Home Hotnews တၢ်ပၢၢ်ဆၢသုးပာ်ဖှိၣ်လဲၤတ့ၢ်လီၤဒြိမ့ၣ်ပိၢ်အဃိ ပယီၤသုးသံ(၃)ဂၤအဂ့ၢ်န့ၣ် KRF ထုးထီၣ်ပာ်ဖျါ

တၢ်ပၢၢ်ဆၢသုးပာ်ဖှိၣ်လဲၤတ့ၢ်လီၤဒြိမ့ၣ်ပိၢ်အဃိ ပယီၤသုးသံ(၃)ဂၤအဂ့ၢ်န့ၣ် KRF ထုးထီၣ်ပာ်ဖျါ

209
0
Photo-KRC

လါယူၤ ၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတလၢၤကီၢ်စဲၣ် ကၠဲၣ်ထိၤကီၢ်ဆၣ်အပူၤ ဖဲလါယူၤ ၁ သီ မုၢ်ထူၣ် ၁၂း၃၀ ဃၣ်ဃၣ်အဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်လဲၤတ့ၢ်လီၤဒြိမ့ၣ်ပိၢ်လၢမိၣ်ပလ့ၤကျဲဖးဒ့တြဲၤကပၤ ပယီၤသုးအိၣ်အလီၢ်အံၤအဃိ ပယီၤသုးသံ ၃ ဂၤ အဂ့ၢ်န့ၣ် ကၠဲၣ်ထိၤတၢ်ပၢၢ်ဆၢသုး(KRF)ထုးထီၣ်ပာ်ဖျါ၀ဲန့ၣ်လီၤႉ

တၢ်လဲၤတ့ၢ်လီၤဒြိမ့ၣ်ပိၢ်ဘျီ၀ဲအံၤမ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ(Nighthawks)ဒြိသုးကရူၢ်ႇ ကၠဲၣ်ထိၤတၢ်ပၢၢ်ဆၢကရူၢ်(KRF)သုးပာ်ဖှိၣ်သ့ၣ်တဖၣ်အံၤဒီး လဲၤတ့ၢ်လီၤ၀ဲဒြိ(၆၀ မမ)မ့ၣ်ပိၢ်ခံဖျၢၣ်ဒီး (၄၀ မမ)မ့ၣ်ပိၢ် သ့ၣ် တဖၣ်အဂ့ၢ်န့ၣ် (KRF)ၦၤသုးဖိတဂၤစံး၀ဲန့ၣ်လီၤႉ

အ၀ဲစံး၀ဲလၢ“မ့မ့ၢ်အ၀ဲသၢဂၤန့ၣ်ဒုသံတဘျီဃီလီၤႉမ့မ့ၢ်လၢအဂၤတဖၣ်န့ၣ်မ့ၢ်အဘၣ်ဒိၦဲၤဂၤလဲၣ်ဒုပတသ့ၣ်ညါလီၤတံၢ်ဒံးဘၣ်ႉပသ့ၣ်ညါလၢအ၀ဲသ့ၣ်ဘၣ်ဒိဘၣ်ထံးအါမီၤနီၤႉပလဲၤခးအ၀ဲသ့ၣ်ခဲအံၤန့ၣ်တမ့ၢ်လၢတၢ်သမံသမိးတြဲၤ(ဂိတ်)ဘၣ်ႉပလဲၤခးလၢတြဲၤကပၤတၢ်လီၢ်လၢအ၀ဲသ့ၣ်အိၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

တၢ်ကဲထီၣ်သး၀ံၤလီၢ်ခံခီဖျိပယီၤသုးတြိၤ(၄၄)စုတီၤဖီလာ် ဘဲၣ်ကါပယီၤသုးခီၣ်သုးရ့ၣ်(ခလရ–၂)သုးကလၢၤ ခးလီၤကဒါကျိဖးဒိၣ်အဃိ ကမျၢၢ်ဘၣ်ဒိ၀ဲနးနးကျံၤကျံၤ ၆ ဂၤအဂ့ၢ်န့ၣ် KRF ထုးထီၣ်ပာ်ဖျါ၀ဲန့ၣ်လီၤႉ

ဘၣ်ဃးတၢ်ဂ့ၢ်ကဲထီၣ်သးဘျီ၀ဲအံၤတၢ်ပၢၢ်ဆၢသုးပာ်ဖှိၣ်ထုးထီၣ်ပာ်ဖျါ၀ဲလၢပယီၤသုးတကပၤသံဘၣ်ဒိဘၣ်ထံးအါမး ဘၣ်ဆၣ်မ့မ့ၢ်ပယီၤသုးတကပၤခီန့ၣ်ထုးထီၣ်ပာ်ဖျါ၀ဲတၢ်ကစီၣ်တအိၣ်နီတမံၤဘၣ်န့ၣ်လီၤႉ
ဒ်န့ၣ်အသိးလၢတလၢၤကီၢ်စဲၣ် ကၠဲၣ်ထိၤကီၢ်ဆၣ် ဒူသ၀ီတဖၣ်အပူၤန့ၣ် ခီဖျိပယီၤသုးခးလီၤကျိဖးဒိၣ်တလီၢ်လီၢ်အဃိ ကမျၢၢ်အဟံၣ်အဃီႇတၢ်ဖံးအီၣ်မၤအီၣ်လီၢ်ကျဲဟးဂူာ်ဟးဂီၤ၀ဲအါမးဒီးတၢ်သံတၢ်ဘၣ်ဒိဘၣ်ထံးစ့ၢ်ကီးဟဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် KRF လံာ်တၢ်ပာ်ဖျါအပူၤ စံး၀ဲန့ၣ်လီၤႉ