တၢ်နု၁်လီၤခးမၠၣ်၀တံၣ်တၢ်ကူၣ်လဲၤမၤကၤလီၢ်(ကုန်သွယ်ရေးဇုန်)၀ံၤလီၢ်ခံတၢ်သမံသမိးတြဲၤဟဲအါထီၣ်

လါယူၤလံ ၄ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲအပူၤကွံာ်လါမးရှး ၂၅ သီအခါန့ၣ် တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲမၠၣ်၀တံၣ်၀့ၢ်ကပၤ တၢ်ကူၣ်လဲၤမၤကၤလီၢ် (ကုန်သွယ်ရေးဇုန်)ဒီး တၢ်ကဲထီၣ်သးဖဲန့ၣ်၀ံၤလီၢ်ခံတၢ်သမံသမိးတြဲၤလီၢ်ဟဲအါထီၣ်၀ဲ အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ

အပူၤကွံာ်လၢညါဖဲတၢ်ကူၣ်လဲၤမၤကၤလီၢ်(ကုန်သွယ်ရေးဇုန်)ဒီးအ့ရှါကစၢၢၢ်ကျဲဒီတကျိၤန့ၣ် တၢ်သမံသမိးတြဲၤလီၢ် အိၣ်ထဲ(၄)ခါဧိၤလီၤဒီး ဖဲတၢ်နုာ်လီၤခးတၢ်သမံသမိးတြဲၤတၢ်လီၢ်သ့ၣ်တဖၣ်အံၤ၀ံၤလီၢ်ခံ ပယီၤသုးဒီးသုးခိးကီၢ်ဆၢ (BGF) ပာ်ဖှိၣ်ထီၣ်သးမၤအါထီၣ်၀ဲတၢ်သမံသမိးတြဲၤလီၢ်(၉)ခါညါအဂ့ၢ်န့ၣ် ၦၤနီသိလ့ၣ်ဖိတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ၦၤနုာ်လီၤခး(ကုန်သွယ်ရေးဇုန်)၀ံၤလီၢ်ခံန့ၣ်တၢ်လီၢ်ဖဲန့ၣ်ၦၤတအိၣ်လၢၤဘၣ်ႉခဲအံၤအ၀ဲသ့ၣ်မၤအါထီၣ်အသုးဂံၢ်ဘါမီၤနီၤႉတၢ်သမံသမိးတြဲၤနါက့အါထီၣ်ႉပၢၤကီၢ်သုးအိၣ်ႇပယီၤသုးအိၣ်ႇ(BGF)နါက့အိၣ် အိၣ်ခဲလၢာ်လီၤႉ လၢညါခါန့ၣ်တၢ်သမံသမိးတြဲၤလီၢ်အိၣ်ထဲ(၄)ခါလီၤႉခဲအံၤအိၣ်(၉)ခါလံႉလၢတၢ်သမံသမိးတြဲၤအချၢန့ၣ်အ၀ဲသ့ၣ်ဆၢထၢၣ်အိၣ်ခိးသမံသမိးတၢ်(၅)ဂၤညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

လၢန့ၣ်အမဲာ်ညါလၢမၠၣ်၀တံၣ်ႇသ့ၣ်ကါညံၣ်နီၣ်ဒီးကြုၢ်တု၀့ၢ်ကျဲဒီတကျိၤန့ၣ်စ့ၢ်ကီး ပယီၤသုးဒီး(BGF)အိၣ်ခိး သမံသမိးဃ့အီၣ်စ့လၢကမျၢၢ်လ့ၢ်ထီၣ်လ့ၢ်လိၤတဖၣ်အအိၣ်အဂ့ၢ်န့ၣ် မၠၣ်၀တံၣ်ကမျၢၢ်တဂၤ စံး၀ဲန့ၣ်လီၤႉ

အ၀ဲစံး၀ဲလၢ“နမ့လဲၤဆှၢတၢ်ဖိတၢ်လံၤလံန့ၣ်အ၀ဲသ့ၣ်အိၣ်ခိးသမံသမိးတၢ်လၢတြဲၤန့ၣ်မီၤနီၤႉနထၢၣ်ပူၤစ့မ့ပၣ်(၁)ကလးန့ၣ်နဘၣ်ဟ့ၣ်အီၣ်အ၀ဲသ့ၣ်ထံချီဆၢၦ့ၤ(၅)မၢမီၤနီၤႉနမ့တဟ့ၣ်အီၣ်အ၀ဲသ့ၣ်ဘၣ်န့ၣ်အ၀ဲသ့ၣ်သမံသမိးနၤဒီယုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ပယီၤသုးအံၤမၤအါထီၣ်တၢ်သမံသမိးတြဲၤလၢမၠၣ်၀တံၣ်၀့ၢ်ကပၤ(ကုန်သွယ်ရေးဇုန်)တၢ်လီၢ်တကးဒံးဘၣ်အမဲာ်ညါလၢမၠၣ်၀တံၣ်ကလံၤစိး(စွ့ၤကိၣ်ကိၤ)၀့ၢ်သီကျဲနုာ်လီၤဟးထီၣ်အလီၢ်သ့ၣ်တဖၣ်စ့ၢ်ကီးအ၀ဲသ့ၣ်မၤအါထီၣ်တၢ်သမံသမိးတြဲၤအိၣ်ခိးသမံသမိးတၢ်ဃံးဃီၣ်ဒီၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ