လါအီးကထိဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲအပူၤကွံာ်လါစဲးပထ့ဘၢၣ်ဘူးကလၢာ်န့ၣ် တၢ်ထီၣ်မၤဆှဲကွံာ် ကီၢ်သူလ့ၤသုးမုၢ်ဒိၣ် KTLA သုးကလၢၤ ၄ တၢ်လီၢ် ၄ ခါ လၢအိၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤပူၤအံၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)တကပၤစံး၀ဲန့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၂၇ သီတုၤလၢ ၃၀ သီအနံၤ လၢဘျံးဒ၀ဲၢ်ကီၢ်ရ့ၣ် ကစၢၢ်ဒိၣ်ကီၢ်ဆၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၀)ဟီၣ်က၀ီၤ ၀ၣ်ယီခံႇကဘီယူၤပျီဒီးဖုရီဘၢၣ်စၣ်လူၢ်ဃုာ်ဒီး တၢ်လီၢ်လၢတၢ်တသ့ၣ်ညါအမံၤတတီၤအံၤ တၢ်ထီၣ်မၤဆှဲကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲဒ်အံၤန့ၣ်လီၤႉ
“(KTLA)တၢ်လီၢ်လၢအိၣ်ကီၢ်ဆၢအံၤပၦၤထီၣ်မၤပျီကွံာ်၀ဲန့ၣ်မ့ၢ်လီၤႉခီဖျိလၢအ၀ဲသ့ၣ်န့ၣ်ပာ်ၦၤလၢအဒုၣ်အဒါအဃိ တၢ်တသ့တဘၣ်ဘၣ်ဒၢးခီဖျိလၢအကူၣ်အၢကူၣ်သီၦၤအဃိပၦၤန့ၣ်ဘၣ်ထီၣ်မၤပျီကွံာ်အီၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ထီၣ်မၤဆှဲသုးကလၢၤ(၄)ခါအံၤအဆၢကတီၢ်ခီဖျိ(KTLA)တကပၤသ့ၣ်ညါဃာ်၀ဲလၢတၢ်ကထီၣ်မၤပျီသုးကလၢၤအဃိ အ၀ဲသ့ၣ်သုးဃာ်လီၢ်သုးဃာ်ကျဲဒီးတၢ်တမၤန့ၢ်စုက၀ဲၤလၢအ၀ဲသ့ၣ်အိၣ်နီမံၤဘၣ်အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ် လီၤႉ
ခီဖျိတၢ်ကစီၣ်ဟးထီၣ်လၢခ့ၣ်အဲၣ်ယူၣ်ကလဲၤထီၣ်မၤဆှဲသုးကလၢၤအံၤအဃိ(KTLA)အၦၤတဖၣ်လဲၤဃ့ၢ်ထီၣ်၀ဲဆူ ကီၢ်ကၠီၣ်တဲၣ်တကပၤဒီးဒ်န့ၣ်အသိးမ့မ့ၢ်စီၤကီၤလၤဖိ(ကိး)သုခိၣ်အဲၣ်ခွံခီခီန့ၣ်အိၣ်၀ဲဒၣ်လၢကစၢၢ်ဒိၣ်မုၢ်ထီၣ်တကပၤအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ
(KTLA)သုးကလၢၤလၢခ့ၣ်အဲၣ်ယူၣ်(သုးက့ ၄)ထီၣ်မၤဆှဲကွံာ်၀ဲသ့ၣ်တဖၣ်အံၤအိၣ်၀ဲဒၣ်လၢယိၤကီၢ်တကပၤဒီး ယိၤၦၤဘၣ်မူဘၣ်ဒါစ့ၢ်ကီးဟ့ၣ်ပလီၢ်၀ဲအဃိတက့ၤခးကဒါ၀ဲဘၣ်ဟးပလဲာ်ကွံာ်၀ဲဒၣ်ဒ်န့ၣ်လီၤအဂ့ၢ်န့ၣ် (KTLA)ၦၤဘၣ်မူဘၣ်ဒါတဂၤ က့ၤခီၣ်ဆၢစံးကဒါ၀ဲန့ၣ်လီၤႉ
အ၀ဲစံး၀ဲလၢ“၀ဲဒၣ်န့ၣ်ၦၤပညီဖိကဒဲကဒဲပတဘၣ်သးခးလိာ်သးဘၣ်ႉလၢယိၤတကပၤစ့ၢ်ကီးတအဲၣ်ဒိးတၢ်ပိၢ်ထီၣ် ဘၣ်ႉအဃိပဟးပလဲာ်သးဒ်န့ၣ်လီၤႉအ၀ဲသ့ၣ်တမၤန့ၢ်ပတၢ်ဖိတၢ်လံၤနီတမံၤဘၣ်ႉယိၤတကပၤစ့ၢ်ကီး တအဲၣ်ဒိး ပအိၣ်ဖဲန့ၣ်ဘၣ်အဃိပသုးလီၢ်လၢအဂၤဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
သုးကလၢၤသ့ၣ်တဖၣ်အံၤအပူၤကွံာ်န့ၣ်(KTLA)အၦၤကအိၣ်လၢအဂၤ(၂၀၀)ဃၣ်ဃၣ်ညါဒီး ခီဖျိတၢ်လီၢ်အံၤအိၣ်လၢ ကီၢ်ကၠီၣ်တဲၣ်ဟီၣ်က၀ီၤပူၤ ယိၤၦၤဘၣ်မူဘၣ်ဒါမၢသုးလီၢ်သုးကျဲအဃိ စးထီၣ်လၢအပူၤကွံာ် ခံလါလံၤလံၤန့ၣ် အ၀ဲသ့ၣ်သုးလီၢ်ဆူ(ကစၢၢ်ဒိၣ်)တကပၤအဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၁၆ သီအနံၤစ့ၢ်ကီး လၢ(KNLA) သုးရ့ၣ် ၁၀ ဟီၣ်က၀ီၤအပူၤ ကီၢ်သူလ့ၤသုးမုၢ်ဒိၣ်(KTLA)အၦၤလဲၤခး၀ဲ ဖွ့ဖိကျါ (KNLA)တၢ်သမံသမိးတြဲၤတခါဒီး ဖဲန့ၣ်တၢ်ခးလိာ်သး ကဲထီၣ်ဒံး၀ဲဒၣ်န့ၣ်လီၤႉ
ဖဲအပူၤကွံာ်လါယူၤလံ ၁၉ သီအနံၤ (KTLA)အၦၤလၢအိၣ် (KNLA) သုးရ့ၣ် ၁၂ ဟီၣ်က၀ီၤပူၤအံၤတဖၣ် ခီဖျိအ၀ဲသ့ၣ်ခိးခး၀ဲဒၣ် (KNLA)သုးဂ့ၢ်၀ီခိၣ် သုးခိၣ်ဒိၣ်ဖိ စီၤဖိဆံး အသိလ့ၣ်အဃိ သုးခိၣ်စီၤဖိဆံးဒီး အၦၤသံ၀ဲ(၂)ဂၤႇဘၣ်ဒိ ၅ ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဒံးတၢ်ကစီၣ်န့ၣ်လီၤႉ
တၢ်ခိးခးသုးဂ့ၢ်၀ီခိၣ်အသိလ့ၣ်၀ံၤလီၢ်ခံ (KNLA)ထီၣ်မၤဆှဲကွံာ်ဟီၣ်က၀ီၤအဃိ (KTLA)အၦၤတဖၣ်တအိၣ်လၢ ဟီၣ်က၀ီၤ၀ဲန့ၣ်အပူၤလၢၤဘၣ် လဲၤသုးက့ၤအလီၢ်အကျဲလၢ(KNLA)သုးရ့ၣ် ၁၀ ဟီၣ်က၀ီၤပူၤအဃိ တၢ်ခးလိာ်သးက့ၤကဲထီၣ်ကဒါ၀ဲအဖီခိၣ် ဘၣ်တၢ်မၤဆှဲကဒီး၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်တကပၤ စံး၀ဲန့ၣ်လီၤႉ
