီၤကျိဖးဒိၣ်အဃိ(ဥသျှစ်ကုန်း)သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

Photo: Crd.

“ပယီၤသုးဖီၣ်က့ၤကိးၦၤသ၀ီဖိန့ၣ်အမ့ၢ်လီၤႉတဲ၀ဲလၢပယီၤသုးမၢအတၢ်လဲၤပၠးန့ၢ်ကျဲလီၤႉပယီၤသုးခးလီၤကျိဖးဒိၣ်လၢသ၀ီပူၤႉၦၤသ၀ီတနီၤန့ၣ်စံၣ်ထီၣ်မီၤနီၤဘၣ်ဆၣ်စံၣ်ယံၤယံၤတသ့ဘၣ်ႉခီဖျိဘၣ်ဟဲက့ၤဒုးအီၣ်ဆၣ်ဖိကီၢ်ဖိအဆၣ်ဒံးအဃိလီၤႉတၢ်ဒုးမ့တကဲထီၣ်ဒံးဘၣ်န့ၣ်ၦၤတစံၣ်ဘၣ်ႇအါဒၣ်တက့ၢ်ၦၤအိၣ်လၢဟံၣ်လီၤအဃိပယီၤသုးမ့ဟဲနုာ်လီၤလံန့ၣ်ဖီၣ်ၦၤကညီႇခးသံၦၤကညီအိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဖဲလါမးရှး ၂၀ သီအနံၤစ့ၢ်ကီး ခီဖျိတၢ်ပၢၢ်ဆၢသုးကရူၢ်လဲၤခး(နတ်သံကွင်း)ပယီၤသုးကလၢၤအံၤ လၢ(ဒြိ)အဃိ ပယီၤသုးက့ၤခးလီၤကဒါကျိဖးဒိၣ်ဆူ(မိကီၢ်ဆၣ်)ဒူသ၀ီတဖၣ်အပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးခီဖျိခးလီၤကျိဖးဒိၣ်ဆူ(မိကီၢ်ဆၣ်)ဒူသ၀ီပူၤအဃိသ၀ီ(၇)ဖျၢၣ်ကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢလီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၁ သီအနံၤန့ၣ် လီၤႉ