တလါအတီၢ်ပူၤတၢ်နု၁်လီၤခးကၠီၣ်လိကၠံပယီၤသုးကလၢၤ(၃)ဘျီ ပယီၤသုးသံကအိၣ်အဂၤ(၁၀)ဃၣ်ဃၣ်

လါယူၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂) တီအူကီၢ်ရ့ၣ် လ့ၣ်သိၤလီၢ်က၀ီၤဟီၣ်က၀ီၤအပူၤ တလါအံၤလါယူၤအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲ ကၠီၣ်လိကၠံပယီၤသုးကလၢၤ (၃)ဘျီအဂ့ၢ်န့ၣ် (သုးက့ ၂) သုးရ့ၣ် ၅ ထုးထီၣ်ပာ်ဖျါ၀ဲဖဲလါယူၤ ၂၂ သီအနံၤန့ၣ်လီၤႉ

ဖဲအပူၤကွံာ်လါယူၤ ၄ သီႇ ၁၂ သီ ဒီး ၂၀ သီအနံၤန့ၣ် KNLA(သုးက့ ၂)ႇ (သုးက့ ၅)သုးပာ်ဖှိၣ်တဖၣ် နုာ်လီၤခး၀ဲ ပယီၤသုးကလၢၤအံၤအဃိ ပယီၤသုးသံကအိၣ်လၢအဂၤ(၁၀)ဃၣ်ဃၣ်ညါဒီးဘၣ်ဒိ၀ဲနးနးကျံၤကျံၤ (၃)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါဖဲတၢ်ဒုးကဲထီၣ်အတီၢ်ပူၤ(၇)မဲၤပယီၤသုးကလၢၤႇထိဘိၤကၠံပယီၤသုးကလၢၤႇလ့ၣ်သိၤ၀့ၢ် နီၣ်ဂံၢ်(၆၀၃) ပယီၤသုးကလၢၤသ့ၣ်တဖၣ်အံၤခးလီၤစၢၤကျိဖးဒိၣ်အသိး ဖဲလါယူၤ ၂၁ သီအနံၤ စ့ၢ်ကီး ခီဖျိကၠီၣ်လိကၠံပယီၤသုးကလၢၤ ခးလီၤကဒီးကျိဖးဒိၣ်ဆူယွၤသ့ၣ်ႇကိပ့ၤသ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲ အဂ့ၢ်န့ၣ် လံာ်တၢ်ပာ်ဖျါပူၤ စံး၀ဲန့ၣ်လီၤႉ

“ကၠီၣ်လိကၠံန့ၣ်အိၣ်ဘူးလိာ်သးဒီးသၤမိတီၤသ၀ီမီၤနီၤႉလၢသၣ်မိတီၣ်န့ၣ်နါက့တၢ်ဒုးကဲထီၣ်အဃိၦၤစံၣ်တၢ်ဒုးခဲလၢာ်လီၤႉတၢ်ဒုးကဲထီၣ်မၢ်မၢ်လီၤႉလၢပအိၣ်တကပၤအံၤၦၤမ့နၢ်ဟူလၢပယီၤသုးခးလီၤကျိလံန့ၣ် ၦၤစံၣ်နုာ်လီၤအိၣ်ခူသူၣ်လၢတၢ်ပူၤ” အဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲန့ၣ်လီၤႉ

ဖဲအပူၤကွံာ်(၂၀၂၂)လါယနူၤအါရံၤအခါစ့ၢ်ကီးခီဖျိတၢ်ပၢၢ်ဆၢသုးကရူၢ်ထုးပယီၤသုးကလၢၤတဖျၢၣ်အံၤ အၦၤသုးဖိလၢမ့ၣ်ပိၢ်အဃိ ပယီၤသုးသံဒံး(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ် န့ၣ်လီၤႉ

ဒ်န့ၣ်အသိးဖဲတနံၣ်အံၤ(၂၀၂၃)လါမးရှး ၂၇ သီအခါစ့ၢ်ကီး တၢ်ပၢၢ်ဆၢသုးပာ်ဖှိၣ်လဲၤခး၀ဲထိဘိၤကၠံႇကၠီၣ်လိကၠံႇ သၤမိတီၤဒီး (ဗဟုန်း)ပယီၤသုးကလၢၤသ့ၣ်တဖၣ်အံၤလၢကျိဖးဒိၣ်ကျိဖိတဘျီဃီအသိး ကလံၤထံးကီၢ်ခီသုး၀ဲၤလီၢ်ခိၣ်သ့ၣ်ပယီၤသုးခးလီၤကျိဖးဒိၣ်(၄)ဖျၢၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ် စံး၀ဲန့ၣ် လီၤႉ

တၢ်နု၁်လီၤခးပယီၤသုးကလၢၤဘျီ၀ဲအံၤအခါခီဖျိပယီၤသုးကဘီယူၤဟဲခးလီၤကဒါတၢ်လၢ(ဗဟုန်း)ႇထိဘိၤကၠံသ၀ီသ့ၣ်တဖၣ်အပူၤအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်ဒံး၀ဲဒၣ်န့ၣ်လီၤႉ