လါအီကူး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ ဖဲအပူၤကွံာ်စှၤသီအခါ ခီဖျိပယီၤသုးကျိၤနုာ်လီၤအိၣ်လၢ (ဇီးကုန်း)သ၀ီပူၤအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲဒၣ်ဒီး ပယီၤသုးတဖၣ်အံၤအိၣ်လၢသ၀ီပူၤတုၤလၢခဲအံၤ တစုအဃိ တၢ်ကီတၢ်ခဲအိၣ်လၢကက့ၤဆူဟံၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဖဲလါအီကူး ၁၆ သီအခါ ပယီၤသုးအဟဲနုာ်လီၤတဖၣ်အံၤဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဒီး ခီဖျိပယီၤသုးခးလီၤကျိဖးဒိၣ်အဃိ(ဇီးကုန်း)သ၀ီဃုာ်ဒီးကယၣ်၀့စ့ၣ်ႇပတီၣ်စူၣ်ႇရှါစုၣ်သ၀ီ လီၢ်က၀ီၤကမျၢၢ်တဖၣ် ဘၣ်ဃ့ၢ်ထီၣ်၀ဲဒၣ်န့ၣ်လီၤႉ
တၢ်ခးလိာ်သးကဲထီၣ်ဖဲန့ၣ်၀ံၤလီၢ်ခံမ့မ့ၢ်သ၀ီလၢအဂၤတဖၣ်န့ၣ်က့ၤအိၣ်လၢအဟံၣ်အဃီလံဘၣ်ဆၣ် မ့မ့ၢ်လၢ(ဇီးကုန်း)သ၀ီပူၤခီန့ၣ်ခီဖျိပယီၤသုးအိၣ်ဆီလီၤတုၤလၢခဲအံၤတစုတဃိက့ၤအိၣ်လၢဟံၣ်တဘူၣ်ဒံးဘၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပယီၤသုးအိၣ်ဒံးလၢ(ဇီးကုန်း)သ၀ီဒံးႇၦၤဘၣ်ယိၣ်လၢၦၤမ့က့ၤန့ၣ်အ၀ဲသ့ၣ်ကခးၦၤအဃိ ၦၤက့ၤတဘူၣ်ဒံးဘၣ်ႉမ့မ့ၢ်လၢရှါစူၣ်ႇကယၣ်၀့စ့ၣ်ခီန့ၣ်အိၣ်လၢထံကျိ၀ၢ်ခီတကပၤအဃိပယီၤသုးမ့ဟဲန့ၣ်တဟဲခီဃီၤ လၢအံၤတကပၤဘၣ်ႉအအိၣ်လၢန့ၣ်တကပၤအဃိပဟဲက့ၤအိၣ်လၢသ၀ီပူၤဘူၣ်မီၤနီၤႉလၢ(ပတီၣ်စူၣ်)တကပၤန့ၣ် စ့ၢ်ကီး တနီၤန့ၣ်ၦၤက့ၤအိၣ်တဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲပယီၤသုးခးလီၤကျိဖးဒိၣ်အခါန့ၣ်လီၢ်က၀ီၤကမျၢၢ််ဘၣ်ဒိဘၣ်ထံးဒီးၦၤဟံၣ်ၦၤဃီဟးဂူာ်ဟးဂီၤအိၣ်၀ဲအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲဒၣ်န့ၣ်လီၤႉ
လၢန့ၣ်အမဲာ်ညါ(ဇီးကုန်း)သ၀ီပူၤဖဲတၢ်ဒုးကဲထီၣ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် အဘၢၣ်စၢၤအခါန့ၣ်စ့ၢ်ကီးပယီၤသုးတကပၤသံ၀ဲ(၃)ဂၤႇဘၣ်ဒိ(၄)ဂၤအဂ့ၢ်န့ၣ် ကၠဲးထိၣ် တၢ်ပၢၢ်ဆၢသုးကရူၢ် (KRF) ထုးထီၣ်ပာ်ဖျါ၀ဲဖဲလါအီကူး ၁၉ သီအနံၤန့ၣ်လီၤႉ
“တၢ်ခးလိာ်သးကဲထီၣ်ဖဲတၢ်တနၤန့ၣ်ပယီၤသုးခးလီၤကျိဖးဒိၣ်ကအိၣ်လၢအထံၣ်(၄၀)ဘျဲၣ်ညါႉ ခးလီၤ၀ဲ(RPG), ခးလီၤကျိဖးဒိၣ်အကလုာ်ကလုာ်လီၤႉဖဲန့ၣ်၀ဲဒၣ်နါက့ၦၤဘၣ်ဟးပလဲာ်သးဒံး”အဂ့ၢ်န့ၣ် တၢ်ပၢၢ်ဆၢသုးကရူၢ်အၦၤတဂၤ စံး၀ဲန့ၣ်လီၤႉ
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ် (ဇီးကုန်း)သ၀ီ တကးဒံးဘၣ် ဒူသ၀ီလၢအဂၤကမျၢၢ်တဖၣ်စ့ၢ်ကီး ခီဖျိပယီၤသုးကျိၤနုာ်လီၤတလီၢ်လီၢ်အဃိ အ၀ဲသ့ၣ်ဘၣ်ဃ့ၢ်ထီၣ်အိၣ်တဘျုးဘျီလံ အသိး ဖဲအပူၤကွံာ်လါယူၤလံအခါစ့ၢ်ကီးခီဖျိပယီၤသုးခးလီၤကျိဖးဒိၣ်ကျိဖိတဖၣ်အဃိ လီၢ်က၀ီၤကမျၢၢ်သံဘၣ်ဒိဘၣ်ထံး ဒံး၀ဲန့ၣ်လီၤႉ
