သုးမီၤစိရိၤကဘီယူၤဟဲခးလီၤတၢ်အဃိ သၣ်တီၣ်ကလံၤစိးကမျၢၢ်(၂၀၀၀)ဘျဲၣ်ဘၣ်ဃ့ၢ်ထီၣ်

လါယူၤလံ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲလါယူၤလံ ၁၁ သီ ဂီၤခီအဆၢကတီၢ် လၢသၣ်တီၣ်ကၠံ၀့ၢ်ကလံၤစိး တီအူ–လ့ၣ်သိၤ–လွဲၤကီၤကျဲ ယၤဒိၣ်သ၀ီပူၤန့ၣ် တၢ်ဒုးကဲထီၣ်၀ဲလၢဟီၣ်က၀ီၤတၢ်ပၢၢ်ဆၢသုးကရူၢ်ဒီးပယီၤသုး၀ံၤလီၢ်ခံ ခီဖျိသုးမီၤစိရိၤကဘီယူၤဟဲခးလီၤကဒါတၢ်အဃိ လီၢ်က၀ီၤကမျၢၢ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

ဖဲလါယူၤလံ ၁၁ သီ ဂီၤခီ ၆ နၣ်ရံၣ်ဃၣ်ဃၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲယၤဒိၣ်သ၀ီဆၢခိၣ်ပယီၤသုးကလၢၤအံၤ၀ံၤလီၢ်ခံ ခီဖျိသုးမီၤစိရိၤကဘီယူၤဟဲခးလီၤစၢၤတၢ်(၄)ဘျီအဃိ ယၤဒိၣ်ႇကျ့ၤထၣ်ႇ၀ၣ်သီခိၣ်ႇ(ပရယ်စို)သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်တဂၤ စံး၀ဲဒ်အံၤန့ၣ်လီၤႉ

“မ့ၣ်အူအီၣ်ကွံာ်ဟံၣ်(၆)ဖျၢၣ်ႉမ့မ့ၢ်ၦၤစံၣ်ထီၣ်ခီန့ၣ်မ့ပာ်ဖှိၣ်သ၀ီ(၄)ဖျၢၣ်လၢာ်န့ၣ်ၦၤနီၣ်ဂံၢ်ကအိၣ်အဂၤခံကထိဘျဲၣ်ညါႉ တၢ်ကဲထီၣ်သးအံၤန့ၢ်သးလၢကရ့ၣ်နံၣ်ကီၢ်စဲၣ်အဆၢတကပၤအဃိကမျၢၢ်ၦၤဃ့ၢ်မှံဟးဖျိးလၢန့ၣ်တကပၤစ့ၢ်ကီးဟဲစံၣ်အိၣ်မီၤနီၤႉအ၀ဲသ့ၣ်နါက့ဘၣ်စံၣ်ဃုာ်၀ဲန့ၣ်ႉလီလီစဲၤခဲအံၤကမျၢၢ်လၢအဃ့ၢ်တၢ်ဒုးတဖၣ်အံၤဘၣ်ဟးအိၣ်နါစိၤလၢၦၢ်ပူၤဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

တၢ်ဒုးကဲထီၣ်၀ံၤလီၢ်ခံသုးမီၤစိရိၤကဘီယူၤအံၤဟဲခးလီၤတၢ်လၢယၤဒိၣ်သ၀ီဒီး၀ၣ်သီခိၣ်သ၀ီပူၤဘၣ်ဆၣ် ခီဖျိလီၢ်က၀ီၤကမျၢၢ်တဖၣ်အံၤဟးပလဲာ်ဆိဃာ်သးလၢတၢ်ဒုးစးထီၣ်ကဲထီၣ်အခါလံၤလံၤလံအဃိ တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ၦၤလၢအမၤစၢၤကရ့ၣ်နံၣ်ၦၤဃ့ၢ်မှံဟးဖျိးဒီးသၣ်တီၣ်ကလံၤစိးၦၤဃ့ၢ်မှံဟးဖျိး တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ၦၤသ၀ီဖိခီန့ၣ်စးထီၣ်လၢအ၀ဲသ့ၣ်နၢ်ဟူကျိသီဘျီန့ၣ်အ၀ဲသ့ၣ်လဲၤစံၣ်အိၣ်ခူသူၣ်၀ဲလၢကျဲမုၢ်၀ၢ်ခီတကပၤန့ၣ်လီၤႉခဲအံၤဒ်ပသ့ၣ်ညါအသိးန့ၣ်ကမျၢၢ်ဘၣ်ဒိဘၣ်ထံးတအိၣ်ဘၣ်ႉပယီၤသုးကလၢၤတဖျၢၣ်န့ၣ်အိၣ်ဘုးတာ်ဒီးယၤဒိၣ်သ၀ီလီၤမီၤနီၤႉသုးကလၢၤ၀ဲအံၤတၢ်ပၢၢ်ဆၢသုးကရူၢ်ပညိၣ်၀ဲလၢကလဲၤခး၀ဲန့ၣ်ဖးယံၤလံႉကဘီယူၤဟဲခးလီၤစၢၤကဒါတၢ်အဃိၦၤဘၣ်ဂုာ်က့ၤလီၢ်ခံႉခဲအံၤပယီၤသုးမၤအါထီၣ်အနီၣ်ဂံၢ်လၢသုးကလၢၤ၀ဲန့ၣ်ဒီဒူၣ်ညါဒီးမ့မ့ၢ်လၢသ၀ီပူၤခီန့ၣ်ၦၤက့ၤအိၣ်တဘူၣ်နီတဂၤဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ

လၢကရ့ၣ်နံၣ်ကီၢ်စဲၣ်ဒီးယိၤဒိၣ်ကီၢ်စဲၣ်အဆၢကညီကီၢ်စဲၣ် သၣ်တီၣ်ကလံၤစိးဟီၣ်က၀ီၤတကပၤန့ၣ် စးထီၣ်လၢသုးဟံးန့ၢ်တၢ်စိတၢ်ကမီၤန့ၣ်တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးကရူၢ်အဘၢၣ်စၢၤ အိၣ်၀ဲအဘျီ(၇၀)ဘျဲၣ်လံအသိးပယီၤသုးတကပၤသံဘၣ်ဒိဘၣ်ထံး၀ဲအါမးအဂ့ၢ်န့ၣ် တၢ်ပၢၢ်ဆၢသုးကရူၢ်စံး၀ဲအသိး သ့ၣ်ညါဘၣ်န့ၣ်လီၤႉ

ဒ်န့ၣ်အသိးတၢ်ဒုးကဲထီၣ်အကတီၢ်ကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤစ့ၢ်ကီးတၢ်ဘၣ်ယိၣ်အိၣ်ထီၣ်၀ဲလၢကဘီယူၤႇကျိဖးဒိၣ်ဒီးဟီၣ်လာ်မ့ၣ်ပိၣ်တကးဒံးဘၣ်အမဲာ်ညါခီဖျိပယီၤသုးတပျဲၦၤစိာ်ထီၣ်စိာ်လီၤဟုသးလၢဟီၣ်က၀ီၤပူၤႇသမံသမိးတၢ်ဟဲအါထီၣ်အဃိတၢ်ကီတၢ်ခဲအိၣ်ထီၣ်လၢကလဲၤၦ့ၤဂံၢ်ခီၣ်ထံးတၢ်အီၣ်တၢ်အီဒီးတၢ်ဟးထီၣ်က့ၤလီၤတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ