တလါအတီၢ်ပူၤသုးကီၣ်ကးသူတၢ်စုဆူၣ်ခီၣ်တကးလၢၦၤဖိဒံဖိသၣ်အဖီခိၣ်ကဲထီၣ်အိၣ်အခါ(၂၀)ဘျဲၣ်

လါအီးကထိဘၢၣ် ၄ သီႇ ၂၀၂၃ နံၣ်ႇ ခ့ၣ်အဲးစံၣ်

တနံၣ်အံၤ(၂၀၂၃)လါစဲးပထ့ဘၢၣ်တလါတီၢ်ပူၤ ခီဖျိပယီၤသုးသူတၢ်စုဆူၣ်ခီၣ်တကးအဃိ (၁၈)နံၣ်ဆူဖီလာ် ၦၤဖိဒံဖိသၣ်သံကဲထီၣ်အိၣ်၀ဲဒၣ်(၂၃)ခါအဂ့ၢ်န့ၣ် (New Myanmar Foundation-NMF)အ Human Rights Program-ၦၤဂ့ၢ်၀ီခွဲးယာ်တၢ်ရဲၣ်တၢ်ကျဲၤ ပာ်ဖျါ၀ဲဖဲလါအီးကထိဘၢၣ် ၂ သီအနံၤန့ၣ်လီၤႉ

(NMF)အတၢ်ပာ်ဖျါအပူၤ ၦၤဖိဒံဖိသၣ်သံဘၣ်ဒိဘၣ်ထံးကဲထီၣ်တဖၣ်အကျါ လၢစကဲကီၢ်ခီဒိၣ်ႇပကိကီၢ်ခီဒိၣ်ဒီး ကညီကီၢ်စဲၣ်တဖၣ်အပူၤ ခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်လၢကၠိႇဟံၣ်ဖီခိၣ်အဃိ ၦၤဖိဒံဖိသၣ် သံဘၣ်ဒိဘၣ်ထံးအနီၣ်ဂံၢ်ဟဲအါထီၣ်၀ဲအဂ့ၢ်န့ၣ် ပာ်ဖျါ၀ဲန့ၣ်လီၤႉ

ဖဲန့ၣ်အကျါလၢစကဲကီၢ်ခီဒိၣ် ၀ိသိၤကီၢ်ဆၣ်အပူၤ ခီဖျိပယီၤသုးကဘီယူၤဟဲခးလီၤတၢ်အဃိ ၦၤဖိသၣ်အနံၣ်(၁၀)တဂၤဒီး ကညီကီၢ်စဲၣ် ဖၣ်ပူၣ်ကီၢ်ဆၣ် ထံဂီၤထၣ် ကၠိ ၦၤကၠိဖိ(၄)ဂၤ သံ၀ဲဒၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

ကီၢ်ဆၣ်လၢအိၣ်ဖျါတၢ်ဖီခိၣ်တဖၣ်အံၤဒီးပကိကီၢ်ခီဒိၣ် ဆီထံးကီၢ်ဆၣ်အပူၤ ၦၤဖိဒံဖိသၣ်ဘၣ်ဒိဘၣ်ထံးခဲလၢာ် (၃၁)ဂၤအကျါပၣ်ဃုာ်ၦၤဖိသၣ်(၆)လါဒီးၦၤဖိသၣ်(၈)နံၣ် ၂ ဂၤအဂ့ၢ်န့ၣ် တၢ်ထုးထီၣ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ

“လၢပအိၣ်တကပၤအံၤပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်ဒီးပယီၤသုးဒိးလီၤမ့ၣ်ပိၢ်အဃိ ၦၤဖိသၣ်သံဘၣ်ဒိဘၣ်ထံးအိၣ်ႉပယီၤသုးမ့ခးတၢ်န့ၣ်ခးနါစိၤတၢ်အဃိၦၤဘၣ်ဒီးကျိၦၤသံလၢဟံၣ်န့ၣ်အါမီၤနီၤႉ အ၀ဲသ့ၣ်က့ၤလၢကျဲနါက့ဒိးလီၤဃာ်ဟီၣ်လာ်မ့ၣ်ပိၢ်အဃိၦၤဖိဒံဖိသၣ်လၢအဃ့ၢ်တၢ်ဒုးတဖၣ် ဖဲအ၀ဲသ့ၣ်က့ၤဟံ အီၣ်ဟုသးက့ၤလၢကျဲအခါယီၢ်ဘၣ်၀ဲဒၣ်ဒ်န့ၣ်အိၣ်မီၤနီၤ”အဂ့ၢ်န့ၣ် ပကိကီၢ်ခီဒိၣ် ချၢၣ်လွံၢ်ထူၣ်ကီၢ်ရ့ၣ် လီၢ်က၀ီၤပိာ်မုၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ တနံၣ်အံၤ(၂၀၂၃)ဒီတကတီၢ် ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အါအါဂီၢ်ဂီၢ်အဃိ ကၠိတဖၣ်ဘၣ်ပံးအိးထီၣ်တလီၢ်လီၢ်ဒီးၦၤဖိဒံဖိသၣ်တဖၣ်တၢ်မၤလိမၤဒိးစဲးခံ၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဂံၢ်ခီၣ်ထံး တၢ်ကစီၣ်အအိၣ်န့ၣ်လီၤႉ

လၢတၢ်န့ၣ်အဃိသုးကီၣ်ကးလၢအလုၢ်သ့ၣ်ခါပတာ်မၤကမၣ်ထံဂုၤကီၢ်သးၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲစး တဖၣ်အံၤဒီးအစုတီၤဖီလာ်ကရူၢ်တဖၣ်အတၢ်ဟံးမူဒါကဟဲအိၣ်ဖျါထီၣ်လၢအဆိအချ့အဂီၢ် ကဖီၣ်ဃံးဟံးဂ့ၢ်၀ီအ၀ဲသ့ၣ်တုၤလီၤတီၤလီၤအဂ့ၢ်န့ၣ် (NMF)ဆီၣ်တခူထီၣ်၀ဲဘီမုၢ်စၢဖှိၣ်ကရၢဃုာ်ဒီးထံဂုၤကီၢ်ဂၤ တၢ်ကရၢကရိသ့ၣ်တဖၣ်န့ၣ်လီၤႉ

(NMF)အံၤအိၣ်ဆီလီၤသးလၢကီၢ်ကၠီၣ်တဲၣ် မဲၢ်ဆီး၀့ၢ်အပူၤဒီး ကရၢအံၤဟူးဂဲၤမၤတၢ်လၢၦၤဂ့ၢ်၀ီတၢ်တိစၢၤမၤစၢၤဒီး တကးဒံးဘၣ်မၤစၢၤ၀ဲဒၣ်ၦၤကီၢ်ပယီၤဖိလၢအထီဒါသုးမီၤစိရိၤလၢအဟဲစံၣ်ထီၣ်အိၣ်လၢကီၢ်ကၠီၣ်တဲၣ်ပူၤတဖၣ်အံၤလၢတၢ်အီၣ်တၢ်အီတၢ််ဆီၣ်ထွဲမၤစၢၤဒီးတၢ်ဖံးတၢ်မၤခွဲးယာ်အကျဲသ့ၣ်တဖၣ်န့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤစ့ၢ်ကီးခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤ တၢ်အဃိ ၦၤဖိဒံဖိသၣ်သံကအိၣ်လၢ(၂၅)ဂၤညါဒီးဘၣ်ဒိ၀ဲဒၣ်(၁၉)ဂၤအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG) စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲအပူၤကွံာ်လါအ့ဖြ့ၣ်အခါန့ၣ်လီၤႉ