ပယီၤသုးကျိၤနု၁်လီၤအဃိ ချၢၣ်တကူၣ်တၢၣ်ကမျၢၢ်ဘၣ်ဃ့ၢ်ထီၣ်ကဒီး

လါစဲးပထ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲမဟါလါစဲးပထ့ဘၢၣ် ၁၂ သီအနံၤ ခီဖျိပယီၤသုးကျိၤနုာ်လီၤလၢချၢၣ်တကူၣ်တၢၣ်သ၀ီကရူၢ်ပူၤအဃိ ကမျၢၢ်ၦၤထူလံၤဖိတဖၣ်ဘၣ်ဃ့ၢ်ထီၣ်ကဒီး၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ် လီၤႉ

ဖဲမဟါလါစဲးပထ့ဘၢၣ် ၁၂ သီ ဟါခီ ၃ နၣ်ရံၣ်အဆၢကတီၢ် ပယီၤသုးတဖၣ်အိၣ်ဟဲထီၣ်လၢတလၢၤကီၢ်စဲၣ် မူၣ်ဒိၤကီၢ်ဆၣ် ကစၢၢ်တၢ်လူၢ်တၢ်တြီၤတကပၤဒီး ကၠဲၣ်မယီကီၢ်ဆၣ် တီၤကလ့ ကနၤလိၤသ၀ီတကပၤဒီး ဟဲထီၣ်နုာ်လီၤ ၀ဲဒၣ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ချၢၣ်–တကူၣ်တၢၣ်သ၀ီကရူၢ် မၠိၣ်ဟီသ၀ီပူၤ၀ံၤ နုာ်လီၤအိၣ်ဆီလီၤသးလၢ ကၠိကရၢၢ်ပူၤႇၦၤဟံၣ်ပူၤအဃိကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ်ဒီးဃ့ၢ်ထီၣ်၀ဲဒ်အံၤလီၤအဂ့ၢ်န့ၣ် ၀ီၢ်ရ့ၣ်လီၢ်က၀ီၤကမျၢၢ် စံး၀ဲန့ၣ်လီၤႉ

“ဖဲမဟါကဘၣ်ဖဲဟါခီ ၃ နၣ်ရံၣ်ဘျဲၣ်န့ၣ် ပယီၤသုးဟဲတုၤလၢသ၀ီပူၤမီၤနီၤႉ အဃိၦၤပံးကွံာ်ကၠိတဘျီဃီလီၤႉ အ၀ဲသ့ၣ်နုာ်လီၤအိၣ်လၢကၠိကရၢၢ်ပူၤလၢသ၀ီပူၤႇတၢ်လီၢ်လၢအဂၤနါက့အ၀ဲသ့ၣ်နုာ်လီၤအိၣ်စ့ၢ်လီၤႉအဃိၦၤသ၀ီဖိ တဖၣ်ခီန့ၣ်ပျံၤတၢ်ဘျီဃ့ၢ်ထီၣ်၀ဲန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

စးထီၣ်ဖဲတလါအံၤလါစဲးပထ့ဘၢၣ် ၉ သီအနံၤ ပယီၤသုးကျိၤနုာ်လီၤ၀ဲဒၣ်လၢ(ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤ ဃိၣ်သၢဖျၢၣ်–သရိာ်၀ါကျဲကပၤ သ၀ီပူၤဒီး တလၢၤ–ကညီဟီၣ်က၀ီၤအဆၢ ကစၢၢ်တၢ်လူၢ်တၢ်တြီၤ တကပၤန့ၣ်လီၤႉ ဒီးဖဲန့ၣ်တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒံးအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ကၠၤအ့စ့ၣ်ကၠံ၀့ၢ် ခီၣ်ချ့သုးရ့ၣ်(ခလရ–၃၂)ဒီးသုးခိးကီၢ်ဆၢ(BGF) နီၣ်ဂံၢ်(၁၀၂၁)အၦၤ တဖၣ်နုာ်လီၤအိၣ်၀ဲဒၣ်လၢတကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအံၤန့ၣ်လီၤႉဒီးဖဲန့ၣ်ခီဖျိပၢၤကီၢ်၀ဲၤလီၢ်အံၤတၢ်အီၣ်တၢ်အီတအိၣ်လၢၤဘၣ်အဃိပယီၤသုးတဖၣ်အံၤဖီၣ်၀ဲဒၣ်ကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်တဖၣ်ဒီးမၢတၢ်ဟဲရ့ထီၣ်က့ၤ၀ဲလၢ ဟုသး၀ံၤမးပျၢ်လီၤက့ၤ၀ဲအဂ့ၢ်န့ၣ် သ့ၣ်ညါဘၣ်လၢၦၤလၢပယီၤသုးဖီၣ်အီၤတဖၣ်အအိၣ် န့ၣ်လီၤႉ

ပယီၤသုးလၢအိၣ်တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤတဖၣ်အံၤညီနုၢ်န့ၣ်အ၀ဲသ့ၣ်ခးလီၤကျိဖးဒိၣ်ဆူသ၀ီပူၤတလီၢ် လီၢ်ဒီးဒ်န့ၣ်အသိးတလၢၤကီၢ်စဲၣ် အဘ့ၣ်သ၀ီ မျိာ်သုးရ့ၣ်အံၤစ့ၢ်ကီး ခးစိလီၤ(၁၂၀ မမ),(၁၂၂ မမ)ကျိဖးဒိၣ်တဖၣ်ဆူ သ၀ီပူၤတလီၢ်လီၢ်အဃိဟံၣ်ဃီဟးဂီၤ၀ဲဒီးကမျၢၢ်သံ(၃)ဂၤႇဘၣ်ဒိ၀ဲအဂၤ(၁၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤ ၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ