လါအီကူး ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ ဖဲအပူၤကွံာ်လါအီကူး ၂၂ သီ အနံၤ (၀့လိၤ)သ၀ီဖိခံဂၤအံၤဖဲအလဲၤလၢကၠဲးဒိတၢ်ဆါဟံၣ်အခါပယီၤသုးဖီၣ်မၤဒၢၣ်အီၤလၢကျဲပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
(၀့လိၤ)သ၀ီဖိခံဂၤအံၤဖဲအ၀ဲသ့ၣ်ကလဲၤဆှၢမ့ၤလၢကၠဲးဒိတၢ်ဆါဟံၣ်လဲၤလၢကျဲအခါန့ၣ် ပယီၤသုးဖီၣ်ဒီး မၤဒၢၣ်အ၀ဲသ့ၣ်အဂ့ၢ်န့ၣ် ကၠဲးဒိကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ
“အ၀ဲသ့ၣ်ခံဂၤန့ၣ်အိၣ်လၢ(၀့လိၤ)သ၀ီကလဲၤထီၣ်ဆှၢန့ၢ်ၦၤဆါမ့ၤလၢကၠဲးဒိမီၤနီၤႉဖဲအ၀ဲသ့ၣ်လဲၤလၢကျဲအခါန့ၣ် ပယီၤသုးဖီၣ်အ၀ဲသ့ၣ်ခံဂၤန့ၣ်ဘျီမၤဒၢၣ်သမံသမိးအ၀ဲသ့ၣ်ႉမုၢ်နၤခီ ၈ နၣ်ရံၣ်မးပျၢ်လီၤက့ၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
(၀့လိၤ)သ၀ီဖိလၢပယီၤသုးဖီၣ်မၤဒၢၣ်၀ဲခံဂၤအံၤပယီၤသုးလိာ်ဘၢလိာ်ကွၢ်၀ဲလၢအမ့ၢ်တၢ်မဲာ်ချံဒီးစးထီၣ်ဖီၣ်သမံသမိး မၤဒၢၣ်၀ဲလၢဟါခီ(၅)နၣ်ရံၣ်ဒီးဟါခီ(၈)နၣ်ရံၣ်မးပျၢ်လီၤက့ၤ၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
ခီဖျိပယီၤသုးဖီၣ်မၤဒၢၣ်၀ဲဒ်အံၤအဃိ(၀့လိၤ)သ၀ီဖိခံဂၤအံၤအမိၢ်ၦၢ်ထီၣ်လုးထီၣ်လါ၀ဲဒီတဂၤညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ပယီၤသုးလၢအဖီၣ်မၤဒၢၣ်(၀့လိၤ)သ၀ီဖိသ့ၣ်တဖၣ်န့ၣ်မ့ၢ်၀ဲကၠဲးဒိ၀့ၢ် ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၃) စုတီၤဖီလာ် ဒုးယၤခိၣ်–၂ သီၤစ့ၤနဲၤအူ တီခိၣ်ရိၣ်မဲအၦၤဒီး ပယီၤသုးကရူၢ်တဖၣ်အံၤမၤပျံၤမၤဖုးကမျၢၢ်ႇ ဖီၣ်မၤဒၢၣ်ကမျၢၢ်ႇခးလီၤကျိဖးဒိၣ်လၢသ၀ီပူၤအိၣ်၀ဲတလီၢ်လီၢ်အဂ့ၢ်န့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲဖဲလါအီကူး ၂၇ သီ အနံၤန့ၣ်လီၤႉ
