လါစဲးပထ့ဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ သုးကီၣ်ကးအံၤ သူ၀ဲကဘီယူၤ ပညိၣ်ဟဲခးလီၤတၢ်လၢကမျၢၢ်အဟံၣ်အဃီႇကၠိတၢ်သူၣ်ထီၣ်အပူၤဒီးလၢတၢ်န့ၣ်အဃိထံဂုၤကီၢ်ဂၤတၢ်ကရၢကရိတဖၣ် ကဖီၣ်ဃံးဆူၣ်ထီၣ်သုးကီၣ်ကးအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါဃ့ထီၣ်၀ဲ ဖဲလါစဲးပထ့ဘၢၣ် ၁၁ သီအနံၤန့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၇ သီအနံၤ လၢတသီအတီၢ်ပူၤ ပယီၤသုးကဘီယူၤဟဲခးလီၤတၢ်လၢမုၢ်တြီၢ်ကီၢ်ရ့ၣ် လူၤသီကီၢ်ဆၣ်ဒီးဒွဲၣ်လိကီၢ်ဆၣ်ပူၤ တၢ်လီၢ်(၃)တီၤဒီး ဖဲန့ၣ်ကမျၢၢ်အဟံၣ်အဃီႇကၠိႇတၢ်ဘူၣ်တၢ်ဘါတၢ်သူၣ်ထီၣ် တဖၣ်ဟးဂီၤ၀ဲဒီးဘၣ်သံ၀ဲဒၣ်ကၠိသရၣ်(၁)ဂၤဒီးၦၤကၠိဖိ(၄)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ
ဘၣ်ဃးပယီၤသုးကဘီယူၤဟဲခးလီၤတၢ်လၢ(ခ့ၣ်အဲၣ်ယူၣ်)ဟီၣ်က၀ီၤကၠိတၢ်ဂ့ၢ်အံၤ ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲလၢ“ပမ့ကွၢ်ကဒါက့ၤလိၤလိၤန့ၣ်တၢတထံၣ်န့ၣ်အဲၣ်ဒိးမၤဟးဂီၤ၀ဲဒၣ် ပဖိပလံၤတၢ်ကူၣ်ဘၣ် ကူၣ်သ့ဒီးတၢ်ရဲၣ်တၢ်ကျဲၤလၢ(KECD)တၢ်ကူၣ်ဘၣ်ကူၣ်သ့အကျိၤအကျဲသ့ၣ်တဖၣ်န့ၣ်မီၤနီၤႉခီဖျိအ၀ဲသ့ၣ်မၤ၀ဲဒ်အံၤအဃိသ၀ီ(၆)ဖျၢၣ်ၦၤသ၀ီဖိဘၣ်ဃ့ၢ်ထီၣ်၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်လီၢ်(၃)တီၤလၢကဘီယူၤဟဲခးလီၤတၢ်အံၤန့ၣ်မ့ၢ်၀ဲ လူၤသၤကီၢ်ဆၣ် ခ့ပူၤကရူၢ် သ့ၣ်သူခံသ၀ီႇ လၢၢ်မုၢ်ပျီကရူၢ် ကီာ်ရီၤဘီသ၀ီႇ ဒွဲၣ်လိကီၢ်ဆၣ် နါကိၢ်ခံကရူၢ် ထံကီာ်ထၣ်သ၀ီတဖၣ်ဒီး ခီဖျိပယီၤသုးအံၤပညိၣ်ခးလီၤတၢ်လိၤလိၤ လီၤအဃိကၠိသရၣ်ဒီးၦၤကၠိဖိသံ၀ဲခဲလၢာ်(၅)ဂၤတကးဒံးဘၣ်ကၠိသရၣ်မုၣ်(၁)ဂၤဒီးၦၤကၠိဖိ(၅)ဂၤဘၣ်ဒိဘၣ်ထံး၀ဲ အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လါစဲးပထ့ဘၢၣ် ၇ သီအခါ ခီဖျိပယီၤသုးကဘီယူၤဟဲခးလီၤတၢ်အဃိ ကၠိ(၁)ဖျၢၣ်ႇဟံၣ်ဒွဲ(၁)ဖျၢၣ်ႇ တၢ်ဘါယွၤသရိာ်(၁)ဖျၢၣ်ႇ တၢ်ထုကဖၣ်ဒၢး(၁)ဖျၢၣ်ဒီးကမျၢၢ်အဟံၣ်အဖျၢၣ်(၁၀)ဟးဂီၤ၀ဲအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ
လၢန့ၣ်အမဲာ်ညါသုးကီၣ်ကးအံၤလုၢ်သ့ၣ်ခါပတာ်မၤကမၣ်၀ဲဒုးယၤကွီၢ်မ့ၣ်ဒီးထီၣ်ဒုးကမျၢၢ်လၢကဘီယူၤဒ်အံၤ မ့ၢ်တၢ်လုၢ်သ့ၣ်ခါပတာ်တၢ်သိၣ်တၢ်သီအဃိဟီၣ်ခိၣ်ဒီဘ့ၣ်ဘီမုၢ်စၢဖှိၣ်ကရၢႇဘီမုၢ်စၢဖှိၣ်ကရၢ ထံကီၢ်တဖၣ်မ့ၢ်ဂ့ၤႇ ထံဂုၤကီၢ်ဂၤကျဲသနူမ့ၢ်ဂ့ၤႇဟီၣ်က၀ီၤပူၤတၢ်ကရၢကရိတဖၣ်လၢအမ့ၢ်(အၣ်စံၣ်ယၣ်)ဒီးအ၀ဲသ့ၣ်ကရၢဖိထံကီၢ်တဖၣ်ႇ ဃုာ်ဒီးထံဂုၤကီၢ်ဂၤၦၤဂ့ၢ်၀ီခွဲးယာ်တၢ်ကရၢကရိတဖၣ်ကဖီၣ်ဃံးဟံးအရ့အါထီၣ်အဂ့ၢ်န့ၣ် ခ့ၣ်အဲၣ်ယူၣ် ဃ့ထီၣ်၀ဲန့ၣ်လီၤႉ
ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စ့ၢ်ကီးစံး၀ဲလၢ“လီၤဆီဒၣ်တၢ် ကၠိတၢ်သူၣ်ထီၣ်ဟူဂီၤႇ ကၠိသရၣ်၊မုၣ်သံဘၣ်ဒိဘၣ်ထံးအံၤမ့ၢ်တၢ်မၤကမၣ်၀ဲတၢ်ကူၣ်ဘၣ်ကူၣ်သ့အခွဲးအယာ်လီၤမီၤနီၤႉမ့၀ံၤမ့ၢ်တၢ်မၤကမၣ်စ့ၢ်ကီးၦၤဖိသၣ်အခွဲးအယာ်ႉအ၀ဲသ့ၣ်ခး၀ဲဒၣ်ကၠိႇဟံၣ်ႇတၢ်ဆါဟံၣ်ႇတၢ်ဘူၣ်တၢ်ဘါတၢ်သူၣ်ထီၣ်တဖၣ်အံၤမ့ၢ်တၢ်လုၢ် သ့ၣ်ခါပတာ်မၤကမၣ်၀ဲဒုးယၤကွီၢ်မ့ၣ်န့ၣ်လီၤႉမ့၀ံၤမ့ၢ်တၢ်လုၢ်သ့ၣ်ခါပတာ်၀ဲဒၣ်ထံဂုၤကီၢ်ဂၤၦၤဂ့ၢ်၀ီတၢ်ဆီၣ်ထွဲမၤစၢၤတၢ်သိၣ်တၢ်သီန့ၣ်လီၤႉတၢ်သ့ၣ်တဖၣ်အံၤမ့ၢ်တၢ်လုၢ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ်ဒိၣ်ဒိၣ်မုၢ်မုၢ်အဃိအ၀ဲသ့ၣ် န့ၣ်ကဘၣ်ဟံမူဒါႇတၢ်ကဘၣ်ဟ့ၣ်တၢ်ကမၣ်ဒီးတၢ်ကဘၣ်ဟံအရ့မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
(၂၀၂၁)စးထီၣ်လၢသုးဟံးန့ၢ်တၢ်စိတၢ်ကမီၤအခါန့ၣ်ပယီၤသုးကဘီယူၤဟဲခးလီၤတၢ်လၢကီၢ်ပယီၤမုၢ်ထီၣ် ကလံၤ ထံးကၠိတၢ်သူၣ်ထီၣ်ခဲလၢာ်အိၣ်၀ဲ(၂၄)ဘျီဒီး ဖဲန့ၣ်ကၠိတၢ်သူၣ်ထီၣ်ဟးဂီၤ၀ဲ(၃၇)ဖျၢၣ်အဂ့ၢ်န့ၣ် (KHRG)ထုးထီၣ်ပာ်ဖျါ စံး၀ဲဖဲအပူၤကွံာ်လါစဲးပထ့ဘၢၣ် ၉ သီ လၢအလီၤဘၣ်၀ဲဟီၣ်ခိၣ်ဒီဘ့ၣ် တၢ်တြီဆၢဒီသဒၢတၢ်ထီၣ်ဒုးတၢ်ကူၣ်ဘၣ်ကူၣ်သ့ အမုၢ်နံၤအံၤအခါန့ၣ်လီၤႉ
