လါစဲးပထ့ဘၢၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ချၢၣ်တကူၣ်တၢၣ် သ၀ီကရူၢ်အပူၤ ခီဖျိပယီၤသုးနုာ်လီၤအိၣ်ဆီလီၤသးလၢသီခါဖၠၣ်ကရၢၢ်ပူၤဒီးကၠိကရၢၢ်ပူၤအဃိ ၦၤကၠိဖိအဂၤ(၁၀၀၀)ဘျဲၣ် ဘၣ်ဆိကတီၢ်တၢ်မၤလိအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢ၀ီၢ်ရ့ၣ်ကီၢ်ဆၣ် ချၢၣ်ႇဖယါငါစူၤႇနီဒ့ႇမၠိၣ်ဟီႇချၢၣ်သ၀ီဖိႇစံဖၠူၤကိႇပလ့ၤႇတကူၣ်တၢၣ်ႇနါသဲထိႇ တကူၣ်တၢၣ်သ၀ီဖိ ဒီး မိၣ်စလ့ၣ်(ကီၤလၤ)တၢ်လီၢ်တကပၤန့ၣ် ခီဖျိဟီၣ်က၀ီၤဒုးယၤတၢ်သဘံၣ်သဘုၣ်ဒီးပယီၤသုးနုာ်လီၤအိၣ်လၢ ကၠိကရၢၢ်ပူၤ အဃိ ကၠိအဖျၢၣ်(၂၀)ဃၣ်ဃၣ်ဘၣ်ပံးကွံာ်အသးဒီးတုၤလၢခဲအံၤ တၢ်တက့ၤအိးထီၣ်ဘၣ်၀ဲဒံးဘၣ်အဂ့ၢ်န့ၣ် ကူၣ်သ့ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
၀ီၢ်ရီလီၢ်က၀ီၤကူၣ်သ့ၦၤဘၣ်မူဘၣ်ဒါတဂၤစံး၀ဲလၢ“တၢ်ဒုးကဲထီၣ်လၢသ၀ီပူၤအဃိပဘၣ်ပံးကွံာ်ကၠိမီၤနီၤႉ တုၤလၢခဲအံၤတက့ၤအိးထီၣ်ဘၣ်ဒံးဘၣ်ႉၦၤဖိဒံဖိသၣ်တဖၣ်စ့ၢ်ကီးဃ့ၢ်တၢ်ဒုးအဃိတၢ်မၤလိဆဲးခံဖးဒိၣ်ညါလံမီၤနီၤႉ မ့ၢ်လၢပယီၤသုးအိၣ်လၢကၠိကရၢၢ်ပူၤအဃိလၢကက့ၤအိးထီၣ်ကဒါကၠိအဂီၢ်တၢ်ကီဖးဒိၣ်ညါမီၤနီၤႉပဆၢမုၢ်လၢ်လၢ ကကွၢ်တၢ်လၢၦၤဖိဒံဖိသၣ်တၢ်ကူၣ်ဘၣ်ကူၣ်သ့အဂီၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါစဲးပထ့ဘၢၣ် ၂၆ သီ အနံၤန့ၣ်လီၤႉ
ကၠိလၢအဘၣ်ပံးသးအဖျၢၣ်(၂၀)ဘျဲၣ်န့ၣ်မ့ၢ်၀ဲဒၣ်ဒူသ၀ီတၢ်ထဲးဂံၢ်ထဲးဘါကၠိႇကလုာ်ဒူၣ်ကၠိႇ သုးကီၣ်ကးတၢ်ပၢဆှၢ ဖီလာ်ကၠိသ့ၣ်တဖၣ်ဒီး ကၠိတဖၣ်အံၤတၢ်ပံးအီၤစးထီၣ်လါစဲးပထ့ဘၢၣ် ၁၂ သီ ဘၣ်ဆၣ်တုၤလၢခဲအံၤတစု တၢ်တက့ၤအိးထီၣ်ဘၣ်၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
“လၢ(ဖယါငါစူၤ)ကၠိန့ၣ်ပယီၤသုးဆီလီၤ၀ဲဒၣ်(၁၂၀ မမ)ကျိဖးဒိၣ်ခးတၢ်အဃိ မဲာ်ထံကလၤဟးဂီၤခဲလၢာ်လီၤႉ လၢချၢၣ်သ၀ီတီၤထီကၠိန့ၣ်နါက့အ၀ဲသ့ၣ်အိၣ်စ့ၢ်ႉပဆၢမုၢ်လၢ်လၢကကွၢ်တၢ်လၢၦၤဖိသၣ်တၢ်မၤလိမၤဒိးအဂီၢ်မီၤနီၤႉ ၦၤတမၤလိဘၣ်လံာ်ဂ့ၤဂ့ၤဘၣ်ကအိၣ်လၢ(၂)နံၣ်ဘျဲၣ်လံ”အဂ့ၢ်န့ၣ် ကၠိဖိမိၢ်ပၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
လၢခ့ၣ်အဲၣ်ယူၣ် ၀ီၢ်ရ့ၣ်ကီၢ်ဆၣ် ချၢၣ်တကူၣ်တၢၣ်သ၀ီကရူၢ်အပူၤ ကိးမုၢ်နံၣ်ဒဲးၦၤကၠိဖိဖျိထီၣ်အနီၣ်ဂံၢ်မျးကယၤ ဟဲအါထီၣ်တကးဒံးဘၣ် မ့ၢ်စ့ၢ်ကီးဟီၣ်က၀ီၤတဘ့ၣ်လၢတၢ်ကူၣ်ဘၣ်ကူၣ်သ့အဂံၢ်အဘါ၀ဲဒၣ်အဂ့ၢ်န့ၣ် ကူၣ်သ့ၦၤမၤတၢ်ဖိလီၢ်လံၤတဖၣ် စံး၀ဲန့ၣ်လီၤႉ
