လါနိၣ်၀့ဘၢၣ် ၁၄ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲမဟါလါနိၣ်၀့ဘၢၣ် ၁၃ သီ မုၢ်ထူၣ်အဆၢကတီၢ် သုးကီၣ်ကးအသုးတြိၤ(၂၂)စုတီၤဖီလာ် သုးကျိၤလၢအနီၣ်ဂံၢ် ကအိၣ်အဂၤ(၅၀)ဃၣ်ဃၣ်လၢအဟဲထီၣ်ဆူတလၢၤကီၢ်စဲၣ် ကၠဲၣ်မယီကီၢ်ဆၣ် ခၠီနခွၣ်သ၀ီတကပၤအံၤ ဒီး တၢ်ပၢၢ်ဆၢသုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဒီး တၢ်ဒုးကဲထီၣ်ဘျီ၀ဲအံၤအပူၤပယီၤသုးတကပၤသံ(၁၄)ဂၤဒီး ပာ်လီၤစုက၀ဲၤ(၂၃)ဂၤအဂ့ၢ်န့ၣ် သုးဂ့ၢ်၀ီဟီၣ်က၀ီၤၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
စးထီၣ်ဖဲလါနိၣ်၀့ဘၢၣ် ၁၀ သီအနံၤန့ၣ် တၢ်ဒုးကဲထီၣ်၀ဲလၢခၠီနခွၣ်သ၀ီဒီးခၠီနခွၣ်တိၤကပၤအံၤဒီး ဖဲန့ၣ်ပယီၤသုးတကပၤ သံ၀ဲဒၣ်(၁၄)ဂၤအကျါပၣ်ဃုာ်၀ဲသုးရ့ၣ်ခိၣ်ဒီးသုးခိၣ်တဂၤႇတၢ်ဖီၣ်သမူန့ၢ်အီၤ(၅)ဂၤအကျါ ပၣ်ဃုာ်သုးခိၣ်(၁)ဂၤဒီး အလီၤမၢ်၀ဲဒၣ်(၈)ဂၤအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်သုးကျိၤၦၤဘၣ်မူဘၣ်ဒါတဂၤ ပာ်ဂၢၢ်ပာ်ကျၢၤ စံး၀ဲဒ်အံၤန့ၣ်လီၤႉ
“မဟါန့ၣ်ပထီၣ်တုၤလၢတိၤန့ၢ်ညါအဃိကဘီယူၤဟဲထီၣ်လၢမီၣ်လမၠဲၣ်ဟဲခးလီၤတၢ်တုၤလၢမုၢ်ဟါခီညါႉ လၢပျီပူၤန့ၣ် ပယီၤသုးတအိၣ်လၢၤဘၣ်ႉပယီၤသုးလၢအအိၣ်ကၠၤအ့စ့ၣ်ကၠံဒီးမူၣ်ဒိၤတဖၣ်န့ၣ်ခးလီၤကျိဖးဒိၣ်တပယူာ်ဃီလီၤဘၣ်ဆၣ် ပထီၣ်တုၤလၢအန့ၢ်လီၤႉအဃိပယီၤသုးသံဘၣ်ဒိဘၣ်ထံးအါဒီးအ၀ဲသ့ၣ်သုးကျိၤပာ်လီၤစုက၀ဲၤကဲထီၣ် သးလီၤႉ ခဲအံၤအ၀ဲသ့ၣ်မ့တုၤလၢတၢ်ဘံၣ်တၢ်ဘၢအလီၢ်လံမးပကထုးထီၣ်လံာ်တၢ်ပာ်ဖျါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ခၠီနခွၣ်တိၤတၢ်ဒုးအံၤမ့ၢ်၀ဲဒၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုာ်ဂၢၤသးကရၢ(KNDO), ကီၢ်သူလ့ၤသုးမုၢ်ဒိၣ်(KTLA)ဒီးတၢ်ဒီသဒၢကမျၢၢ်သုး(PDF)သုးပာ်ဖှိၣ်သ့ၣ်တဖၣ်အံၤပာ်ဖှိၣ်ထီၣ်သးနုာ်လီၤခး၀ဲ အဂ့ၢ်န့ၣ် သ့ၣ်ညါဘၣ်လၢပျီပူၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
တကီၢ်ခါခဲအံၤလၢခၠီနခွၣ်တိၤတၢ်သမံသမိးတြဲၤ ဒီး ခၠီၣ်နခွၣ် ကၠဲၣ်မယီႇကၠၤအ့စ့ၣ်ကၠံကျဲတကပၤန့ၣ် တၢ်ပၢၢ်ဆၢသုးပာ်ဖှိၣ်ကရူၢ်ဖီၣ်ဂၢၢ်ဃာ်၀ဲလံဒီးတုၤလၢတနံၤအံၤလါနိၣ်၀့ဘၢၣ် ၁၄ သီ ဂီၤခီန့ၣ် ခံခီခံကပၤ တၢ်ဒုးလီၤကယးထီၣ်လံအဂ့ၢ်န့ၣ် ပီလီသ၀ီဖိကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“မဟါကဘီယူၤဟဲခးလီၤတၢ်လီၤတဲာ်လၢသ၀ီပူၤဟံၣ်ဟးဂီၤအိၣ်ဒီဒူၣ်ညါႉလၢပနီကျဲခံသ၀ီတကပၤ န့ၣ်နါက့ဟံၣ်ဟးဂီၤအိၣ်စ့ၢ်ႉခဲအံၤလၢ ကၠဲၣ်မယီ(ဖရုံဂူ)တိၤတုၤလၢမီၣ်လမၠဲၣ်တကပၤန့ၣ်လ့ၢ်ထီၣ်လ့ၢ်လိၤန့ၢ်ဒံးႉ လၢကျဲပူၤန့ၣ်အိၣ်ၦၤကညီသုးဒီး(PDF)သုးလီၤႉပယီၤသုးလၢအအိၣ်မူၣ်ဒိၤတဖၣ်န့ၣ်ခးလီၤကျိဖးဒိၣ်တဖျၢၣ်၀ံၤတဖျၢၣ် ခးလီၤ၀ဲအဖၢမုၢ်လီၤႉၦၤပျံၤလၢပယီၤသုးကဖီၣ်ပီၣ်တၣ်အဃိၦၤဟးထီၣ်တၢ်ချၢတဘူၣ်ဘၣ်ႉမ့ၢ်တၢ်ဒုးကဆဲးကဲထီၣ်ကဒါဧါတသ့ၣ်ညါဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ
ခီဖျိတၢ်ဒုးကဲထီၣ်အဃိကၠဲၣ်မယီကီၢ်ဆၣ်ပူၤ သ၀ီအဖျၢၣ်(၁၀)ၦၤကမျၢၢ်အဂၤ(၁၀၀၀)ဘျဲၣ်ဘၣ်ဃ့ၢ်ထီၣ်၀ဲဒီး တနီၤန့ၣ် လဲၤစံၣ်ထီၣ်အိၣ်၀ဲလၢဃိၣ်တၢ်လူၢ်ခိၣ်ႇသီခါဖၠၣ်ကရၢၢ်ပူၤအိၣ်၀ဲအဂ့ၢ်န့ၣ် သ့ၣ်ညါဘၣ်လၢကၠဲၣ်မယီကီၢ်ဆၣ် ဂံၢ်ခီၣ်ထံးတၢ်တိစၢၤမၤစၢၤကရူၢ်အအိၣ်န့ၣ်လီၤႉ