လါအီကူး ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်
တလါအံၤလါအီကူးအတီၢ်ပူၤခီဖျိတၢ်စူၤတပယူာ်ဃီအဃိကညီကီၢ်စဲၣ်ပူၤ ထံကျိဖးဒိၣ်ႇထံကျိဖိတဖၣ်ဒိၣ်ထီၣ်အဃိ ဒူသ၀ီအါအါဂီၢ်ဂီၢ်ထံဒိၣ်ထီၣ်၀ဲဒီးတိၤလၢအိၣ်သ၀ီတဖျၢၣ်ဒီးတဖျၢၣ်အဘၢၣ်စၢၤတဖၣ်စ့ၢ်ကီးလီၤဘျၢ၀ဲလၢထံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
လၢဖၣ်အၣ်ႇကီးတရံးႇမၠၣ်၀တံၣ်ႇနိၣ်တကီဒီးလူၢ်ပျဲၢ်၀့ၢ်တဖၣ်အပူၤ က၀ီၤဒ့လၢအိၣ်တၢ်လီၢ်လီၤဖုၣ်သ့ၣ်တဖၣ် ခီဖျိထံဒိၣ်ထီၣ်အဃိကမျၢၢ်ဘၣ်သုးလီၢ်သုးကျဲအါအါဂီၢ်ဂီၢ်အသိးလၢဒူသ၀ီတဖၣ်အပူၤစ့ၢ်ကီးခီဖျိထံဒိၣ်ထီၣ်အဃိ ၦၤဘၣ်သုးလီၢ်သုးကျဲလဲၤအိၣ်လၢသီခါဖၠၣ်ဒီးဘူးတံၢ်သမူသကိးအဟံၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လီၢ်က၀ီၤကမျၢၢ်လၢအိၣ်ဃိၣ်လိာ်မုၢ်နုာ်တဂၤစံး၀ဲလၢ“စးထီၣ်မဟါန့ၣ်ထံထီၣ်တလၢဃိၣ်လိာ်ကျိလံဒီး ထံစးထီၣ်နုာ်လီၤ လၢဃိၣ်လိာ်မုၢ်နုာ်ဒူသ၀ီတဖၣ်အပူၤန့ၣ်လီၤႉတဂီၤညါအံၤနးဒိၣ်ထီၣ်တစဲးႇဘၣ်အိၣ်ခိးကွၢ်တၢ်အိၣ်သးဒံးမီၤနီၤႉဘၣ်ဆၣ် ပဘၣ်ပလီၢ်ပသးလီၤႉတၢ်န့ၣ်မးသ၀ီလၢအိၣ်တၢ်ဆၢခိၣ်တဖၣ်န့ၣ်ထံထီၣ်တတုၤခဲလၢာ်ဒံးဘၣ်ႉတၢ်အိၣ်သးဒုထံကဆဲးဒိၣ်ထီၣ်သ့လီၤႉလၢအံၤတကပၤန့ၣ်ဘုအိၣ်လၢထံဖီလာ်လၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ၀့ၢ်ပူၤက၀ီၤဒ့လၢအိၣ်တၢ်လီၢ်လီၤဖုၣ်တနီၤဒီးဒူသ၀ီတနီၤအပူၤန့ၣ်ထံဒိၣ်ထီၣ်ကန့ၢ်၀ဲတနွံဘျဲၣ်လံ အဃိၦၤမုၢ်ဆ့ၣ်မုၢ်ဂီၤဖိတဖၣ်တၢ်ကီတၢ်ခဲအိၣ်ထီၣ်လၢတၢ်ဖံးတၢ်မၤဒီးတၢ်လုၢ်အီၣ်နီၢ်ခိသးသမူတကပၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဖၣ်အၣ်၀့ၢ်ပူၤတဂၤ စံး၀ဲန့ၣ်လီၤႉ
“ဖဲ၀့ၢ်ပူၤအံၤၦၤအိးထီၣ်လီၢ်အိၣ်ကဒုလီၢ်အဃိၦၤလၢအကျိၣ်အစ့တအိၣ်ဘၣ်ႇၦၤလၢအကလဲၤအိၣ်လၢအဘူးအတံၢ်ဟံၣ်အသမူသကိးဟံၣ်တၢ်လီၢ်တအိၣ်ဘၣ်တဖၣ်ညါန့ၣ်လဲၤအိၣ်၀ဲဖဲန့ၣ်မီၤနီၤႉလၢ(စၤသပၠ့ၤ)ႇ(သၤလဲၤ)တကပၤန့ၣ် ဟံၣ်တနီၤဖျါက့ၤထဲဟံၣ်ခိၣ်လီၤႉလီၤဘျၢလၢထံဖးယံၤလံႉထံဒိၣ်ထီၣ်အဃိမၤတၢ်တသ့နီတမံၤဘၣ်ႉထံထီၣ်တုၤလၢကျဲပူၤ ညါအဃိလဲၤတသ့က့ၤတသ့နီတမံၤလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ
ဖဲလါအီကူး ၈ သီအနံၤ လၢဖၣ်အၣ်–စၤသပၠ့ၤကျဲႇ ဖၣ်အၣ်–သထူၣ်ကျဲႇ ဖၣ်အၣ်–ရှါသ၀ီသီတၢ်လီၢ်သ့ၣ်တဖၣ်န့ၣ် သိလ့ၣ်ဖိတဖၣ်ဘၣ်လ့ၢ်ထီၣ်လ့ၢ်လိၤလၢတၢ်ပလီၢ်ပဒီပူၤအသိးခီဖျိထံကစၢၢ်လီၤအဃိ ရှါသ၀ီသီ၀့ၢ်ပူၤ တိၤဟးဂီၤလီၤၦီၢ်၀ဲ တဘိအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ဖဲအပူၤကွံာ်လါအီကူး ၇ သီအနံၤ လၢမၠၣ်၀တံၣ်–ကီးတရံးအ့ရှါကျဲတကပၤန့ၣ်စ့ၢ်ကီး ခီဖျိဟီၣ်ခိၣ်လာ်အဃိ သိလ့ၣ်တဖၣ်လ့ၢ်ထီၣ်လ့ၢ်လိၤတသ့လၢၤဘၣ်အသိး လၢတန့ခၠါ–ထိၣ်ကီၤကိကျဲတကပၤန့ၣ်စ့ၢ်ကီး ခီဖျိထံကစၢၢ်လီၤ ကျဲ(၃)ဘိလၢာ်ဟးဂီၤအဃိ တကီၢ်ခါခဲအံၤသိလ့ၣ်ဖိတဖၣ်ဘၣ်ဆီတလဲလ့ၢ်ထီၣ်လ့ၢ်လိၤက့ၤလၢမၠၣ်၀တံၣ် ကစၢၢ်ခိၣ်ကျဲ လီၢ်လံၤတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲလါအီကူး ၉ သီအနံၤ ဒ်မူခိၣ်ကလံၤသီၣ်ဂီၤ(ဇလဗေဒ)၀ဲၤကျိၤထုးထီၣ်ပာ်ဖျါ၀ဲအသိးန့ၣ် ဖၣ်အၣ်ဃိၣ်လိာ်ထံထီၣ်တုၤ လၢ(၈၉၂)စဲးထံၣ်မံၣ်ထၢၣ်လံဒီး မ့မ့ၢ်လၢမၠၣ်၀တံၣ်သူမှဲကျိခီန့ၣ် ထီၣ်၀ဲဒၣ်တုၤလၢ(၉၉၄)စဲးထံၣ်မံၣ်ထၢၣ်လံ န့ၣ်လီၤႉ လၢ(၂၄)နၣ်ရံၣ်အတီၢ်ပူၤထံဒိၣ်ထီၣ်ကဒါသ့၀ဲအသိး လါအီကူး ၁၀ သီလီၢ်ခံန့ၣ် ကီၢ်ပယီၤကလံၤထံး တလၢၤႇကညီႇ တနီသရံၣ်ဟီၣ်က၀ီၤတဖၣ်အပူၤတၢ်စူၤကလီၤယးသ့၀ဲအဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ
