Home တၢ်ကစီၣ် ပယီၤသုးကဘီယူၤဟဲခးလီၤတၢ်အဃိ မုၢ်တြီၢ်ကီၢ်ရ့ၣ်ပူၤ ၦၤကၠိဖိသံ(၃)ဂၤႇ ဘၣ်ဒိ(၈)ဂၤ

ပယီၤသုးကဘီယူၤဟဲခးလီၤတၢ်အဃိ မုၢ်တြီၢ်ကီၢ်ရ့ၣ်ပူၤ ၦၤကၠိဖိသံ(၃)ဂၤႇ ဘၣ်ဒိ(၈)ဂၤ

480
0
Photo: CJ

လါအီးကထိဘၢၣ် ၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅) မုၢ်တြီၢ်ကီၢ်ရ့ၣ် ဒူသ၀ီတဖၣ်အပူၤ လါစဲးပထ့ဘၢၣ် တလါအတီၢ်ပူၤ ခီဖျိပယီၤသုး(Jet-Fighter)ကဘီယူၤဟဲတ့ၢ်လီၤမ့ၣ်ပိၢ်အဃိ ၦၤကၠိဖိသံ(၃)ဂၤႇ ကၠိသရၣ်၊မုၣ်ဃုာ်ဒီး လီၢ်က၀ီၤသ၀ီဖိခဲလၢာ်ဘၣ်ဒိ၀ဲဒၣ်(၈)ဂၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်တၢ်ကစီၣ် ထုးထီၣ်ပာ်ဖျါ၀ဲဖဲမဟါ လါအီးကထိဘၢၣ် ၃ သီ အနံၤန့ၣ်လီၤႉ

လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ကီၤရိၢ်ဘီထၣ်သ၀ီႇသ့ၣ်သူခံႇဒ့ၣ်ဘူးနိၣ်ဟီၣ်က၀ီၤႇတၢ်ခံဒၢဟီၣ်က၀ီၤႇ ဂဲၤယုၢ်ဒၢဟီၣ်က၀ီၤဒီးထံဂီၤထၣ်သ၀ီတဖၣ်အပူၤ ခီဖျိပယီၤသုးကဘီယူၤဟဲခးလီၤတၢ်ကအိၣ်လၢအဘျီ(၁၀) ဃၣ်ဃၣ် ညါအဃိ ဘၣ်သံ၀ဲဒၣ် ထံဂီၤထၣ်သ၀ီ(၁၅)နံၣ်ဖီလာ် ၦၤကၠိဖိ ၃ ဂၤႇ ကၠိကမံးတံာ်တဂၤအသိး ကၠိသရၣ်၊မုၣ်ဃုာ်ဒီး ၦၤသ၀ီဖိခဲလၢာ်ဘၣ်ဒိ၀ဲဒၣ်(၈)ဂၤ အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ပယီၤသုးကဘီယူၤဟဲတ့ၢ်လီၤမ့ၣ်ပိၢ်လၢအတယၢၢ်ဃၢအိၣ်အပီၣ်(၅၀၀)လၢအမ့ၢ်ချဲးစထၢၣ်မ့ၣ်ပိၢ်(၂၃)ဖျၢၣ်တကးဒံးဘၣ် သူစ့ၢ်ကီး၀ဲကျိစဲးဒီးခးလီၤကျိဖးဒိၣ်ဆူပျီပူၤကအိၣ်လၢအဖျၢၣ်(၂၀)ညါအဃိကမျၢၢ်တၢ်သံတၢ်ဘၣ်ဒိဘၣ်ထံးဟဲအိၣ်ထီၣ်၀ဲဒၣ်န့ၣ်လီၤႉကဘီယူၤဟဲခးလီၤတၢ်အဃိဘၣ်ဟးဂီၤ၀ဲဒၣ်တၢ်ဘါယွၤသရိာ်တၢ်သူၣ်ထီၣ်(၂)ဖျၢၣ်ႇတၢ်သိၣ်လိကၠိ (၁)ဖျၢၣ်ႇ ဟံၣ်(၁၂)ဖျၢၣ်ဒီးဆၣ်ဖိကီၢ်ဖိသံဘၣ်ဒိဘၣ်ထံးစ့ၢ်ကီးအိၣ်၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ တလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ် ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲခဲလၢာ်(၈၄)ဘျီဒီး ပယီၤသုးတကပၤသံ၀ဲ(၃၉)ဂၤႇ ဘၣ်ဒိ(၄၆)ဂၤအကျါ ပၣ်ဃုာ်၀ဲသုးခိၣ်စိခံဂၤအသိး မ့မ့ၢ်လၢ(KNLA)တကပၤခီန့ၣ် ဘၣ်လုၢ်ထီၣ်ကွံာ်အသးသမူလၢ ထံကီၢ်ဒီးၦၤကလုာ်အဂီၢ် (၅)ဂၤႇ ဘၣ်ဒိ(၁၃)ဂၤအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ

ခံခီခံကပၤတၢ်ဒုးအပူၤဘၣ်ဃးပယီၤသုးသံဘၣ်ဒိဘၣ်ထံးဒီးပယီၤသုးသူကျိချံၦာ်သၣ်လၢတၢ်ဒုးပူၤတဖၣ်အံၤန့ၣ် (KNLA)တကပၤထုးထီၣ်ပာ်ဖျါ၀ဲအိၣ်ဘၣ်ဆၣ်မ့မ့ၢ်သုးကီၣ်ကးတကပၤန့ၣ်ထုးထီၣ်ပာ်ဖျါ၀ဲတၢ်ကစီၣ်တအိၣ် နီတမံၤဘၣ်န့ၣ်လီၤႉ

ဒ်န့ၣ်အသိးသုးကီၣ်ကးအသုးကလၢၤႇတၢ်သမံသမိးတြဲၤလီၢ်လၢအိၣ်ခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤတဖၣ်အံၤ ဘၣ်တၢ်နုာ်လီၤခးအ၀ဲသ့ၣ်လၢ(KNLA)သုးကရူၢ်ခဲအံၤခဲအံၤဒီး တကးဒံးဘၣ်သုးကီၣ်ကးစုတီၤဖီလာ်၀ဲၤကျိၤဘၣ်ထွဲ ၀ဲၤဒၢးလၢအိၣ်၀့ၢ်ပူၤတဖၣ်စ့ၢ်ကီးတၢ်နုာ်လီၤခး၀ဲဒီးဒြိမ့ၣ်ပိၢ်ကဲထီၣ်အိၣ်၀ဲတလီၢ်လီၢ်အဂ့ၢ်န့ၣ် ကရူၢ်ဘၣ်ထွဲတဖၣ် ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ