ဘံလ့ကီၢ်ဆၣ် အလူလ့သ၀ီပူၤ တၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးပ၁်ဖှိၣ်အဘၢၣ်စၢၤ

လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတလၢၤကီၢ်စဲၣ် ဘံလ့ကီၢ်ဆၣ် အလူလ့သ၀ီ ကျဲမုၢ်ကပၤ ဖဲမဟါလါစဲးပထ့ဘၢၣ် ၄ သီ ဂီၤခီ ၈း၃၀ အဆၢကတီၢ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤ အဂ့ၢ်န့ၣ် သ့ၣ်ညါဘၣ်လၢဘံလ့တၢ်ဒီသဒၢကမျၢၢ်သုးအအိၣ်န့ၣ်လီၤႉ

ပယီၤသုးကျိၤလၢအနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်အံၤဒီး(KNLA)ႇသူၤရံၣ်ယၣ်သုးကျိၤသုးပာ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲဒီးတကီၢ်ခါခဲအံၤတၢ်လီၢ်လၢတၢ်ဒုးကဲထီၣ်အလီၢ်န့ၣ်ပယီၤသုးမၤအါထီၣ်တၢ်ဘံတၢ်ဘၢႇ ခးလီၤကျိဖးဒိၣ်ဆူသ၀ီတဖၣ်အပူၤအဂ့ၢ်န့ၣ် ဘံလ့တၢ်ဒီသဒၢကမျၢၢ်သုး မူဒါခိၣ် စံး၀ဲဒ်အံၤန့ၣ်လီၤႉ

“ဖဲတၢ်ဒုးကဲထီၣ်အလီၢ်န့ၣ်ပယီၤသုးထီထီၣ်၀ဲဒၣ်ခံလဲးမးကျိဖးဒိၣ်အပျီတဖၣ်ဒီးမ့၀ံၤအ၀ဲသ့ၣ်အိၣ်ခိးတၢ်ဘံၣ်တၢ်ဘၢ ဖဲတၢ်ခိၣ်တၢ်ဃၢၤဖဲန့ၣ်ကအိၣ်လၢအဂၤ(၁၀၀)ဃၣ်ဃၣ်ညါႉတၢ်ဒုးန့ၣ်ကဲထီၣ်လၢအလူလ့သ၀ီပူၤအဃိ အ၀ဲသ့ၣ်ခးလီၤ ကျိဖးဒိၣ်ဆူအလူကၠံသ၀ီကပၤၦၢ်ကျဲတကပၤန့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

တကးဒံးဘၣ်အမဲာ်ညါခီဖျိပယီၤသုးအံၤခးလီၤကျိဖးဒိၣ်ဆူသ၀ီပူၤလၢအတဘၣ်ဃးတၢ်ဒုးကဲထီၣ်အလီၢ်ဘၣ်အံၤ အဃိ သ၀ီပူၤကမျၢၢ်တဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် တၢ်ဒီသဒၢကမျၢၢ်သုးစံး၀ဲန့ၣ်လီၤႉ

တၢ်ဒုးကဲထီၣ်လၢ(အလူလ့)သ၀ီအခါန့ၣ်ပယီၤသုးတကပၤသံဘၣ်ဒိဘၣ်ထံးအိၣ်၀ဲအသိးသူၤရံၣ်ယၣ်သုးကျိၤတကပၤ စ့ၢ်ကီးဘၣ်ဟ့ၣ်လီၤကွံာ်အသးသမူ(၃)ဂၤအဂ့ၢ်န့ၣ် သူၤရံၣ်ယၣ်သုးကျိၤ ၦၤဘၣ်မူဘၣ်ဒါတဂၤ ပာ်ဂၢၢ်ပာ်ကျၢၤ စံးဘၣ် ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ“တၢ်ဒုးကဲထီၣ်လၢ(အလူလ့)သ၀ီ ကျဲကပၤန့ၣ်မီၤနီၤႉ ဒုၣ်ဒါတကပၤတၢ်သံတၢ်ဘၣ်ဒိဘၣ်ထံး အိၣ်အသိးလၢပ၀ဲဒၣ်တကပၤစ့ၢ်ကီးပၦၤဘၣ်လုၢ်ထီၣ်ကွံာ်အသးသမူလၢထံကီၢ်အဂီၢ်(၃)ဂၤစ့ၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်လါအ့ဖြ့ၣ် ၁၂ သီအခါစ့ၢ်ကီး ပယီၤသုးနုာ်လီၤ၀ဲလၢ(အလူလ့)သ၀ီကရူၢ်ပူၤ ဒွဲၣ်အူအီၣ်ကွံာ်၀ဲဟံၣ် (၃)ဖျၢၣ် တကးဒံးဘၣ် ဖီၣ်က့ၤကိး၀ဲကမျၢၢ်တဂၤဒီးဟံ၀ဲဒၣ်ကမျၢၢ်သိလ့ၣ်ႇသိလ့ၣ်ယီၢ်(ဆဲးကဲး) ၆ ခိၣ်ညါအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါတ့ၢ်၀ဲန့ၣ်လီၤႉ

ဒ်န့ၣ်အသိးလၢတလၢၤကီၢ်စဲၣ် ဘံလ့ႇကၠဲးထိၣ်ဒီးသထူၣ်၀့ၢ်ခိၣ်၀့ၢ်ဃၢၤတၢ်လီၢ်တဖၣ်န့ၣ် ဟီၣ်က၀ီၤ(KNLA), သူၤရံၣ်ယၣ်သုးကျိၤႇ ဘံလ့တၢ်ဒီသဒၢကမျၢၢ်သုးကရူၢ်ႇ ယ့ဘလူကရူၢ်ႇ ပအိၣ်တၢ်ဒီသဒၢကမျၢၢ်သုးကရူၢ်(PPDF-KD), ကၠဲးထိၣ်တၢ်ပၢၢ်ဆၢကရူၢ်(KRF)ႇ တပ့ၤစွ့ၤထံသုးကျိၤႇသထူၣ်တၢ်ဒီသဒၢကမျၢၢ်သုးကရူၢ်သ့ၣ်တဖၣ်အံၤ ဟူးဂဲၤ၀ဲဒီး တၢ်ဒုးကဲထီၣ်၀ဲဒီးပယီၤသုးခဲအံၤခဲအံၤန့ၣ်လီၤႉ