ချၢၣ်လွံၢ်ထူၣ်ကီၢ်ရ့ၣ် ကမျၢၢ်ၦၤဃ့ၢ်မှံဟးဖျိးဘၣ်၀ဲဒၣ်တၢ်ညၣ်ဂိၢ်တၢ်ဆါႇတိးကွ့တၢ်ဆါအါမးဒီး လိၣ်ဘၣ်၀ဲကသံၣ်ကသီ

လါယူၤလံ ၅ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ တၢ်စူၤခါအတီၢ်ပူၤအံၤကမျၢၢ်ၦၤဃ့ၢ်မှံဟးဖျိးတဖၣ်ဘၣ်၀ဲဒၣ်တၢ်ညၣ်ဂိၢ်တၢ်ဆါဒီးတိကွ့တၢ်ဆါဟဲအါထီၣ်အဃိ လိၣ်ဘၣ်၀ဲကသံၣ်ကသီအဂ့ၢ်န့ၣ် ၦၤမၤစၢၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

တၢ်စူၤခါအတီၢ်ပူၤခီဖျိလီၢ်က၀ီၤကမျၢၢ်တဖၣ်ဘၣ်စံၣ်မှံဟးဖျိးဒံး၀ဲအဃိလီၤဆီဒၣ်တၢ်ၦၤဖိဒံဖိသၣ်တဖၣ်ဘၣ်၀ဲဒၣ်တိးကွ့တၢ်ဆါအါမးန့ၣ်လီၤႉခီဖျိပယီၤသုးတပျဲၦၤစိာ်ထီၣ်စိာ်လီၤကသံၣ်ကသီဒီးၦၤဃ့ၢ်မှံဟးဖျိးအနီၣ်ဂံၢ်စ့ၢ်ကီးအါထီၣ်အဃိ လိၣ်ဘၣ်၀ဲကသံၣ်ကသီသ့ၣ်တဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“မ့မ့ၢ်ကသံၣ်ကသီန့ၣ်လ့ၤတက့ၤပယီၤသုးတပျဲစိာ်၀ဲဘၣ်ႉပဘၣ်ဟးစိာ်ခူသူၣ်လၢပကစၢ်တၢ်ရဲၣ်တၢ်ကျဲၤဒ်န့ၣ်လီၤအဃိကသံၣ်ကသီဒုတလၢဘၣ်ႉလီၢ်ခံအံၤတၢ်စူၤမ့အါထီၣ်န့ၣ်ၦၤကဆူးကဆါအါန့ၢ်အ၀ဲအံၤဒံးမီၤနီၤႉ ၦၤမၤဘူၣ်ကစၢ်တဖၣ်နါက့ခဲအံၤမ့မ့ၢ်ကသံၣ်ကသီန့ၣ်စိာ်၀ဲတဘူၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

လၢန့ၣ်အမဲာ်ညါခီဖျိဟီၣ်က၀ီၤပူၤတၢ်အိၣ်သးတဂ့ၤဘၣ်အဃိကမျၢၢ်တဖၣ်ဖဲအ၀ဲသ့ၣ်ဘၣ်တိးကွ့အခါန့ၣ် လဲၤပၠးသးလၢတၢ်ဆါဟံၣ်ကသံၣ်ဒၢးအိၣ်စှၤ၀ဲအသိးအါဒၣ်တက့ၢ်ကူစါယါဘျါအသးလၢန့ဆၢၣ်ကသံၣ်ဖီၣ်ဒ်န့ၣ်လီၤအဃိတနီၤန့ၣ်တၢ်ဆါနးဒိၣ်ထီၣ်အိၣ်စ့ၢ်ကီး၀ဲအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲန့ၣ်လီၤႉ

အ၀ဲစံး၀ဲလၢ“မ့ကဲထီၣ်သးလၢအိၣ်တဆူၣ်အိၣ်တချ့ဘၣ်လံန့ၣ်ၦၤဃ့ၢ်တၢ်ဒုးဖိတဖၣ်အံၤအါဒၣ်တက့ၢ်ကူစါယါဘျါ၀ဲလၢ န့ဆၢၣ်ကသံၣ်ဖီၣ်ဒ်န့ၣ်လီၤႉမ့နးဒိၣ်ထီၣ်မးအ၀ဲသ့ၣ်လဲၤပၠး၀ဲလၢတၢ်ဆါဟံၣ်ႇကသံၣ်ဒၢးလီၣ်မီၤနီၤႉဖဲအံၤန့ၣ်ၦၤၦ့ၤအီ၀ဲ(ပန်ကာ)ကသံၣ်မီၤနီၤႉယဲၢ်ပီၢ်န့ၣ်န့ၢ်၀ဲသၢဘိၣ်ႇအ၀ဲသ့ၣ်ၦ့ၤအီကသံၣ်တခါအံၤမ့တကိၢ်ညၢ်ဘၣ်မးအ၀ဲသ့ၣ်လဲၤပၠးသးလၢတၢ်ဆါဟံၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤလၢကသံၣ်တၢ်ကူစါယါဘျါသးတကပၤအဂီၢ်န့ၣ်ကညီဆူၣ်ချ့တၢ်ကရၢကရိဒီး မုာ်သးမၤကလီ(ပရဟိတ)တၢ်ကရၢကရိလၢအဂၤသ့ၣ်တဖၣ်စ့ၢ်ကီးဟဲဆီၣ်ထွဲမၤစၢၤ၀ဲကသံၣ်ကသီအိၣ်ဘၣ်ဆၣ် ခီဖျိဟီၣ်က၀ီၤပူၤတၢ်သဘံၣ်သဘုၣ်အိၣ်ဒံးအဃိၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒီးလိၣ်ဘၣ်ဒံး၀ဲကသံၣ်ကသီႇ တၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲသ့ၣ်တဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါယူၤလံ ၂ သီ ဒီး ၃ သီအခါစ့ၢ်ကီး လၢမူကီၢ်ဆၣ်အပူၤ ခီဖျိပယီၤသုးခးတပျုာ်တပျီာ် ကျိဖးဒိၣ်ကျိဖိအဃိ(ရေတွင်းကုန်းကြီး)သ၀ီဒီး(အုန်းပင်စု)သ၀ီဖိပိာ်ခွါဘၣ်ဒိဒံး၀ဲ ၃ ဂၤအသိး ကမျၢၢ်(၁၄၀၀)ဘျဲၣ် ဘၣ်ဃ့ၢ်ထီၣ်ဒံး၀ဲဒၣ်န့ၣ်လီၤႉ

စးထီၣ်လၢသုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၃)လါမ့ၤန့ၣ် လၢချၢၣ်လွံၢ်ထူၣ်ကီၢ်ရ့ၣ်အပူၤ ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၁)ကလီၢ်ဘျဲၣ်လံအဂ့ၢ်န့ၣ် ကညီဂံၢ်ခီၣ်ထံးတၢ်ကရၢကရိအတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ