လူၢ်ပျဲၢ်၀့ၢ်ပူၤ ဟါခီ(၈)နၣ်ရံၣ်လီၢ်ခံ ၦၤလၢအဟးထီၣ်က့ၤလီၤတဖၣ်တၢ်ကလုၢ်လီၤလၢဘၣ်ခး

လါအီးကထိဘၢၣ် ၉ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် လူၢ်ပျဲၢ်၀့ၢ်ပူၤ စးထီၣ်လါအီးကထိဘၢၣ် ဟါခီ ၈ နၣ်ရံၣ်လီၢ်ခံ ၦၤလၢအဟးထီၣ်က့ၤလီၤတဖၣ် သုးကီၣ်ကးနဲၣ်လီၤတၢ်ကလုၢ်လၢကဘၣ်ခးအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ်စံး၀ဲန့ၣ်လီၤႉ

လၢကညီကီၢ်စဲၣ်အပူၤ စးထီၣ်လၢတၢ်တီၣ်ထီၣ်ဘံၣ်ဘၢဒီးကီၢ်ဆၢဂ့ၢ်၀ီကိတိာ်အသီ၀ံၤလီၢ်ခံန့ၣ် လၢလူၢ်ပျဲၢ်ကီၢ်ဆၣ်ပူၤ တၢ်မၤဃံးထီၣ်တၢ်သမံသမိးဟဲအါထီၣ်၀ဲဒီး ပယီၤသုးလၢအိၣ်ခိးတၢ်ဖဲတၢ်သမံသမိးတြဲၤအံၤ တဖၣ်တဲ၀ဲလၢဟါခီ ၈ နၣ်ရံၣ်လီၢ်ခံ ၦၤလၢအဟးထီၣ်က့ၤလီၤတဖၣ်ကခး၀ဲအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“သုးကီၣ်ကးထုးထီၣ်တၢ်ကလုၢ်လၢၦၤမ့ဟးထီၣ်လၢမုၢ်နၤခီန့ၣ်ကခး၀ဲလီၤႉၦၤဟ့ၣ်ဃာ်အခွဲးလၢကဘၣ်ခးႉတဲ၀ဲလၢတၢ်မ့ကဲထီၣ်သးတမံၤမံၤန့ၣ်အတဟံမူဒါဘၣ်ႉတၢ်ကလုၢ်န့ၣ်တမ့ၢ်အထုးထီၣ်၀ဲဒီးလံာ်ဘၣ်ႉပယီၤသုးလၢအအိၣ်ခိးတၢ်ဖဲတၢ်သမံသမိးတြဲၤတဖၣ်န့ၣ်တဲ၀ဲလၢအထးခိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဘၣ်ဃးတၢ်ကလုၢ်လီၤလၢကဘၣ်ခးအံၤတမ့ၢ်သုးကီၣ်ကးဟးဒုးသ့ၣ်ညါလီၤ၀ဲလၢအဖိးသဲစးဘၣ်ႇ ထုးထီၣ်၀ဲဒီးလံာ် တမ့ၢ်ဘၣ်ႇမ့မ့ၢ်တခီတဲ၀ဲလၢအထးခိၣ်ဒ်န့ၣ်လီၤႉခီဖျိပယီၤသုးမၤဃံးထီၣ်တၢ်ဘံၣ်တၢ်ဘၢအိၣ်ခိး သမံသမိးတၢ်ႇ ဖီၣ်တၢ်ဟဲအါထီၣ်အဃိလီၢ်က၀ီၤကမျၢၢ်လၢအဟးထီၣ်က့ၤလီၤလၢတၢ်အိၣ်ဆူၣ်အိၣ်ချ့တၢ်ဂ့ၢ် သ့ၣ်တဖၣ်အံၤဒီး ၦၤလၢအဟးထီၣ်က့ၤလီၤလၢတၢ်ဆါတၢ်ၦ့ၤတၢ်ဂ့ၢ်သ့ၣ်တဖၣ်အံၤဘၣ်ယိၣ်လၢတၢ်ကဖီၣ်ကမၣ်ဘၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

“ပနၢ်ဟူတၢ်ကစီၣ်လၢသုးကီၣ်ကးအအိၣ်အမံၤမံၤလီၤႉအ၀ဲသ့ၣ်နါက့ပျံၤတၢ်ႉအဃိအ၀ဲသ့ၣ်ထုးထီၣ်တၢ်ကလုၢ် ဒ်အံၤလီၤႉအ၀ဲသ့ၣ်သမံသမိးဖီၣ်တၢ်အါန့ၢ်ဒံးလၢညါအဃိဘၣ်ယိၣ်လၢၦၤမ့ဟးထီၣ်က့ၤလီၤလၢကျဲန့ၣ်ကဖီၣ်ကမၣ်၀ဲ” အဂ့ၢ်န့ၣ် ၦၤလၢအဘူးဒီးသုးကီၣ်ကးတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လူၢ်ပျဲၢ်ကီၢ်ဆၣ်ပူၤ ခံခီခံကပၤဒုးယၤတၢ်ဖ့ၣ်စၢကဲထီၣ်တအိၣ်ဘၣ် ဘၣ်ဆၣ်သုးကီၣ်ကးအံၤဘၣ်ယိၣ်၀ဲလၢ တၢ်ကနုာ်လီၤခးအ၀ဲသ့ၣ်သုးကလၢၤဒီးတၢ်သမံသမိးတြဲၤလီၢ်သ့ၣ်တဖၣ်အဂ့ၢ်န့ၣ် ၦၤလၢအဘူးဒီးသုးကီၣ်ကး တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ခီဖျိတၢ်ကလုၢ်လီၤလၢကဘၣ်ခးအဃိလီၢ်က၀ီၤကမျၢၢ်တဖၣ်မ့ဘၣ်ဟးထီၣ်က့ၤလီၤလၢတၢ်အိၣ်ဆူၣ်အိၣ်ချ့တၢ်ဂ့ၢ် အဂီၢ်န့ၣ်တၢ်ကီတၢ်ခဲအိၣ်ထီၣ်သ့၀ဲအဂ့ၢ်န့ၣ် လူၢ်ပျဲၢ်၀့ၢ်ပူၤ ကမျၢၢ်တဂၤ ပဲာ်ထံနီၤဖးစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပယီၤသုးထုးထီၣ်တၢ်ကလုၢ်ဒ်အံၤအဃိၦၤကမျၢၢ်ပျံၤတၢ်မီၤနီၤႉလၢမုၢ်နၤခီအ၀ဲသ့ၣ်အိၣ်အလီၢ်န့ၣ် မတၤတဂၤမးလဲၤတဘူၣ်ဘၣ်ႉမ့ဟဲထီၣ်လၢအိၣ်တဆူၣ်အိၣ်တချ့န့ၣ်ကဘၣ်မၤဒ်လဲၣ်ႉအ၀ဲသ့ၣ်ပျံၤတၢ်အဃိ ထုးထီၣ်တၢ်ကလုၢ်ဒ်အံၤလီၤ”အဂ့ၢ်န့ၣ် စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢလူၢ်ပျဲၢ်၀့ၢ်ပူၤ လၢမုၢ်နၤခီသုးကီၣ်ကးထုးထီၣ်တၢ်ကလုၢ်လၢ ဟးထီၣ်တၢ်ချၢတန့ၢ်ဘၣ်ႇ ဟ့ၣ်လီၤတၢ်ကလုၢ်လၢကဘၣ်ခး၀ဲဒီးဘၣ်ဃးတၢ်ကလုၢ်အံၤ ဟီၣ်က၀ီၤသုးခိးကီၢ်ဆၢ (BGF)ခိၣ်နၢ်က့ၤထုးကွံာ်ကဒါ၀ဲ န့ၣ်လီၤႉ ဘၣ်ဆၣ် စးထီၣ်ဖဲတနံၣ်အံၤလါအီးကထိဘၢၣ်န့ၣ် သုးကီၣ်ကးက့ၤထုးထီၣ် ကဒါ၀ဲတၢ်ကလုၢ်အံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ