ပယီၤသုးဒြိယူၤ၀့ၢ်၀ီၤဟးဆှၣ်တၢ်အဃိ ကမျၢၢ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုး

လါစဲးပထ့ဘၢၣ် ၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်အပူၤ ခီဖျိပယီၤသုးအဒြိယူၤ၀့ၢ်၀ီဟးဆှၣ်တၢ်လၢ(၀့စ့ၤ)သ၀ီႇ(မဲဆမ့ၣ်)သ၀ီဖီခိၣ် ကိးမုၢ်နၤဒဲးအဃိ ဘၣ်ယိၣ်လၢမ့ၣ်ပိၢ်ဒီးတၢ်လၢအပိၢ်ဖးထီၣ်သ့တဖၣ်ကလီၤတဲာ်လၢသ၀ီပူၤအဂ့ၢ်န့ၣ် သ၀ီဖိတဖၣ် စံး၀ဲန့ၣ်လီၤႉ

စးထီၣ်ဖဲအပူၤကွံာ်လါယူၤလံထီၣ်အခါ ကဘၣ်အခါဖဲမုၢ်နၤခီ ၁၁ နၣ်ရံၣ်ကိးကတီၢ်ဒဲးဃၣ်ဃၣ်န့ၣ် ပယီၤသုးအဒြိ ယူၤ၀့ၢ်၀ီဟးဆှၣ်တၢ်လၢလူၢ်ပျဲၢ်ကီၢ်ဆၣ် ၀့စ့ၤသ၀ီႇမဲစမ့ၣ်သ၀ီဒီးဒူသ၀ီလၢအိၣ်ဘူးတၢ်ခိၣ်တၢ်ဃၢၤ ဖဲန့ၣ်သ့ၣ်တဖၣ် အဖီခိၣ်အဂ့ၢ်န့ၣ် ၀့စ့ၤလီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

“ဖဲပသ၀ီအံၤဒြိဟဲယူၤကိးမုၢ်နၤဒဲးလီၤႉဟဲယူၤဖဲသ၀ီဖီခိၣ်အံၤတဘျီတခီၣ်အကလုၢ်သီၣ်ဖးဒိၣ်ညါႉတဘျီတခီၣ် ပတနၢ်ဟူစ့ၢ်ဘၣ်ႉအယူၤဒုယူၤကိးမုၢ်နၤဒဲးလီၤႉယဂဲၤလိာ်ကွဲ(က့မ်)လၢမုၢ်နၤခီကိးမုၢ်နၤဒဲးအဃိအဟဲန့ၣ်ယထံၣ် မီၤနီၤႉၦၤသူၣ်က့သးၦၢ်တဖၣ်ဖုးဘၣ်သးႇၦၤဘၣ်ယိၣ်လၢမ့ၣ်ပိၢ်လၢအပိၢ်ဖးထီၣ်သ့မတၤကလီၤတဲာ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဟီၣ်က၀ီၤဖဲန့ၣ်အပူၤတမ့ၢ်လၢဒုးယၤတၢ်ဖ့ၣ်စၢစ့ၢ်ကီးအိၣ်၀ဲဘၣ်ဒီးဘၣ်ဆၣ်ပယီၤသုးအံၤဟးဆှၣ်တၢ်ႇ ဟးအိၣ်ခိးခူသူၣ် တၢ်ဒီးလၢမုၢ်နၤခီန့ၣ်ဟးဆှၣ်တၢ်လၢဒြိအဂ့ၢ်န့ၣ် ၦၤလၢဘူးဒီးပယီၤသုးတဖၣ်စံး၀ဲန့ၣ်လီၤႉ

မဲစမ့ၣ်သ၀ီဖိတဂၤ စံး၀ဲလၢ“ဘၣ်မနုၤအဃိဒြိဘၣ်ဟဲယူၤလဲၣ်ဒုပတသ့ၣ်ညါဘၣ်ႉဒြိယူၤအံၤန့ၢ်ဖးယံၤလံႇ စးထီၣ်လၢလါယူၤလံအခါလံႉၦၤသ၀ီဖိတဖၣ်ဘၣ်ယိၣ်လၢတၢ်ဒုးကကဲထီၣ်မီၤနီၤႉမ့၀ံၤဒြိန့ၣ်ဟဲလၢမုၢ်နၤခီအဃိ ၀ဲဒၣ်နါက့ပဘၣ်ဘၣ်ယိၣ်တၢ်စ့ၢ်ႉဘၣ်ယိၣ်လၢတၢ်ကကဲထီၣ်သးတမံၤမံၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢခ့ၣ်အဲၣ်ယူၣ်တၢ်ပၢဟီၣ်က၀ီၤ ဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤ တၢ်လီၢ်၀ဲန့ၣ်အပူၤ ခံခီခံကပၤဒုးယၤ တၢ်ဖ့ၣ်စၢတအိၣ်၀ဲဘၣ်ႇဘၣ်ဆၣ်ပယီၤသုးအံၤအိၣ်ကတဲၤကတီၤထီၣ်သးဟဲအါထီၣ်၀ဲဒီးမၤ၀ဲလၢအ၀ဲသ့ၣ်တၢ်ပၢ တၢ်ပြး ကဟဲဂ့ၤဒိၣ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်(၂၀၂၃)လါယူၤလံအခါစ့ၢ်ကီး ခီဖျိပယီၤသုးဟးဆှၣ်တၢ်ဒီးသုးသိလ့ၣ်ဖးဒိၣ် လၢလူၢ်ပျဲၢ်၀့ၢ်ဒီး တၢ်ကြဲၢ်ကီၢ်ဆၣ်ပူၤအဃိ လီၢ်က၀ီၤကမျၢၢ်တဖၣ်ဘၣ်ယိၣ်၀ဲလၢတၢ်ဒုးကကဲထီၣ်လၢဟီၣ်က၀ီၤပူၤ ဒံးန့ၣ်လီၤႉ