လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်
သုးကီၣ်ကးဆီတလဲတီၣ်ထီၣ် ကညီကီၢ်စဲၣ်ဃုာ်ဒီးကီၢ်စဲၣ်ဒီးကီၢ်ဒိၣ်(၄)ဘ့ၣ်ပူၤ ဘံၣ်ဘၢဒီးကီၢ်ဆၢဂ့ၢ်၀ီကိတိာ် တဖၣ်အဖီခိၣ်အံၤဒုးယၤတၢ်ဖ့ၣ်စၢဆူၣ်ထီၣ်သ့၀ဲလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤ အဂ့ၢ်န့ၣ် ကရၢၦၤကတိၤတၢ်ပၢ ပဒိၣ်စီၤကျၢၤစ့ ပဲာ်ထံနီၤဖးစံး၀ဲန့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၁ သီအနံၤ သုးကီၣ်ကးထုးထီၣ်ပာ်ဖျါလံာ်တၢ်ကလုၢ်လၢ ဘံၣ်ဘၢဒီးကီၢ်ဆၢကိတိာ် လၢအလီၤဘၣ်မူဒါဖဲကခၠ့ၣ်ကီၢ်စဲၣ်ႇကရ့ၣ်နံၣ်ကီၢ်စဲၣ်ႇကညီကီၢ်စဲၣ်ႇခၠီကီၢ်စဲၣ်ဒီးမါတလ့ကီၢ်ဒိၣ်သ့ၣ်တဖၣ်အံၤ တၢ်ကဆီတလဲ၀ဲအလီၢ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်သုးကီၣ်ကးထုးထီၣ်ပာ်ဖျါ၀ဲအသိးန့ၣ် ကခၠ့ၣ်ကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ အီၤကၠံၤလ့အလီၢ်န့ၣ် တၢ်ကပာ်ထီၣ်၀ဲ သုးခိၣ်ဒိၣ်စိ ကၠီၤသူၤယၣ်ႇ ကရ့ၣ်နံၣ်ကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ မၠ့ၣ်၀့ၤအလီၢ်န့ၣ် တၢ်ကပာ်ထီၣ်က့ၤ၀ဲ သုးခိၣ်ဒိၣ်စိ သါစိအီၤႇ ကညီကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ မၠိမ့နီၤအလီၢ်န့ၣ် တၢ်ကပာ်ထီၣ်၀ဲ သုးခိၣ်ဒိၣ်စိ မ့သူၤကၠီၤႇ ခၠီကီၢ်စဲၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ ဟၤ၀့အီၤအလီၢ်န့ၣ် တၢ်ကတီၣ်ထီၣ်က့ၤ၀ဲ သုးခိၣ်ဒိၣ်စိ သ့ထိအီၤဒီး မါတလ့ကီၢ်ဒိၣ် ဘံၣ်ဘၢဒီးကီၢ်ဆၢကိတိာ် သုးခိၣ်ဒိၣ်စိ ကၠီၤကၠီၤမ့ အလီၢ်န့ၣ် တၢ်ကပာ်ထီၣ်က့ၤ၀ဲလၢသုးခိၣ်ဒိၣ်စိ န့ၤလ့စိသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ် လီၤႉ
(ခ့ၣ်အဲၣ်ယူၣ်)ၦၤကတိၤတၢ်ပၢ ပဒိၣ်စီၤကျၢၤစ့စံး၀ဲလၢ“ကိတိာ်ဆီတလဲသးဂ့ၤႇတဆီတလဲသးဂ့ၤ ခဲအံၤလၢပ (ခ့ၣ်အဲၣ်ယူၣ်)ဟီၣ်က၀ီၤပူၤအံၤဒ်ပသ့ၣ်ညါအသိးန့ၣ်သုးကီၣ်ကးအဲၣ်ဒိးဆီတလဲဒုးယၤတၢ်အိၣ်သးမီၤနီၤႉ အ၀ဲသ့ၣ်မၤအါထီၣ်ဒုးယၤတၢ်ဟူးတၢ်ဂဲၤစ့ၢ်ကီးပထံၣ်အီၤလီၤမီၤနီၤႉဘံၣ်ဘၢဒီးကီၢ်ဆၢကိတိာ်ဆီတလဲသးနါက့ လ့ၤတက့ၤတမ့ၢ်လၢတၢ်ကမုာ် ကခုၣ်ထီၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါဒ်သုးကီၣ်သးအတၢ်အိၣ်သးခဲအံၤအသိးန့ၣ်တၢ်ဆီတလဲကိတိာ်အံၤမ့ၢ်တၢ်ဆီတလဲဒ်တၢ်မၤညီနုၢ်၀ဲအသိးသ့၀ဲဒီးဒ်န့ၣ်အသိးဆီတလဲ၀ဲလၢအ၀ဲသ့ၣ်တၢ်ဖံးတၢ်မၤကဂ့ၤဒိၣ်ထီၣ်အဂီၢ်စ့ၢ်ကီးသ့၀ဲအဂ့ၢ်န့ၣ် ပဒိၣ်စီၤကျၢၤစ့ စံးအါထီၣ်၀ဲန့ၣ်လီၤႉ
ဒ်န့ၣ်အသိးသုးကီၣ်ကးအတၢ်ဆီတလဲဘံၣ်ဘၢဒီးကီၢ်ဆၢကိတိာ်အံၤတမ့ၢ်ထဲလၢကရ့ၣ်နံၣ်ကီၢ်စဲၣ်တဘ့ၣ်ပူၤဘၣ်ဒီး မ့မ့ၢ်တခီဒ်တၢ်လိၣ်အိၣ်အသိးဆီတလဲ၀ဲဒီဒူၣ်ညါဒီး ခီဖျိသုးကီၣ်ကးတကပၤသံဘၣ်ဒိဘၣ်ထံးအါအဃိ ဒ်ဒုးယၤတၢ်မၤရဲၣ်ကျဲၤခိၣ်သ့ၣ်အသိးဆီတလဲ၀ဲလီၤအဂ့ၢ်န့ၣ် ကရ့ၣ်နံၣ်ဒီကလုာ်တၢ်လဲၤထီၣ်လဲၤထီပၣ်တံၣ်(KNPP) နဲၣ်ရွဲၣ်–၂ အူအီၤဆါမၠ့ၣ် စ့ၢ်ကီး စံး၀ဲဒ်အံၤန့ၣ်လီၤႉ
“လၢပဟီၣ်က၀ီၤပူၤအံၤသုးကီၣ်ကးမၤဆူၣ်ထီၣ်ဒုးယၤတၢ်ဟူးတၢ်ဂဲၤကွ့ၢ်ကွ့ၢ်လီၤႉခးလီၤကျိဖးဒိၣ်ႇကဘီယူၤဟဲခးလီၤတၢ်ကိးမုၢ်နံၤဒဲးလီၤႉမ့၀ံၤတၢ်ဒုးကဲထီၣ်တအိၣ်ဘၣ်နါက့ဟဲခးလီၤတၢ်လၢဘၣ်ကီဘၣ်ခဲလီၢ်အိၣ်ကမှံအလီၢ် တၢ်နးန့ၢ်အ၀ဲအံၤ တအိၣ်လၢၤဘၣ်”အဂ့ၢ်န့ၣ် အူအီၤဆါမၠ့ၣ် စံး၀ဲန့ၣ်လီၤႉ
ဒ်န့ၣ်အသိးသုးကီၣ်ကးမၤအါထီၣ်ကဒီး၀ဲဂ့ၢ်ဂီၢ်အူကတီၢ်မုၢ်နံၤမုၢ်သီ(၆)လါ၀ံၤလီၢ်ခံ ဖဲအပူၤကွံာ်လါအီကူး အတီၢ်ပူၤန့ၣ် အ၀ဲသ့ၣ်ဆီတလဲတီၣ်ထီၣ်ဒံးစ့ၢ်ကီး၀ဲတၢ်ဒီသဒၢဒီးထံလီၢ်ကီၢ်ပူၤဂ့ၢ်၀ီကိတိာ်အလီၢ်သ့ၣ်တဖၣ်ဒီးႇဒ်န့ၣ်အသိးတနံၣ်အံၤ နံၣ်တ၀ာ်အခါစ့ၢ်ကီး သုးခိၣ်ဒိၣ်စိဒီးသုးခိၣ်စိအပတီၢ်သ့ၣ်တဖၣ် ဘၣ်ဆီတလဲဟံးထီၣ်ဖီၣ်ထီၣ်က့ၤမူဒါဆူ ဂံၢ်ခီၣ်ထံး ကမျၢၢ်ကိတိာ်၀ဲၤကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
