လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်
တနီသရံၣ်ကီၢ်ခီဒိၣ် ၀့ၢ်တၢ်အဲၣ်–ထံခံကျဲအံၤ အိၣ်၀ဲဒၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် (သုးက့ ၄)ဟီၣ်က၀ီၤပူၤအဃိ ကီၢ်သူလ့ၤသုးမုၢ်ဒိၣ်(KTLA)အတၢ်အိၣ်ခိးသမံသမိးမၤပျံၤမၤဖုးကမျၢၢ်လၢ အလ့ၢ်ထီၣ်လ့ၢ်လိၤအံၤ အဖီခိၣ် တူၢ်လိာ်၀ဲတသ့ဘၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ
ဖဲအပူၤကွံာ်စှၤသီအခါ(KTLA)အၦၤခး၀ဲဒၣ်ကညီဆူၣ်ချ့၀ဲၤကျိၤအသိလ့ၣ်လၢအတီၣ်၀ဲကသံၣ်ကသီအံၤအသိး ခီဖျိအ၀ဲသ့ၣ်အိၣ်ခိးသမံသမိးမၤပျံၤမၤဖုးကမျၢၢ်သိလ့ၣ်လၢအဟးထီၣ်က့ၤလီၤဖဲန့ၣ်သ့ၣ်တဖၣ်အဃိ ဖဲလါယူၤလံ ၁၅ သီ အနံၤန့ၣ် တၢ်ခးလိာ်သးကဲထီၣ်၀ဲလၢခ့ၣ်အဲၣ်ယူၣ်(သုးက့ ၄)စုတီၤဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၀ ဒီး(KTLA)အဘၢၣ်စၢၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲဒ်အံၤန့ၣ်လီၤႉ
ပဒိၣ်စီၤအဲၣ်နၤစံး၀ဲလၢ“ဖဲလါယူၤလံ ၁၂ သီန့ၣ် ကီၢ်ရ့ၣ် ဆူၣ်ချ့မၤစၢၤ၀ဲၤကျိၤန့ၣ်ဆှၢလီၤ၀ဲဒၣ်ကသံၣ်ကသီဆူကီၢ်ဆၣ်မီၤႉ ကီၤလၤဖိအၦၤန့ၣ်တြီ၀ဲတပျဲလဲၤ၀ဲဘၣ်၀ံၤဘၣ်ဟဲက့ၤထီၣ်ကဒါက့ၤ၀ဲန့ၣ်ႉဆူၣ်ချ့မၤစၢၤ၀ဲၤကျိၤဟဲထီၣ်အခါန့ၣ်အ၀ဲသ့ၣ်ကိးပတုာ်၀ဲတသံကွၢ်သံဒိး၀ဲနီတမံၤဘၣ်ဒီးခးသဲၣ်ဖး၀ဲအသိလ့ၣ်ဘ့ခဲလၢာ်လီၤႉ၀ံၤဒီးမၢအက့ၤ၀ဲလၢအခီၣ်မီၤႉပာ်ဂံၢ်ပာ်ဘါ၀ဲတၢ်စုက၀ဲၤခး၀ဲဒၣ်ၦၤသ၀ီဖိအသိလ့ၣ်ႇဒွဲၣ်အူ၀ဲဒၣ်သ၀ီဖိအသိလ့ၣ်တၢ်သ့ၣ်တဖၣ်န့ၣ်ခ့ၣ်အဲၣ်ယူၣ်ဟီၣ်က၀ီၤပူၤအံၤပပျဲကဲထီၣ်သးတသ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲလါယူၤလံ ၁၅ သီအနံၤစ့ၢ်ကီး (KTLA)အၦၤလၢအနုာ်လီၤဟံးန့ၢ်အလီၢ်ဖဲကျဲ၀ဲန့ၣ်တဖၣ်အံၤ ခီဖျိခ့ၣ်အဲၣ်ယူၣ် (သုးက့ ၄) KNLA သုးရ့ၣ် ၁၀ အၦၤလဲၤခး၀ဲအဃိ ခံခီခံကပၤတၢ်ခးလိာ်သးကဲထီၣ်၀ဲဒီး ဖဲန့ၣ်ကမျၢၢ်ဘၣ်ဒိ၀ဲ(၂)ဂၤဒံးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)စံး၀ဲန့ၣ်လီၤႉ
ဘၣ်ဆၣ်ကျဲမုၢ်၀ဲအံၤမ့ၢ်၀ဲဒၣ်ကီၢ်ဆၢမုၢ်ကျိၤ၀ဲၤကွာ်ကျဲတဘိအသိး(ခ့ၣ်အဲၣ်ယူၣ်)အံၤစိာ်ဆှၢ၀ဲတၢ်အီၣ်တၢ်အီႇ ကျိချံၦာ်သၣ်တဖၣ်လၢပယီၤသုးအဂီၢ်အိၣ်၀ဲအဂ့ၢ်န့ၣ် (KTLA)တကပၤ က့ၤလိာ်ဘၢလိာ်ကွီၢ်ကဒါ၀ဲန့ၣ်လီၤႉ
(KTLA)ဆၣ်ကဆီသုးတြိၤ ၦၤဘၣ်မူဘၣ်ဒါ စီၤကွၢ်လၢ် စံး၀ဲလၢ“အ၀ဲသ့ၣ်အဲၣ်ဒိး၀ဲလၢတၢ်လီၢ်၀ဲန့ၣ် ပတအိၣ်နီတစဲးဘၣ်ႉ ကျဲ၀ဲန့ၣ်အ၀ဲသ့ၣ်အိးထီၣ်၀ဲဒၣ်မုၢ်ကျိၤ၀ဲၤကွာ်အဃိကျဲ၀ဲန့ၣ်အ၀ဲသ့ၣ်တအဲၣ်ဒိး၀ဲဒၣ်လၢတၢ်ဒုးတၢ်ယၤအိၣ်ဘၣ်ႉ၀ဲဒၣ်န့ၣ် ပဆိကမိၣ်ဒ်အံၤဒုၣ်အါမ့အိၣ်ဖဲန့ၣ်န့ၣ်တၢ်ဒုးတၢ်ယၤကဘၣ်အိၣ်၀ဲဒၣ်ဖဲန့ၣ်လီၤႉပတအဲၣ်ဒိးလၢဒုၣ်ဒါအိၣ်လၢထံဆၢကီၢ်ဆၢဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးစးထီၣ်ဖဲလါယူၤလံ ၁၆ သီန့ၣ် (KTLA)ထုးထီၣ်တၢ်ကလုၢ်လၢ၀့ၢ်တၢ်အဲၣ်–ထံခံကျဲအံၤတၢ်တဘၣ် ဟးထီၣ် က့ၤလီၤဘၣ်အသိး မ့ၢ်ထံၣ်တၢ်လီၤဆီလၢအဘၣ်ဃးဒီးပယီၤသုးန့ၣ်ကမၤဆှဲလဲ၀ဲအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA) ဆၣ်ကဆီသုးတြိၤ ထုးထီၣ်ဟ့ၣ်ပလီၢ်လံာ်ဖဲလါယူၤလံ ၁၅ သီအနံၤန့ၣ်လီၤႉ
ကီၢ်သူလ့ၤသုးမုၢ်ဒိၣ်(KTLA)အံၤဖဲအပူၤကွံာ်(၂၀၂၂)နံၣ်အခါဘၣ်တၢ်ဒုးအိၣ်ထီၣ်အီၤလၢကညီဒီကလုာ်ဂၢၤသးကရၢ (KNDO)သုးရိၣ်မဲခိၣ်ကျၢၢ်လီၢ်လံၤ စီၤနၢၤဒါမၠးဒီး ဖဲန့ၣ်(KNDO)အၦၤလၢအိၣ်ခ့ၣ်အဲၣ်ယူၣ်(သုးက့ ၄)အပူၤအံၤတနီၤ စ့ၢ်ကီး ပျိာ်လဲက့ၤသးလၢ(KTLA)တကပၤဒီးဘၣ်တၢ်တီခိၣ်ရိၣ်မဲအီၤလၢသုးခိၣ်စီၤအဲၣ်ကွံ(ကိး)စီၤကီၤလၤဖိအံၤန့ၣ် လီၤႉ
ခီဖျိသုးခိၣ် စီၤအဲၣ်ကွံတီခိၣ်ရိၣ်မဲဆၣ်ကဆီသုးတြိၤအံၤမၤ၀ဲဒုးယၤတၢ်ဟူးတၢ်ဂဲၤဖဲ ဘျံးဒ၀ဲၢ်–ထံခံကျဲအဃိ တၢ်ဒုးကဲထီၣ်၀ဲဒီးပယီၤသုးႇ(ခ့ၣ်အဲၣ်ယူၣ်)စုတီၤဖီလာ်အၦၤသ့ၣ်တဖၣ်ခဲအံၤခဲအံၤန့ၣ်လီၤႉ
