လါအီကူး ၁၇ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ်အပူၤ ဖဲမဟါလါအီကူး ၁၆ သီ ဂီၤခီ ၈း၃၀ အဆၢကတီၢ် ပယီၤသုးလၢအိၣ်ဆီလီၤသးဖဲ အ့ရှါကျဲကပၤယွၤသ့ၣ်ကိသ၀ီပူၤ တဖၣ်အံၤဒီး တၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်အဃိ ၦၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤႉ
ဖဲအပူၤကွံာ်လါအီကူး ၇ သီအခါ ပယီၤသုးလၢအနုာ်လီၤအိၣ်လၢ(ယွၤသ့ၣ်ကိ)သ၀ီပူၤတဖၣ်အံၤဒီး ကညီဒီကလု၁်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲခံဘျီညါဒီး လၢတၢ်န့ၣ်အဃိ ၦၤသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် ယွၤသ့ၣ်ကိသ၀ီဖိတဖၣ် စံး၀ဲန့ၣ်လီၤႉ
သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ“ပယီၤသုးဟဲလၢသ၀ီပူၤအဃိတၢ်ပၢၢ်ဆၢသုးပာ်ဖှိၣ်ကရူၢ်လဲၤခးအ၀ဲသ့ၣ်ဘျီ ၦၤအိၣ်လၢသ၀ီပူၤတဘူၣ်လၢၤဘၣ်ႉၦၤနီၢ်ဒိၣ်ႇၦၤဖိသၣ်ၦၤသ၀ီဖိဟးစံၣ်ပလဲာ်သးခဲလၢာ်လီၤႉတၢ်ဒုးဖဲ(၇)သီန့ၣ်တဘျီဒီး ဖဲတနံၤအံၤလါအီကူး(၁၆)သီန့ၣ်တဘျီအိၣ်ခံဘျီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်– ကညီတၢ်ကစီၣ် န့ၣ်လီၤႉ
တၢ်စူၤခါအတီၢ်ပူၤခီဖျိၦၤသ၀ီဖိသ့ၣ်တဖၣ်အံၤဘၣ်ဟးစံၣ်အိၣ်လၢၦၢ်ပူၤအဃိလိၣ်ဘၣ်၀ဲဒၣ်တၢ်အိၣ်တၢ်ဆိးလီၢ်ကျဲဒီးတၢ်အီၣ်တၢ်အီသ့ၣ်တဖၣ်အဂ့ၢ်န့ၣ် ၦၤပိာ်မုၣ်လၢအဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ၦၤစံၣ်ထီၣ်တဖၣ်အကျါန့ၣ်ၦၤဖိဒံဖိသၣ်ႇဖိသၣ်အီနုၢ်ပၣ်စ့ၢ်မီၤနီၤႉၦၤစံၣ်ထီၣ်တဖၣ်အံၤအကျါတနီၤန့ၣ် တၢ်အီၣ်တၢ်အီတပၣ်နီတမံၤဘၣ်ႉတၢ်စူၤခါအဃိနးတစဲးမီၤနီၤႉတၢ်ခိၣ်ဒုး(တၤလပၣ်)စ့ၢ်ကီးအံၣ်အဃိမုၢ်နၤခီန့ၣ် ၦၤဘၣ်ဆ့ၣ်နီၤအိၣ်တဂၤတဂၤဒ်န့ၣ်လီၤႉဘၣ်လၢတၢ်စူၤခါအကတီၢ်ၦၢ်ပူၤအံၤတၢ်ဖိဃၢ်လဲလဲလီၤႉမ့မ့ၢ်လၢတၢ်ကိၢ်ခါန့ၣ် နမံလၢသ့ၣ်ကဒုဖီလာ်သ့ဒံးမီၤနီၤႉဘၣ်ဆၣ်မ့မ့ၢ်လၢတၢ်စူၤခါအံၤဒုတဘၣ်ဂီၢ်နီတစဲးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်(၂၀၂၂)လါဒံၣ်စ့ဘၢၣ်အခါစ့ၢ်ကီး လၢယွၤသ့ၣ်ကိသ၀ီအပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤအဃိ လီၢ်က၀ီၤသ၀ီဖိတဖၣ်အံၤဘၣ်ဃ့ၢ်ထီၣ်ဒံး၀ဲသ၀ီဒီတဖျၢၣ်ညါန့ၣ်လီၤႉ
ဒ်န့ၣ်အသိးလၢကီးတရံးကီၢ်ဆၣ် နိၣ်လါႇတန့ၤမူၤႇကီၣ်မူႇကၠီၤစှၤကိႇယွၤသ့ၣ်ကိႇကီးနွဲၣ်ႇအီကြီႇယွၤသ့ၣ်ႇ ကမဲၤကိသ၀ီတကပၤန့ၣ်စ့ၢ်ကီးတၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် အဘၢၣ်စၢၤအိၣ်၀ဲတလီၢ်လီၢ်ဒီးခီဖျိပယီၤသုးက့ၤခးလီၤကဒါကျိဖးဒိၣ်အဃိဒူသ၀ီသ့ၣ်တဖၣ်အံၤ ကမျၢၢ်တနီၤအိၣ်လၢ သ၀ီပူၤတဘူၣ်လၢၤဘၣ်ဟးစံၣ်အိၣ်၀ဲလၢတၢ်လီၢ်အဂၤန့ၢ်ယံၤလံဘၣ်ဆၣ်တုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ၦၤသ၀ီဖိလၢအဘၣ်ဃ့ၢ်တၢ်ဒုးသ့ၣ်တဖၣ်အံၤတနီၤန့ၣ်လဲၤစံၣ်အိၣ်လၢ၀့ၢ်ပူၤႇလဲၤစံၣ်အိၣ်လၢအဘူးအတံၢ်အသမူသကိးဟံၣ်လၢသ၀ီလၢအဂၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢၦၢ်ပူၤစ့ၢ်ကီးအိၣ်၀ဲဒၣ်န့ၣ်လီၤႉတကီၢ်ခါခဲအံၤတၢ်ဖံးတၢ်မၤတအိၣ်ဘၣ်တကးဒံးဘၣ်အမဲာ်ညါခီဖျိအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤကအိၣ်လၢအလါလံအဃိလိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ