Home တၢ်ကစီၣ် မၠၣ်၀တံၣ်–ကီးတရံးအ့ရှါကျဲဒီတကျိၤ တလါအတီၢ်ပူၤ ပယီၤသုးသံ(၃၁)ဂၤႇ ဘၣ်ဒိ(၂၆)ဂၤ

မၠၣ်၀တံၣ်–ကီးတရံးအ့ရှါကျဲဒီတကျိၤ တလါအတီၢ်ပူၤ ပယီၤသုးသံ(၃၁)ဂၤႇ ဘၣ်ဒိ(၂၆)ဂၤ

211
0
Photo: Crd.

လါစဲးပထ့ဘၢၣ် ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်

ကီးတရံး–မၠၣ်တ၀ံၣ်အ့ရှါကျဲဒီတကျိၤ တလါအတီၢ်ပူၤ ပယီၤသုးတကပၤသံ(၃၁)ဂၤဒီး ဘၣ်ဒိ(၂၆)ဂၤအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၁၄ သီ အနံၤ န့ၣ်လီၤႉ

သုးကီၣ်ကးအံၤဟ့ၣ်ထီၣ်တၢ်ဂ့ၢ်လၢကဘှီဂ့ၤထီၣ်အ့ရှါကျဲအံၤဒီးအ၀ဲသ့ၣ်နုာ်လီၤမၤ၀ဲဒုးယၤတၢ်ဟူးတၢ်ဂဲၤအဃိ တၢ်ဒုးကဲထီၣ်ဒီးခ့ၣ်အဲၣ်ယူၣ်(သုးက့ ၆) သုးရ့ၣ် ၁၈ အၦၤဒီး တၢ်ခးစဲးပြဲးပယီၤသုးကဲထီၣ်ခဲလၢာ်အိၣ်၀ဲ ၁၂ ဘျီ ဖဲန့ၣ်ပယီၤသုးတကပၤသံ၀ဲ(၃၁)ဂၤႇ ဘၣ်ဒိ၂၆ ဂၤဒီး ဒ်န့ၣ်အသိးပယီၤသုးအသိလ့ၣ်ဟးဂီၤ၀ဲဒၣ်(၇)ခိၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လၢကီးတရံး–မၠၣ်၀တံၣ်အ့ရှါကျဲ တီနီၢ်ထံလီၤဆှူကပၤ စးထီၣ်လၢဟီၣ်ခိၣ်လာ်ကဲထီၣ်၀ံၤလီၢ်ခံ သုးကီၣ်ကးအံၤ ဟ့ၣ်ထီၣ်တၢ်ဂ့ၢ်လၢကဘှီဂ့ၤထီၣ်ကျဲဒီးခီဖျိအ၀ဲသ့ၣ်နုာ်လီၤအိၣ်လၢသ၀ီပူၤအဃိၦၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီး တုၤလၢခဲအံၤၦၤက့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် ယွၤသ့ၣ်ကိသ၀ီဖိတဖၣ် စံး၀ဲန့ၣ်လီၤႉ

Photo: Crd.

သ၀ီဖိတဂၤစံး၀ဲလၢ“ကျဲဟးဂီၤဘျီပယီၤသုးဟဲထီၣ်ႇမ့၀ံၤတၢ်ဒုးကဲထီၣ်၀ဲဒီးတၢ်ပၢၢ်ဆၢသုးကရူၢ် လၢသ၀ီကပၤမီၤနီၤႉ အဃိၦၤသ၀ီဖိဃ့ၢ်ထီၣ်ခဲလၢာ်လီၤႉပယီၤသုးအိၣ်လၢသ၀ီပူၤတုၤလၢခဲအံၤလီၤႉၦၤသ၀ီဖိတနီၤ န့ၣ်ဟဲက့ၤအိၣ်လၢ သ၀ီပူၤတဘူၣ်ဒံးဘၣ်အ၀ဲသ့ၣ်ဟးပလဲာ်သးအဖၢမုၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

ကီးတရံး–မၠၣ်၀တံၣ်အ့ရှါကျဲအံၤ လၢသုးကီၣ်ကးအမုၢ်ကျိၤ၀ဲၤကွာ်အဂီၢ်မ့ၢ်ဂ့ၤႇလၢသုးဂ့ၢ်၀ီတကပၤအဂီၢ်မ့ၢ်ဂ့ၤႇ တၢ်ဆှၢထီၣ်ဆှၢလီၤတၢ်ဆဲးကျိးတကပၤမ့ၢ်ဂ့ၤ မ့ၢ်ကျဲတဘိလၢအရ့ဒိၣ်၀ဲဒိၣ်မးလၢသုးကီၣ်ကးအဂီၢ်န့ၣ်လီၤႉ လၢတၢ်န့ၣ်အဃိကမျၢၢ်လၢအလ့ၢ်ထီၣ်လ့ၢ်လိၤလၢကျဲအံၤတဖၣ်ကထီဒါသုးကီၣ်ကးအတၢ်ဖံးတၢ်မၤသနူတဖၣ် အံၤဒီးကပာ်ဖှိၣ်ဖီၣ်လိာ်စုမၤသကိးတၢ်ဒီး ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအဂ့ၢ်န့ၣ် ဒူပျာ်ယာ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

တလါအတီၢ်ပူၤဖဲတၢ်ဒုးကဲထီၣ်လၢခံခီခံကပၤအဘၢၣ်စၢၤဒီးတၢ်ဒုးစဲးပြဲးအခါန့ၣ် (KNLA) သုးရ့ၣ် ၁၈ ဒီး တၢ်ပၢၢ်ဆၢသုးပာ်ဖှိၣ်တကပၤ ဘၣ်ဟ့ၣ်လီၤကွံာ်အသးသမူ(၄)ဂၤႇဘၣ်ဒိ(၁)ဂၤအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ