တၢ်ဒုးကဲထီၣ်လၢဃုလါအတီၢ်ပူၤ ပယီၤသုးသံ(၂၀၀၀)ဘျဲၣ်အဂ့ၢ် ခ့ၣ်အဲၣ်ယူၣ် ထုးထီၣ်ပ၁်ဖျါ

လါယူၤလံ ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ တနံၣ်အံၤ(၂၀၂၃) လါယနူၤအါရံၤ ၁ သီ တုၤလၢ လါယူၤ ၃၀ သီ လၢဃုလါအတီၢ်ပူၤ တၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်ကရူၢ် အဘၢၣ်စၢၤအပူၤန့ၣ် ပယီၤသုးတကပၤသံ၀ဲခဲလၢာ်(၂၆၃၂)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါယူၤလံ ၉ သီ အနံၤန့ၣ်လီၤႉ

ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဃုာ်ဒီးအ၀ဲသ့ၣ်စုတီၤဖီလာ် တၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤ လၢ(၆)လါအတီၢ်ပူၤန့ၣ် တၢ်ဒုးကဲထီၣ်၀ဲခဲလၢာ်အဘျီ(၂၄၀၀)ဘျဲၣ်ဒီး ပယီၤသုးသံအဂၤ(၂၀၀၀)အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤ စံး၀ဲန့ၣ်လီၤႉ

လၢန့ၣ်အမဲာ်ညါပယီၤသုးသံတဖၣ်အကျါပၣ်ဃုာ်၀ဲသုးရ့ၣ်ခိၣ်(၅)ဂၤႇသုးရ့ၣ်ခိၣ်–၂ (၅)ဂၤႇ သုးခိၣ်အပတီၢ်(၁၃)ဂၤႇ သုးခိၣ်ယီၤ(၅)ဂၤဒီး ၦၤဘၣ်ဒိ(၁၆၀၀)ဘျဲၣ်အကျါပၣ်ဃုာ်၀ဲ သုးရ့ၣ်ခိၣ်(၂) တဂၤအသိး (ခ့ၣ်အဲၣ်ယူၣ်)မၤဟးဂီၤကွံာ်၀ဲပယီၤသုးအသိလ့ၣ်လၢအသူ၀ဲလၢဒုးယၤပူၤအံၤကအိၣ်လၢအခိၣ်တကယၤဃၣ်ဃၣ်ညါ အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ

ဒ်န့ၣ်အသိးခံခီခံကပၤတၢ်ဒုးအပူၤမ့မ့ၢ်(KNLA)ႇ(KNDO)ဒီးအ၀ဲသ့ၣ်စုတီၤဖီလာ်တၢ်ပၢၢ်ဆၢသုးကရူၢ်တကပၤခီန့ၣ် ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်ဂီၢ်အဂၤ(၇၀)ဘျဲၣ်ဒီးဘၣ်ဒိ၀ဲ(၂၅၀)ဂၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ စးထီၣ်ဖဲအပူၤကွံာ်လါယူၤန့ၣ် တၢ်ဒုးဆူၣ်ထီၣ်ကဒါအဃိလီၢ်က၀ီၤကမျၢၢ်တဖၣ်ဘၣ်သုးလီၢ်သုးကျဲဘၣ်ဃ့ၢ်မှံဟးဖျိး၀ဲဒီးဖဲန့ၣ်အကျါၦၤဖိဒံဖိသၣ်လၢအဃ့ၢ်တၢ်ဒုးသ့ၣ်တဖၣ်အံၤစ့ၢ်ကီးဘၣ်၀ဲဒၣ်တၢ်ညၣ်ဂိၢ်တိးကွ့တၢ်ဆါဟဲအါထီၣ်အဃိလိၣ်ဘၣ်၀ဲကသံၣ်ကသီဒီးဆူၣ်ချ့တၢ်အံးထွဲကွၢ်ထွဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ဘၣ်ဃးခံခီခံကပၤတၢ်ဒုးကဲထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤတၢ်သံတၢ်ဘၣ်ဒိဘၣ်ထံးတၢ်အိၣ်သးန့ၣ် (ခ့ၣ်အဲၣ်ယူၣ်)တကပၤပာ်ဖျါထီၣ်၀ဲတဆံယဲၢ်သီတဘျီႇတလါတဘျီကိးတလါဒဲးဘၣ်ဆၣ်မ့မ့ၢ်သုးမီၤစိရိၤတကပၤ ခီန့ၣ်ထုးထီၣ်ပာ်ဖျါ၀ဲတအိၣ်နီတမံၤဘၣ်န့ၣ်လီၤႉ