Home တၢ်ကစီၣ် ၁၇ ဘျီတဘျီ ခီကရဲး တၢ်ဃုထၢထီၣ် KNU ကရၢခိၣ်–၂ႇ နဲၣ်ရွဲၣ်ခိၣ်ကျၢၢ်(၃)ဂၤဒီးလီၢ်ခၢၣ်သးစံၣ်ညီၣ်ကွီၢ်ခိၣ်ကျၢၢ် ၀ံၤ၀ဲလံ

၁၇ ဘျီတဘျီ ခီကရဲး တၢ်ဃုထၢထီၣ် KNU ကရၢခိၣ်–၂ႇ နဲၣ်ရွဲၣ်ခိၣ်ကျၢၢ်(၃)ဂၤဒီးလီၢ်ခၢၣ်သးစံၣ်ညီၣ်ကွီၢ်ခိၣ်ကျၢၢ် ၀ံၤ၀ဲလံ

215
0

လါမ့ၤ ၄ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲလါမ့ၤ ၂ သီအနံၤ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၁၇ ဘျီတဘျီ လီၢ်ခၢၣ်သးခီကရဲးတၢ်ဃုထၢအပူၤ တၢ်ဃုထၢထီၣ်၀ဲပဒိၣ်စီၤကွဲၤထူ၀့လၢကရၢခိၣ်၀ံၤ ဖဲလါမ့ၤ ၃ သီအနံၤန့ၣ် တၢ်ဆဲးဃုထၢထီၣ်ကဒါ၀ဲခိၣ်နၢ်ဒိၣ်ထီ (၄)ဂၤလၢအမ့ၢ် ကရၢခိၣ်၂ႇ နဲၣ်ရွဲၣ်ခိၣ်ကျၢၢ်(၃)ဂၤဒီးလီၢ်ခၢၣ်သးစံၣ်ညီၣ်ကွီၢ်ခိၣ်ကျၢၢ် သ့ၣ်တဖၣ်အံၤလံန့ၣ်လီၤႉ

တၢ်ဃုထၢထီၣ်ခိၣ်နၢ်သီလၢဘျီ၀ဲအံၤအပူၤန့ၣ် ပဒိၣ်စီၤဆၢဂ့ၤကဲထီၣ်၀ဲကရၢခိၣ်–၂ ဒီး နဲၣ်ရွဲၣ်ခိၣ်ကျၢၢ်န့ၣ် ပဒိၣ်စီၤတၤဒိၣ်မူႇ နဲၣ်ရွဲၣ်ခိၣ်ကျၢၢ်သဃဲၤ–၁ ပဒိၣ်စီၤသီသံၣ်ဘွဲဒီး နဲၣ်ရွဲၣ်ခိၣ်ကျၢၢ်သဃဲၤ–၂ ပဒိၣ်စီၤလၣ်ထိ က့ၤန့ၢ်ကဒါ၀ဲအလီၢ်န့ၣ်လီၤႉ ဒ်န့ၣ်အသိးမ့မ့ၢ်လီၢ်ခၢၣ်သးစံၣ်ညီၣ်ကွီၢ်ခိၣ်ကျၢၢ်ခီန့ၣ် ပဒိၣ်နီၢ်မၠဲၤဖိ က့ၤန့ၢ်ကဒါအလီၢ်အံၤအဂ့ၢ်န့ၣ် ခ့ၣ်အဲၣ်ယူၣ်ၦၤဘၣ်မူဘၣ်ဒါတဂၤ ပာ်ဂၢၢ်ပာ်ကျၢၤစံး၀ဲအသိးသ့ၣ်ညါဘၣ်န့ၣ်လီၤႉ

ဒ်ခီကရဲးတၢ်ဃုထၢတၢ်ဖးအစၢထီၣ်အသိးန့ၣ် ကရၢခိၣ်–၂ ပဒိၣ်စီၤဆၢဂ့ၤ မၤနၢၤ၀ဲတၢ်ဖးအဖျၢၣ်(၈၀)ဒီး ပဒိၣ်စီၤတၤဒိၣ်မူမၤန့ၢ်၀ဲတၢ်ဖး(၉၆)ဖျၢၣ်ႇနဲၣ်ရွဲၣ်ခိၣ်ကျၢၢ်သဃဲၤ–၁ ပဒိၣ်စီၤသီသံၣ်ဘှဲ မၤန့ၢ်တၢ်ဖး(၉၁)ဖျၢၣ်ဒီး နဲၣ်ရွဲၣ်ခိၣ်ကျၢၢ်သဃဲၤ–၂ ပဒိၣ်စီၤလၣ်ထိ မၤန့ၢ်၀ဲတၢ်ဖး(၁၀၉)ဖျၢၣ်ဒီး လီၢ်ခၢၣ်သးစံၣ်ညီၣ်ကွီၢ်ခိၣ်ကျၢၢ် ပဒိၣ်နီၢ်မၠဲၤဖိ မၤန့ၢ်၀ဲတၢ်ဖး(၁၁၀)ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ

၁၇ ဘျီတဘျီ ခ့ၣ်အဲၣ်ယူၣ်ခီကရဲးအံၤဘၣ်တၢ်စးထီၣ်မၤအီၤဖဲအပူၤကွံာ်လါအ့ဖြ့ၣ် ၂၄ သီ လၢခ့ၣ်အဲၣ်ယူၣ်တၢ်ပၢ ဟီၣ်က၀ီၤတၢ်လီၢ်တတီၤဒီး ကီၢ်ရ့ၣ်ႇသုးက့(၇)ဘ့ၣ်လၢာ်ခၢၣ်စးဟဲထီၣ်၀ဲအဂၤ(၂၀၀)ဃၣ်ဃၣ်န့ၣ်လီၤႉ ခၢၣ်စးလၢအဟဲထီၣ်တၢ်ဃုထၢတဖၣ်အကျါန့ၣ်နုာ်လီၤဒိးဃုထၢသးအိၣ်၀ဲ(၅၆)ဂၤ၀ံၤတၢ်ဃုထၢထီၣ်ခိၣ်နၢ်သီတဖၣ်အံၤလၢတၢ်ခူၣ်သူၣ်တၢ်ဖးသနူဘၣ်ဆၣ်ခိၣ်နၢ်တၢ်ဆီတလဲတအိၣ်၀ဲဘၣ်အဂ့ၢ်န့ၣ် တၢ်ပဲာ်ထံနီၤဖးစံး၀ဲန့ၣ်လီၤႉ

ခ့ၣ်အဲၣ်ယူၣ် ခီကရဲးဘျီ၀ဲအံၤအပူၤန့ၣ် ကီၢ်ရ့ၣ်ႇသုးက့(၇)ဘ့ၣ်လၢာ်အခၢၣ်စးဟဲထီၣ်၀ဲဒီး မ့မ့ၢ်တီအူကီၢ်ရ့ၣ် (သုးက့ ၂)ဒီး မုၢ်တြီၢ်ကီၢ်ရ့ၣ်(သုးက့ ၅)ခၢၣ်စးဟဲထီၣ်ပၣ်ဃုာ်ပၣ်ဂီၢ်၀ဲဘၣ်ဆၣ်တနုာ်လီၤဟ့ၣ်တၢ်ဖးႇတနုာ်လီၤဒိးဃုထၢသး ဘၣ်န့ၣ်လီၤႉ ဒ်န့ၣ်အသိးဘၣ်ဃးခီကရဲးဘျီ၀ဲအံၤ ခ့ၣ်အဲၣ်ယူၣ်(သုးက့ ၅)ကွဲးဆှၢထီၣ်လံာ်ဆူခီကရဲးအအိၣ်ဒံး အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကီၢ်ရ့ၣ်ႇသုးက့(၇)ဘ့ၣ်အကျါကီၢ်ရ့ၣ်သုးက့(၂)ဘ့ၣ်အခၢၣ်စးတနုာ်ဒိးဃုထၢသးႇတနုာ်လီၤဟ့ၣ်တၢ်ဖးဘၣ်ဘၣ်ဆၣ် ကီၢ်ရ့ၣ်ခၢၣ်စးလၢအဂၤသ့ၣ်တဖၣ်အံၤဟဲထီၣ်၀ဲခီကရဲးအဃိ ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအသိး ၦၤဟဲထီၣ်တၢ်ဃုအိၣ်(၇၅)မျးကယၤညါအဃိတၢ်မၤ၀ဲတၢ်ဃုထၢအံၤန့ၣ်လီၤႉ

တၢ်မၤ၀ဲ(၁၇)ဘျီတဘျီခီကရဲးအပူၤအံၤ ခ့ၣ်အဲၣ်ယူၣ်ကရၢခိၣ် သုးခိၣ်ကျၢၢ်ဒိၣ်စိ စီၤမူၤတူစ့ဖိ တနုာ်လီၤဒိးဃုထၢသးလၢၤဘၣ်အသိး ခီကရဲးအပူၤတၢ်ဆၢတဲာ်လီၤ၀ဲလၢ (ကရၢခိၣ်)ဒီး(ကီၢ်ရ့ၣ်ခိၣ်)လီၢ်လၤ သ့ၣ်တဖၣ်အံၤ တၢ်မၤအီၤန့ၢ်ထဲခံဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

အပူၤကွံာ်(၁၆)ဘျီတဘျီ ခ့ၣ်အဲၣ်ယူၣ်ခီကရဲးအံၤဘၣ်တၢ်မၤတ့ၢ်အီၤဖဲ(၂၀၁၇)နံၣ် လါအ့ဖြ့ၣ်အခါဒီး ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအသိး လီၢ်ခၢၣ်သးႇကီၢ်ရ့ၣ်ဒီးကီၢ်ဆၣ်အပတီၢ်န့ၣ််ကဘၣ်မၤ၀ဲခီကရဲး(၄)နံၣ် တဘျီဘၣ်ဆၣ် ခီဖျိခိ၀ံၣ်တၢ်အိၣ်သးဒီးကီၢ်ပယီၤသုးဟံးန့ၢ်တၢ်စိတၢ်ကမီၤတၢ်အိၣ်သးတဖၣ်အဃိ တၢ်သုးကွံာ်၀ဲခီကရဲးအံၤ(၂)နံၣ်ဒီးန့ၢ်(၆)နံၣ်မးတၢ်က့ၤမၤကဒါ၀ဲတၢ်ဃုထၢအံၤန့ၣ်လီၤႉ