Home တၢ်ကစီၣ် တၢ်စံၣ်ညီၣ်လီၤကညီသးစၢ်စးသ့စီၣ်မ့လၢဘၣ်လီၤဃိာ်ပူၤ(၁၀)နံၣ်

တၢ်စံၣ်ညီၣ်လီၤကညီသးစၢ်စးသ့စီၣ်မ့လၢဘၣ်လီၤဃိာ်ပူၤ(၁၀)နံၣ်

207
0
Photo: Crd.

လါယူၤလံ ၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢအ့ၣ်ယၣ်၀တံၣ်ကီၢ်ခီဒိၣ် အ့ၤမဲကီၢ်ဆၣ်အပူၤ ပယီၤသုးဖီၣ်၀ဲကညီလံာ်လဲၢ်တၢ်ဆဲးတၢ်လၤကမံးဖိ ကညီသးစၢ်စးသ့စီၣ်မ့ ကအိၣ်လၢ(၆)လါဃၣ်ဃၣ်၀ံၤလီၢ်ခံ ဖဲလါယူၤလံ ၅ သီအနံၤန့ၣ် တၢ်စံၣ်ညီၣ်လီၤစးသ့စီၣ်မ့လၢ ကဘၣ်လီၤဃိာ်ပူၤ(၁၀)နံၣ်အဂ့ၢ်န့ၣ် ၦၤလၢအသ့ၣ်ညါလိာ်သးဒီးစးသ့စီၣ်မ့အံၤ တဖၣ် ပာ်ဂၢၢ်ပာ်ကျၢၤစံး၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၂၀ သီအခါန့ၣ် ပယီၤသုးလဲၤဖီၣ်၀ဲစးသ့စီၣ်မ့လၢအဟံၣ်၀ံၤ စွဲတရါ၀ဲလၢ တၢ်ဘျၢသဲစးအဆၢဖိ(၅၀ က)ႇ(၅၂ က)သ့ၣ်တဖၣ်အံၤအဃိ တၢ်စံၣ်ညီၣ်လီၤအီၤလၢမၠီမၠးဃိာ်(ကွီၢ်ဘျီၣ်)အံၤလၢ ကဘၣ်လီၤဃိာ်ပူၤ(၁၀)နံၣ်အဂ့ၢ်န့ၣ် ကညီသးစၢ်လၢအသ့ၣ်ညါလိာ်သးဒီးစးသ့စီၣ်မ့တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ၦၤစံၣ်ညီၣ်လီၤအ၀ဲသ့ၣ်လၢမၠီမၠးဃိာ်(ကွီၢ်ဘျီၣ်)န့ၣ်မီၤနီၤႇစံၣ်ညီၣ်လီၤ၀ဲလၢကဘၣ်လီၤဃိာ်ပူၤအနံၣ်(၁၀)ႉအစံၣ်ညီၣ်လီၤစးသ့စီၣ်မ့အံၤတၢ်အုၣ်သးမနုၤမးတအိၣ်ဘၣ်ႉတၢ်စံၣ်ညီၣ်အံၤတမ့ၢ်တၢ်စံၣ်ညီလၢအအိၣ်ဒီးတၢ်တီတၢ် တြၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တချုးလၢတၢ်ဖီၣ်ဒီးစံၣ်ညီၣ်လီၤစးသ့စီၣ်မ့ဒံးဘၣ်အခါဖဲအပူၤကွံာ်လါယနူၤအါရံၤအခါန့ၣ်တၢ်လဲၤဖီၣ်အီၤကဲထီၣ်သးခံဘျီဒံးဒီး တချုးတၢ်လဲၤဖီၣ်အီၤဖဲလီၢ်ခံကတၢၢ်တဘျီအံၤဒံးဘၣ်အခါဖဲလါယနူၤအါရံၤ ၁၃ သီအနံၤ တၢ်မၤလံာ်လဲၢ်တၢ်ဆဲးတၢ်လၤတၢ်အိၣ်ဖှိၣ်ဖဲ(အိမ်မဲ)အခါအဆိကတၢၢ်တဘျီပယီၤလဲၤဖီၣ်အီၤလၢကသံသမိး၀ဲမ့ၢ်အကဲတၢ်ဒီသဒၢကမျၢၢ်သုး(PDF)မ့ၢ်ဧါႇတမ့ၢ်ဧါဒီးဖဲန့ၣ်၀ံၤတၢ်လဲၤအုၣ်ခီၣ်ပျၢ်လီၤက့ၤအီၤန့ၣ်လီၤႉ

ကညီသးစၢ်စးသ့စီၣ်မ့အံၤအိၣ်၀ဲဒၣ်လၢ(အ့ၤမဲကီၢ်ဆၣ်)ပူၤအမၤတၢ်လၢကညီလံာ်လဲၢ်တၢ်ဆဲးတၢ်လၤကဂုၤထီၣ်ကသီထီၣ်အဂီၢ်ဒီးတကးဒံးဘၣ်အ၀ဲသိၣ်လိ၀ဲကညီသးစၢ်သ့ၣ်တဖၣ်လၢခီၣ်ဖၠူထၢၣ်ႇလံာ်ကီၤလၤ၀ါႇလံာ်လဲၢ်တၢ်ဆဲးတၢ်လၤသ့ၣ်တဖၣ်အသိးဒ်ပယီၤသုးလိာ်ဘၢလိာ်ကွီၢ်အီၤလၢအမ့ၢ်(PDF)န့ၣ်တမ့ၢ်၀ဲဘၣ်ဒီးတၢ်စံၣ်ညီၣ်လီၤ၀ဲဒ်အံၤဘၣ်သးတမုာ်ဘၣ်အဂ့ၢ်န့ၣ် ကညီသးစၢ်လၢအသ့ၣ်ညါလိာ်သးဒီးအီၤလၢအဂၤတဂၤစ့ၢ်ကီး စံး၀ဲန့ၣ်လီၤႉ

အ၀ဲစံး၀ဲလၢ“အ၀ဲန့ၣ်အမၤတၢ်လၢကညီကလုာ်အဂီၢ်လီၤႉအတမ့ၢ်(PDF)ဘၣ်ႉပသ့ၣ်ညါမူၤမူၤနီၢ်နီၢ်လီၤႉတၢ်စံၣ်ညီၣ်လီၤအ၀ဲဒ်အံၤဘၣ်ပသးတမုာ်ဘၣ်ႉဒ်လဲၣ်ဂ့ၤဒ်လဲၣ်ဂ့ၤပဃ့ဘါထုကဖၣ်လၢအ၀ဲကဟဲက့ၤထူၣ်ဖျဲးထီၣ်ပၣ်ဃုာ်လၢတၢ်ပျၢ်ဖျဲးတၢ်ကမၣ်အကျါစ့ၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်(၂၀၂၀)လါအီကူး ၁၂ သီအခါန့ၣ် ကညီသးစၢ်စးသ့စီၣ်မ့တီခိၣ််ရိၣ်မဲမၤ၀ဲ နံၣ်(၇၀)ၦဲၤထီၣ် ကညီမၤထူရၤမုၢ်နံၤ မူးတၢ်ရဲၣ်တၢ်ကျဲၤအံၤလၢ၀့ၢ်တကူၣ်အဃိ ကၠီၣ်တတါကီၢ်ဆၣ် ပၢၤကီၢ်ဖီၣ်အီၤဃုာ်ဒီးကညီသးစၢ် စီၤဆၣ်ကွၢ်လၢ်ကဲထီၣ်တ့ၢ်အသးဒံးန့ၣ်လီၤႉ