တၢ်မၤဟးဂီၤတီၤကၠၤအ့သ၀ီကျဲ၀ံၤလီၢ်ခံ တၢ်ကီတၢ်ခဲအိၣ်ထီၣ်လၢတၢ်ကစိ၁်ဆှၢၦ့ၤဆါတူၢ်ရ့ၣ်သၣ်

လါယူၤလံ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ်အပူၤ ပယီၤသုးမၤဟးဂီၤကီးတရံး–နိၣ်တကီကျဲ၀ံၤလီၢ်ခံ တၢ်စူၤခါအတီၢ်ပူၤအံၤ တၢ်ကီတၢ်ခဲအိၣ်ထီၣ်လၢတၢ်ကစိာ်ဆှၢၦ့ၤဆါတူၢ်ရ့ၣ်သၣ်အဂ့ၢ်န့ၣ် သ့ၣ်ညါဘၣ်လၢ ၦၤမၤဆါတူၢ်ရ့ၣ်သၣ်ဖိတဖၣ် အအိၣ်န့ၣ်လီၤႉ

ဖဲအပူၤကွံာ်လါမ့ၤ ၁၃ သီအခါ ခီဖျိပယီၤသုးမၤဟးဂီၤကွံာ်တီၤကၠၤအ့သ၀ီကျဲအံၤအဃိ ဖဲတူၢ်ရ့ၣ်သၣ်ဒီးတၢ်သူတၢ်သၣ်လၢအဂၤဟးထီၣ်အဆၢကတီၢ်အံၤလီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢ ကစိာ်ဆှၢၦ့ၤဆါ၀ဲတူၢ်ရ့ၣ်သၣ်အဂ့ၢ်န့ၣ် နါသ့လၢအၦ့ၤဆါတူၢ်ရ့ၣ်သၣ်တဂၤ စံး၀ဲဒ်အံၤန့ၣ်လီၤႉ

“ကျဲဒုဟးထီၣ်က့ၤလီၤတၢ်ကီတၢ်ခဲအိၣ်လီၤႉတၢ်လၢာ်ဘူၣ်လၢာ်စ့စ့ၢ်ကီးအါ၀ဲႉခဲအံၤလၢ(ကၤမရဲၣ်)ကျဲတကပၤန့ၣ် ပဘၣ်လဲၤခီဒီးထိလီၤမီၤနီၤႉလၢန့ၣ်တကပၤန့ၣ်ထိလဲဒိၣ်အဃိနဒွးတကဲးဘၣ်ႉလၢတီၤကၠၤအ့တိၤဖီခိၣ်န့ၣ်ၦၤစိာ်ဆှၢတူၢ်ရ့ၣ်သၣ်အိၣ်စ့ၢ်မီၤနီၤႉတဘျီတခီၣ်န့ၣ်ပယီၤသုးပျဲစိာ်၀ဲဒီးအဆၢကတီၢ်အိၣ်စ့ၢ်ကီးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ပယီၤသုးမၤဟးဂီၤကျဲလၢတီၤကၠၤအ့တိၤကပၤအံၤ၀ံၤလီၢ်ခံလီၢ်က၀ီၤကမျၢၢ်လၢအိၣ်ဟီၣ်က၀ီၤပူၤဖဲန့ၣ်သ့ၣ်တဖၣ် တၢ်ကီတၢ်ခဲအိၣ်ထီၣ်လၢတၢ်လဲၤတၢ်က့ၤတကပၤဒီးၦၤဟဲၦ့ၤတူၢ်ရ့ၣ်သၣ်ဖိတဖၣ်စ့ၢ်ကီးဟ့ၣ်လီၤစှၤ၀ဲတူၢ်ရ့ၣ်သၣ်အၦ့ၤ အဂ့ၢ်န့ၣ် တူၢ်ရ့ၣ်ကျီးကစၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“လၢညါခါန့ၣ်ၦၤဟဲၦ့ၤတူၢ်ရ့ၣ်သၣ်န့ၢ်ကိးဆၢကတီၢ်ဒဲးလီၤႉနဆါမးတလၢထီၣ်ဘၣ်ႉခဲအံၤၦၤဟဲၦ့ၤဒုအိၣ်ဘၣ်ဆၣ်အ၀ဲသ့ၣ်ဟဲကျဲန့ၣ်တၢ်ကီတၢ်ခဲအိၣ်အဃိအ၀ဲသ့ၣ်ၦ့ၤတူၢ်ရ့ၣ်သၣ်န့ၣ်မၤစှၤလီၤ၀ဲအၦ့ၤမီၤနီၤႉဒ်နကိးအၦ့ၤအသိးန့ၣ်တန့ၢ်ဘၣ်ႉမ့၀ံၤဖဲတီၤကၠၤအ့တိၤအိၣ်ဒံးအခါန့ၣ်နလဲၤခီထံဒီးချံႇထိသ့ဒံးႉခဲအံၤနလဲၤခီတန့ၢ်လၢၤဘၣ်ႉနလဲၤသ့ထဲလၢ(ကၤမရဲၣ်)တတီၤလီၤႉကျဲနါက့တဂ့ၤဘၣ်ႉနလဲၤသ့ဖဲတၢ်တတီၤန့ၣ်လီၤအဃိသိလ့ၣ်ႇဆဲးကဲးအါမးလီၤႉအဃိနလဲၤတတုၤဖျဲၣ်ဖျဲၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ

တၢ်သူတၢ်သၣ်လၢအဟးထီၣ်လၢဟီၣ်က၀ီၤဒူသ၀ီပူၤတဖၣ်အၦ့ၤဂ့ၤဒၣ်ထဲတူၢ်ရ့ၣ်သၣ်တမံၤဧိၤလီၤဒီး မ့မ့ၢ်လၢနဲးသၣ်ႇ မ့ကိၣ်သၣ်ဒီးပနီကျဲသၣ်သ့ၣ်တဖၣ်ခီန့ၣ်အၦ့ၤတဂ့ၤ၀ဲဘၣ်အဂ့ၢ်န့ၣ် သ့ၣ်ညါဘၣ်လၢၦၤသူၣ်အီၣ်ဖျးအီၣ်တၢ်ဖိတဖၣ် အအိၣ်န့ၣ်လီၤႉ

တကီၢ်ခါခဲအံၤတူၢ်ရ့ၣ်သၣ်အဆံးကတၢၢ်တဖျၢၣ်န့ၣ်အၦ့ၤအိၣ်(၂၀၀၀)ကၠးႇအဒိၣ်ကတၢၢ်တဖျၢၣ်န့ၣ်အၦ့ၤအိၣ်၀ဲ (၆၀၀၀)ကၠးညါဒီးဘၣ်ဆၣ်မ့မ့ၢ်လၢမ့ကိၣ်သၣ်ခီန့ၣ်အဖျၢၣ်(၁၀၀)န့ၣ်အၦ့ၤအိၣ်၀ဲ(၅၀၀၀)ႇနဲးသၣ်တဖျၢၣ်ခီန့ၣ် အၦ့ၤအိၣ်၀ဲ(၁၀၀၀)ကၠးဆူဖီလာ်န့ၣ်လီၤႉ

ပယီၤသုးမၤဟးဂီၤကျဲတဖၣ်အံၤ၀ံၤလီၢ်ခံဟီၣ်က၀ီၤပူၤတၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤတကပၤဒီး ပနံာ်တၢ်ဖိတၢ်လံၤလၢတၢ်လဲၤၦ့ၤ၀ဲလၢ၀့ၢ်ပူၤတဖၣ်မ့ဟဲက့ၤတုၤလၢသ၀ီပူၤန့ၣ်အၦ့ၤဒိၣ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ