သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိ ၀ီၢ်ရ့ၣ်လီၢ်က၀ီၤကမျၢၢ်ဘၣ်ဃ့ၢ်ထီၣ်(၅၀၀)ဘျဲၣ်

လါမ့ၤ ၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်အပူၤ ဖဲမဟါလါမ့ၤ ၇ သီအခါန့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(ဘဲလမုၣ်)ကရူၢ် ၀ၤပသဲသ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲ အဂၤ(၅၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါလါမ့ၤ ၇ သီ မုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ (၀ၤပသဲသ၀ီ)ကၠိကပၤအဃိကၠိတၢ်သူၣ်ထီၣ်ဒီးကမျၢၢ်ဘၣ်ဒိဘၣ်ထံးအိၣ်၀ဲအသိး ခၠီနခွၣ်ႇဘဲလမုၣ်ႇ တၤဖးထီၣ်ႇ ၀ၤပသဲသ၀ီဒီးသ၀ီလၢအဂၤကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

“ကဘၣ်ဖဲမုၢ်နၤခီ ၁၁ နၣ်ရံၣ်န့ၣ် ကဘီယူၤဟဲတ့ၢ်လီၤ၀ဲမ့ၣ်ပိၢ်(၂)ဖျၢၣ်ႉ အပိၢ်ဖးထီၣ်တဖျၢၣ်လီၤႉ ၀ၤပသဲသ၀ီဖိဘၣ်ဒိ တဂၤႉ တၢ်သူၣ်ထီၣ်ဟးဂီၤအိၣ်စ့ၢ်ႉအ၀ဲသ့ၣ်ဟဲတ့ၢ်လီၤမ့ၣ်ပိၢ်အံၤတၢ်ဒုးကဲထီၣ်တအိၣ်ဘၣ်ႉ မ့မ့ၢ်ၦၤသ၀ီဖိဒုစံၣ်လၢၤလံႉ တၢ်ပၢၢ်ဆၢသုးဒုအသံဘၣ်ဒိဘၣ်ထံးအိၣ်လီၤ”အဂ့ၢ်န့ၣ် လီၢ်က၀ီၤကမျၢၢ် စီၤသူၤသူၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤ လါမ့ၤ ၈ သီအနံၤန့ၣ်လီၤႉ

ခီဖျိကဘီယူၤဟဲတ့ၢ်လီၤမ့ၣ်ပိၢ်အဃိတၢ်ပၢၢ်ဆၢသုးပာ်ဖှိၣ်အၦၤသုးဖိပိာ်မုၣ်တဂၤႇပိာ်ခွါတဂၤသံ၀ဲဒီး ဘၣ်ဒိဘၣ်ထံးကအိၣ်လၢ(၅)ဂၤညါအဂ့ၢ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲဘၣ်ဆၣ် မ့မ့ၢ်ပခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ခီန့ၣ် ပာ်ဂၢၢ်ပာ်ကျၢၤအီၤလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ

လၢ၀ီၢ်ရ့ၣ်ကီၢ်ဆၣ် ကစၢၢ်လီၢ်ခံ ယ့ဟီၣ်က၀ီၤအံၤမ့ၢ်၀ဲဒၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂၇)ဒီး သုးရ့ၣ်(၁၆)တၢ်ပၢဟီၣ်က၀ီၤဒီး တၢ်ဒုးကဲထီၣ်၀ဲဒီးပယီၤသုးအိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးဖဲလါမ့ၤ ၆ သီ ဟါခီအဆၢကတီၢ်စ့ၢ်ကီး ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ် (အုန်းခြံ၊ရေပူ၊ကော့စပ်)ခိၣ်ဃၢၤဒူသ၀ီတဖၣ်အပူၤအဃိ မ့ၣ်အူအီၣ်ဟးဂီၤ၀ဲကမျၢၢ်အဟံၣ်အဃီတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢ၀ီၢ်ရ့ၣ်ကီၢ်ဆၣ်အပူၤသုးမီၤစိရိၤအဒုးယၤကဘီယူၤဟဲဆှၣ်တၢ်အိၣ်၀ဲကိးမုၢ်နံၤဃၣ်ဃၣ်ညါဒီး ဖဲတနံၤအံၤလါမ့ၤ ၈ သီ ဂီၤခီ ၁၁ နၣ်ရံၣ်အဆၢကတီၢ်စ့ၢ်ကီး ခီဖျိကဘီယူၤဟဲတ့ၢ်လီၤကဒီးမ့ၣ်ပိၢ်ခံဘျီတဘျီလၢ(ဘဲလမုၣ်)သ၀ီကပၤအဃိ လီၢ်က၀ီၤကမျၢၢ်လၢအဃ့ၢ်ထီၣ်တဖၣ်အံၤဘၣ်သုးလီၢ်သုးကျဲလဲၤစံၣ်အိၣ်ကဒီးလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ