Home တၢ်ကစီၣ် (KNLA)ဒီး(PDF)မၤဂ့ၤထီၣ်က့ၤကျဲလၢပယီၤသုးမၤဟးဂီၤ၀ဲအံၤ

(KNLA)ဒီး(PDF)မၤဂ့ၤထီၣ်က့ၤကျဲလၢပယီၤသုးမၤဟးဂီၤ၀ဲအံၤ

234
0
Photo: Crd.

လါအီးကထိဘၢၣ် ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)ဟီၣ်က၀ီၤ ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဒီၣ်ယၣ်–မဲမီၣ်သ၀ီကျဲ လၢပယီၤသုးမၤဟးဂီၤ၀ဲအံၤန့ၣ် ဖဲတလါအံၤလါအီးကထိဘၢၣ် ၂၂ သီအနံၤ ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)ဒီးတၢ်ဒီသဒၢကမျၢၢ်သုး(PDF)ပာ်ဖှိၣ်ထီၣ်သးဘှီဂ့ၤမၤၦဲၤထီၣ်က့ၤ၀ဲဟီၣ်ခိၣ်အဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်အအိၣ်န့ၣ်လီၤႉ

ဖဲအပူၤကွံာ်လါမ့ၤအခါပယီၤသုးနုာ်လီၤမၤဟးဂီၤ၀ဲဒၣ်သ၀ီဘၢၣ်စၢၤကျဲလၢသိလ့ၣ်ဘျၢၣ်ဟီၣ်ခိၣ်အံၤဒီး လၢတၢ်န့ၣ်အဃိဒ်သိးလီၢ်က၀ီၤၦၤကမျၢၢ်လ့ၢ်ထီၣ်လ့ၢ်လိၤဘၣ်ကညီအဂီၢ်န့ၣ်(KNLA)ဒီးတၢ်ဒီသဒၢကမျၢၢ်သုး တီကၠံကါသုးကျိၤ(တောကျီးကန်းစစ်ကြောင်း)ဒီးတပ့ၤစွ့ၤထံသုးကျိၤ(တပင်ရွှေထီးစစ်ကြောင်း) က့ၤဘှီဂ့ၤ မၤၦဲၤထီၣ်ကဒါ၀ဲဟီၣ်ခိၣ်အဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ

(ခ့ၣ်အဲၣ်ယူၣ်)ဒူသထူၣ်ကီၢ်ရ့ၣ် သိၣ်မှံၤဂ့ၢ်၀ီပၢဆှၢရဲၣ်ကျဲၤကမံးတံာ် ၦၤပၢၤလီၢ်ဆ့ၣ်နီၤ သုးခိၣ်ဒိၣ်ဖိ စီၤကၠီၤမၠ့ၣ် စံး၀ဲလၢ“သ၀ီဘၢၣ်စၢၤကျဲတဘိန့ၣ်ပခ့ၣ်အဲၣ်ယူၣ်ဒီး(PDF)ပာ်ဖှိၣ်ထီၣ်သးလဲၤမၤဂ့ၤထီၣ်၀ဲ၀ံၤလံမီၤနီၤႉၦၤကမျၢၢ် လ့ၢ်ထီၣ်လ့ၢ်လိၤသ့လံႉလီလီစဲၤခဲအံၤလၢန့ၣ်တကပၤန့ၣ်တလီၤဆီနီတမံၤဒံးဘၣ်ႉပယီၤသုးတကပၤနါက့အိၣ်လၢ ၀့ၢ်ပူၤဒံးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်သိးတၢ်ပၢၢ်ဆၢသုးကရူၢ်ဟးထီၣ်က့ၤလီၤသုးတန့ၢ်တဂ့ၤအဂီၢ်ပယီၤသုးအံၤမၤဟးဂီၤကွံာ်ကျဲလၢခ့ၣ်အဲၣ်ယူၣ်(သုးက့ ၁) ဟီၣ်က၀ီၤ ဒီၣ်ယၣ်–ခဲမီၣ်သ၀ီကျဲႇ ၀ံယီ–လ့က့ၣ်သ၀ီကျဲဒီး ကၠဲးထိၣ်ကီၢ်ဆၣ် ပၠ့ကတိခိကျဲ ခဲလၢာ်အိၣ်တစှၤန့ၢ်(၆)ဘိ ညါဒီး တကီၢ်ခါခဲအံၤတၢ်က့ၤဘှီဂ့ၤထီၣ်ဒံးထဲဒီၣ်ယၣ်–ခဲမီၣ်သ၀ီကျဲတဘိဒံးလီၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

Photo: Crd.

လၢန့ၣ်အမဲာ်ညါကျဲတဘိလၢတၢ်မၤဟးဂီၤအီၤအိၣ်ဖဲ၀ံယီသ၀ီပယီၤသုးကလၢၤအဃၢၤအံၤစ့ၢ်ကီး ပယီၤသုးဒါလီၤ၀ဲဒီး သ့ၣ်ပၣ်ပျဲၦၤကမျၢၢ်လ့ၢ်ထီၣ်လ့ၢ်လိၤလၢအဆၢကတီၢ်ဒီးဘၣ်ဆၣ်သိလ့ၣ်တခိၣ်န့ၣ်ဃ့၀ဲ (၅၀၀၀)ကၠးညါအဂ့ၢ်န့ၣ် သုးခိၣ်ဒိၣ်ဖိ စီၤကၠီၤမၠ့ၣ် စံး၀ဲန့ၣ်လီၤႉ

“၀ံယီပယီၤသုးကလၢၤမဲာ်ညါကျဲတဘိန့ၣ်ၦၤကမျၢၢ်မ့လဲၤန့ၣ်ဘၣ်ဒါလီၤဒီးသ့ၣ်ပၣ်ႉနလဲၤမ့၀ံၤန့ၣ်နဘၣ်လဲၤပာ်က့ၤ သ့ၣ်ပၣ်လၢအ၀ဲသ့ၣ်သုးကလၢၤန့ၣ်လီၤႉၦၤကမျၢၢ်မ့အဲၣ်ဒိးလဲၤတၢ်န့ၣ်ဘၣ်လဲၤဟံဒါသ့ၣ်ပၣ်လၢအ၀ဲသ့ၣ်သုးကလၢၤ လီၤႉသိလ့ၣ်တခိၣ်န့ၣ်လဲၤ(၅၀၀၀),ဟဲက့ၤ(၅၀၀၀)ကၠးမီၤနီၤႉမ့၀ံၤအဂၤတခါမ့တလၢ(၆)နၣ်ရံၣ်ဘျဲၣ်န့ၣ် မတဂၤမး လဲၤတန့ၢ်လၢၤဘၣ်”အဂ့ၢ်န့ၣ် သုးခိၣ်ဒိၣ်ဖိ စီၤကၠီၤမၠ့ၣ် စံးအါထီၣ်၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၁)ဒူသထူၣ်ကီၢ်ရ့ၣ်ဒီး(သုးက့ ၆)ဒူပျာ်ယာ်ကီၢ်ရ့ၣ် ဒူသ၀ီကျဲတဖၣ်အါဒၣ်တက့ၢ်န့ၣ် ပယီၤသုးမၤဟးဂီၤ၀ဲဒီး ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၂)တီအူကီၢ်ရ့ၣ်ႇ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) တကပၤန့ၣ် စ့ၢ်ကီး ပယီၤသုးမၤဂီၤကျဲဒ်အံၤစ့ၢ်ကီးအိၣ်၀ဲဒီးတပျဲၦၤစိာ်ထီၣ်စိာ်လီၤတၢ်အီၣ်တၢ်အီႇကသံၣ်ကသီလၢဟီၣ်က၀ီၤပူၤဘၣ် အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ