မၠၣ်၀တံၣ်၀့ၢ်ပူၤထံဒိၣ်ထီၣ်အဃိ ၦၤဘၣ်သုးလီၢ်သုးကျဲအိၣ်ထီၣ်တုၤလၢအဂၤ(၃၀၀၀)ဘျဲၣ်

လါအီကူး ၇ သီႇ ၂၀၂၃ နံၣ်ႇ ခ့ၣ်အဲးစံၣ်

စှၤသီအတီၢ်ပူၤခီဖျိတၢ်စူၤတပယူာ်ဃီဒီးသူမှဲကျိထံဒိၣ်ထီၣ်အဃိ တကီၢ်ခါခဲအံၤမၠၣ်၀တံၣ်၀့ၢ်ပူၤ က၀ီၤဒ့လၢအိၣ် တၢ်လီၢ်လီၤဖုၣ်တဖၣ်ကမျၢၢ်အဂၤ(၃၀၀၀)ဘျဲၣ်ဘၣ်သုးလီၢ်သုးကျဲလၢလီၢ်အိၣ်ကဒုလီၢ်အဂ့ၢ်န့ၣ် ဂံၢ်ခီၣ်ထံးတၢ်ကရၢကရိလၢအမၤစၢၤတၢ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

စးထီၣ်ဖဲလါယူၤလံ ၃၁ သီအနံၤ ခီဖျိတၢ်စူၤတပယူာ်ဃီအဃိ သူမှဲကျိထံထီၣ်ဒီး မၠၣ်၀တံၣ်၀့ၢ်ဟးထီၣ် ကစၢၢ်ထံလီၤႇ ထံကျိၤတဖၣ်ၦဲၤလီၤလာ်အဃိ ထံဒိၣ်ထီၣ်၀ဲလၢ၀့ၢ်ပူၤက၀ီၤဒ့ႇကျဲမုၢ်ခိၣ်တကးဒံးဘၣ် လၢအ့ရှါကျဲမုၢ်ဖးဒိၣ်ဒီး မၠၣ်စၤနံၤသိလ့ၣ်ကရၢၢ်တကပၤန့ၣ်စ့ၢ်ကီးထံဒိၣ်ထီၣ်၀ဲအဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤ စံး၀ဲန့ၣ်လီၤႉ

အ၀ဲစံး၀ဲလၢ“ထံဒိၣ်ထီၣ်ကအိၣ်လၢ(၄)သီလံႉခဲအံၤက၀ီၤဒ့လၢအိၣ်တၢ်လီၢ်လီၤဖုၣ်တဖၣ်န့ၣ်နအိၣ်တသ့နီတတီၤ လၢၤဘၣ်ႉၦၤဘၣ်လဲၤထီၣ်သုးလီၢ်လဲၤအိၣ်လၢလီၢ်အိၣ်ကဒုလီၢ်မီၤနီၤႉဒ်ပမၤန့ၢ်စရီဖဲအပူၤကွံာ်(၄)သီအခါန့ၣ် ၦၤဘၣ်သုးလီၢ်သုးကျဲကအိၣ်(၁၅၀၀)အဂၤညါႉတုၤလၢတနံၤအံၤန့ၣ်ကအိၣ်လၢအဂၤ(၃၀၀၀)ဃၣ်ဃၣ်လံႉ ၦၤဖိဒံဖိသၣ်ႇ ၦၤသူၣ်က့သးၦၢ်အိၣ်တဆူၣ်တချ့ဘၣ်ႉမ့မ့ၢ်တၢ်အီၣ်တၢ်အီခီန့ၣ်အ၀ဲသ့ၣ်ဖီအီၣ်ဖှိၣ်၀ဲဒ်န့ၣ်အိၣ်ႉၦၤဟဲနီၤလီၤအီၣ်နါက့အိၣ်လီၤႉမူခိၣ်နါက့စူၤဒံးတပယူာ်ဃီအသိးထံဟဲအါထီၣ်အဃိၦၤဟံၣ်ၦၤဃီႇကျဲလီၤဘျၢအိၣ်လီၤ”အဂ့ၢ်န့ၣ် ၦၤအိၣ်လၢဖဲမၠၣ်၀တံၣ် က၀ီၤဒ့(၁)ပူၤ လၢအအိၣ်ဘူးသူမှဲကျိကပၤတဂၤ စံး၀ဲန့ၣ်လီၤႉ

တကီၢ်ခါခဲအံၤလၢ(၅)က၀ီၤဒ့(၅),က၀ီၤဒ့(၄),က၀ီၤဒ့(၂)တဖၣ်အပူၤ တၢ်သူၣ်ထီၣ်ဟီလ်ဖးဒိၣ်(ဒမၤယိၢ်) ႇသီခါဖၠၣ်ႇကၠိကရၢၢ်ပူၤန့ၣ် တၢ်အိးထီၣ်၀ဲလီၢ်အိၣ်ကဒုလီၢ်တၢ်လီၢ်(၆)တီၤဒီး မၠၣ်၀တံၣ်သုးကီၣ်ကးပၢပြးကရူၢ်ႇ မုာ်သးမၤကလီကရူၢ်ႇနီၢ်တဂၤတၢ်မၤဘူၣ်ကစၢ်တဖၣ်ဟဲမၤစၢၤတၢ်အိၣ်၀ဲဘၣ်ဆၣ် မ့မ့ၢ်လၢဆူၣ်ချ့တၢ်အံးထွဲကွၢ်ထွဲ ဒီးအိၣ်ဆိးလီၢ်ကျဲခီန့ၣ်တကူတလၢ၀ဲဒၣ်ဘၣ်အဂ့ၢ်န့ၣ် ၦၤလၢအဘၣ်သုးလီၢ်သုးကျဲတဖၣ်အံၤစံး၀ဲန့ၣ်လီၤႉ

“ထံဒိၣ်ထီၣ်အဃိၦၤလၢအဘၣ်သုးလီၢ်သုးကျဲတဖၣ်အံၤပၢပြးကရူၢ်ဟဲဟ့ၣ်လီၤ၀ဲတၢ်အီၣ်တၢ်အီအိၣ်မီၤနီၤႉၦၤဟဲမၤဘူၣ်လီၤမ့ၤဘိၣ်ႇၦၤဟးထၢဟံၣ်ခိၣ်စရီသ့ၣ်မတၤအိၣ်လီၤႉမ့မ့ၢ်ၦၤဘၣ်သုးလီၢ်သုးကျဲအနီၣ်ဂံၢ်စရီခီန့ၣ်ပတသ့ၣ်ညါလီၤတံၢ်ဒံး ဘၣ်ႉတၢ်လီၢ်တၢ်ကျဲဒုတကူတလၢဘၣ်ႇၦၤဖိသၣ်အိၣ်တဆူၣ်အိၣ်တချ့ဘၣ်စ့ၢ်ကီးအိၣ်လီၤ”အဂ့ၢ်န့ၣ် ၦၤလၢအသုးလီၢ် လဲၤအိၣ်လၢ(ကၠၣ်ခၣ်တီ)သီခါဖၠၣ်ကရၢၢ်ပူၤတဂၤ စံး၀ဲန့ၣ်လီၤႉ

တုၤလၢတနံၤအံၤလါအီကူး ၇ သီအနံၤ လၢကညီကီၢ်စဲၣ်ပူၤ ခီဖျိထံကစၢၢ်လီၤဖှိၣ်၀ဲလၢ သူမှဲကျိႇဃိၣ်လိာ်ကျိႇ ကၠဲကျိႇဟီၣ်သရီကျိႇလူၢ်ပျဲၢ်ကျိပူၤအဃိ မၠၣ်၀တံၣ်ႇဂီၤလ့ၤႇ ကီးတရံးႇနိၣ်တကီႇ ကြုၢ်တုႇလူၢ်ပျဲၢ်ႇ ဖၣ်အၣ်ဒီးစွ့ၤကိႇ ကမၤမိၢ်ႇမၠဲၤကၠံငူၤတၢ်လီၢ်သ့ၣ်တဖၣ်အံၤထံဒိၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကးဒံးဘၣ်လၢန့ၣ်အမဲာ်ညါ ခီဖျိထံဒိၣ်ထီၣ်အဃိ လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိဒီတကျိၤ ထံ၀ၢ်ခီလၢ ယိၤကီၢ်တကပၤန့ၣ်ဒီး လၢမဲၢ်ဆီးႇမဲၢ်ရမၣ်ႇဖိဖြးယိၤကီၢ်တကပၤန့ၣ်စ့ၢ်ကီးထံဒိၣ်ထီၣ်၀ဲလၢသ၀ီပူၤႇက၀ီၤဒ့ပူၤအိၣ်၀ဲ အဂ့ၢ်န့ၣ် ၦၤလၢအအိၣ်သူမှဲကျိကပၤလၢအဘၣ်သုးလီၢ်သုးကျဲခီဖျိထံဒိၣ်ထီၣ်အဃိအံၤတဖၣ် စံး၀ဲအသိး သ့ၣ်ညါဘၣ်န့ၣ်လီၤႉ