Home တၢ်ကစီၣ် တၢ်ဆီတလဲ KNU သုးက့(၃)ဘ့ၣ် သုးက့ခိၣ် ဒီး ဒုးယၤခိၣ်လီၢ်လၤတဖၣ်

တၢ်ဆီတလဲ KNU သုးက့(၃)ဘ့ၣ် သုးက့ခိၣ် ဒီး ဒုးယၤခိၣ်လီၢ်လၤတဖၣ်

229
0

လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲအပူၤကွံာ်စှၤသီအခါ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတၢ်လီၢ်တတီၤအပူၤ တၢ်မၤ၀ဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးခိၣ်သုးနၢ်တၢ်ထံၣ်လိာ်အိၣ်သကိးတခါဒီးလၢတၢ်အိၣ်ဖှိၣ်ဘျီ၀ဲအံၤအပူၤ တၢ်ဆီတလဲ၀ဲ KNU သုးက့(၃)ဘ့ၣ် သုးက့ခိၣ်ဒီးဒုးယၤခိၣ်လီၢ်လၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်မၤသုးခိၣ်သုးနၢ်တၢ်ထံၣ်လိာ်အိၣ်သကိးဘျီ၀ဲအံၤအပူၤန့ၣ် ခ့ၣ်အဲၣ်ယူၣ်(သုးက့ ၄)သုးက့ခိၣ် သုးခိၣ်ကျၢၢ်ဖိ စီၤလ့မုၢ်အလီၢ်န့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်ဂီၢ်ဂ့ၢ် စီၤဖိလ့ႇ (သုးက့ ၆)သုးက့ခိၣ် သုးခိၣ်ကျၢၢ်ဖိ စီၤဆးမံၣ်စ့ဖိ အလီၢ်န့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်စိ စီၤကိၢ်ထူဒီး (သုးက့ ၇)သုးက့ခိၣ် သုးခိၣ်ကျၢၢ်ဖိ စီၤဖီဒိၣ် အလီၢ်ခီန့ၣ် တၢ်တီၣ်ထီၣ်က့ၤ၀ဲ သုးခိၣ်ဒိၣ်စိ စီၤဒံၣ်ကွဲၤထူသ့ၣ်တဖၣ်အံၤန့ၣ်လီၤႉ

လၢန့ၣ်အမဲာ်ညါမ့မ့ၢ်(သုးက့ ၄)ဒုးယၤခိၣ်အလီၢ်န့ၣ် တၢ်တီၣ်က့ၤ၀ဲလၢ သုးရ့ၣ်(၂၀၃)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤလ့သ့ႇ (သုးက့ ၆)န့ၣ် တၢ်တီၣ်ထီၣ်က့ၤ၀ဲသုးရ့ၣ်(၂၇)သုးရ့ၣ်ခိၣ် သုးခိၣ်ဒိၣ်စိ စီၤယၤနဲၤ(ကိး)စီၤနၢၤဒါထူ ဒီး (သုးက့ ၇) ဒုးယၤခိၣ်အလီၢ်န့ၣ် တၢ်တီၣ်ထီၣ်က့ၤ၀ဲလၢသုးရ့ၣ်(၁၀၁)သုးရ့ၣ်ခိၣ် သုးခိၣ်ဒိၣ်စိ စီၤဖိဒူသ့ၣ်တဖၣ်အံၤ န့ၣ်လီၤႉ

ဘၣ်ဃးတၢ်ဆီတလဲသုးက့ခိၣ်ႇဒုးယၤခိၣ်အလီၢ်အကျဲတၢ်ဂ့ၢ်အံၤ(KNLA)လီၢ်ခၢၣ်သး သုးရိၣ်မဲခိၣ်–၁ သုးခိၣ်ကျၢၢ်ဖိ စီၤတၢ်မျၢ်သီ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

“တၢ်ဆီတလဲန့ၣ်အိၣ်ဒၣ်လၢခိၣ်နၢ်တဖၣ်တၢၣ်ပီၣ်လိာ်သးဒၢးဆီတလဲ၀ဲလီၤႉတမ့ၢ်လၢတၢ်အိၣ်ဖှိၣ်တၢ်ဆၢတဲာ်ဘၣ်ႉ ဖဲအပူၤကွံာ်တသီခံသီအတီၢ်ပူၤလီၤမီၤနီၤႉမ့ၢ်ဒၣ်တၢ်ပိာ်ထွဲခီကရဲးအတၢ်ပာ်သးဒီးခီဖျိအနီၢ်ကစၢ်ဒၣ်၀ဲတဆူၣ်တချ့ဘၣ်အဃိလီၤမီၤနီၤႇအဂၤဒုတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်ဆီတလဲသုးခိၣ်သုးနၢ်အံၤအကျါပၣ်ဃုာ်၀ဲခ့ၣ်အဲၣ်ယူၣ်(သုးက့ ၄)သုးက့ခိၣ်ဒီး ဒုးယၤခိၣ်အံၤအဖီခိၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အပူၤကွံာ်သုးက့ခိၣ်တဖၣ်န့ၣ်ကက့ၤမၤက့ၤတၢ်လၢလီၢ်ခၢၣ်သးမီၤနီၤႉမ့၀ံၤတၢ်ဆီတလဲခီန့ၣ် ခီဖျိခိၣ်နၢ်တဖၣ်အသးၦၢ်ထီၣ်လံအဃိမ့ၢ်တၢ်ဟ့ၣ်က့ၤသးစၢ်တဖၣ်အလီၢ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

မ့ဘၣ်ကွၢ်လၢတၢ်ဆီတလဲခိၣ်နၢ်အလီၢ်အကျဲအံၤအဖီခိၣ်ခီဖျိအ၀ဲသ့ၣ်ဟ့ၣ်သးစၢ်ခိၣ်နၢ်အလီၢ်ဒ်အံၤအဃိ မ့ၢ်တၢ်ဆီတလဲလၢအဂ့ၤတခါအဂ့ၢ်န့ၣ် ၦၤလၢဘူးဒီး(ခ့ၣ်အဲၣ်ယူၣ်)တဂၤ ပဲာ်ထံနီၤဖးစံး၀ဲဒ်အံၤန့ၣ်လီၤႉ

“ခ့ၣ်အဲၣ်ယူၣ်အံၤအိၣ်ဒၣ်လၢကဂ့ၤဒိၣ်ထီၣ်လီၤႉကနးဒိၣ်ထီၣ်ဒုတအိၣ်ဘၣ်ႉတၢ်မၤဒ်အံၤဂ့ၤ၀ဲလီၤႇဘၣ်မနုၤအဃိလဲၣ်န့ၣ် သးစၢ်ခိၣ်နၢ်လၢအထီၣ်ခဲအံၤတဖၣ်မ့ၢ်ခိၣ်နၢ်လၢနထိၣ်ဃူထိၣ်ဖိးတၢ်ဒီးအ၀ဲသ့ၣ်န့ၢ်မီၤနီၤႉတၢ်ဆီတလဲလီၢ်အံၤ တၢတထံၣ်န့ၣ်အ၀ဲသ့ၣ်မၤ၀ဲတကဲလၢၤဘၣ်ႇအသးၦၢ်ထီၣ်လံမီၤနီၤႉခံထံၣ်တထံၣ်န့ၣ်တၢ်ဂ့ၢ်လၢအ၀ဲသ့ၣ်ဘၣ်ကွၢ်ဆၢၣ် မဲာ်၀ဲတဖၣ်မီၤနီၤႉလီၤဆီဒၣ်တၢ်(ကၣ်စံၣ်နိၣ်)တၢ်ဂ့ၢ်မီၤနီၤႉတၢ်အံၤလီၤဂာ်ဒ်သိးတၢ်ဆီတလဲက့ၤအကွဲးလီၤမီၤနီၤ” အဂ့ၢ်န့ၣ် ပဲာ်ထံနီၤဖးစံး၀ဲန့ၣ်လီၤႉ

ခ့ၣ်အဲၣ်ယူၣ် သုးက့(၇)ဘ့ၣ်အကျါ မ့မ့ၢ်(သုးက့ ၁)သုးက့ခိၣ်ခီန့ၣ်မ့ၢ်၀ဲ သုးခိၣ်ကျၢၢ်ဖိ စီၤစိမၠ့ၣ်ထွ့ႇ ဒုးယၤခိၣ် သုးခိၣ်ဒိၣ်စိ စီၤခၠ့ၣ်သူၤႇ (သုးက့ ၂) သုးက့ခိၣ် သုးခိၣ်ကျၢၢ်ဖိ စီၤအီကၢးစ်တံႇ ဒုးယၤခိၣ် သုးခိၣ်ဒိၣ်စိ စီၤပီၤလူၤႇ (သုးက့ ၅)သုးက့ခိၣ် သုးခိၣ်ကျၢၢ်ဖိ စီၤကံၤနွံဒီး ဒုးယၤခိၣ်န့ၣ်မ့ၢ်၀ဲ သုးခိၣ်ဒိၣ်စိ စီၤမီၤဒဲ ၦၤသ့ၣ်တဖၣ်အံၤ လီၢ်လၤတၢ်ဆီတလဲတအိၣ်နီတမံၤ ဘၣ် ဆဲးဟံးထီၣ်ဖီၣ်၀ဲမူဒါဒ်အအိၣ်ပာ်အသိးန့ၣ်လီၤႉ