Home တၢ်ကစီၣ် ကီးတရံး၀့ၢ်ပူၤၦၤကမျၢၢ်လၢအဃ့ၢ်ထီၣ်တဖၣ်အဟံၣ်အဃီအူအီၣ်တစှၤန့ၢ်(၃၀)ဖျၢၣ်

ကီးတရံး၀့ၢ်ပူၤၦၤကမျၢၢ်လၢအဃ့ၢ်ထီၣ်တဖၣ်အဟံၣ်အဃီအူအီၣ်တစှၤန့ၢ်(၃၀)ဖျၢၣ်

320
0
Photo: CJ

လါဒံၣ်စ့ဘၢၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံး၀့ၢ်က၀ီၤဒ့တဖၣ်အပူၤ ၦၤကမျၢၢ်လၢအဃ့ၢ်ထီၣ်တဖၣ်အံၤမ့ၣ်အူအီၣ်အဟံၣ်အဃီ အိၣ်၀ဲခဲလၢာ်တစှၤန့ၢ်အဖျၢၣ်(၃၀)ညါအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး စံး၀ဲန့ၣ်လီၤႉ

ဟံၣ်ဃီလၢအိၣ်ကီးတရံး၀့ၢ်ပူၤတဖၣ်တနီၤန့ၣ်ခီဖျိကျိဖးဒိၣ်အဃိမ့ၣ်အူအီၣ်၀ဲဒၣ်အိၣ်၀ဲအသိး ဟံၣ်တနီၤန့ၣ်မ့ၣ်အူအီၣ်၀ဲ လၢတၢ်တသ့ၣ်တၢ်ဂ့ၢ်တၢ်ကျိၤနီမံၤဘၣ်စ့ၢ်ကီးအိၣ်၀ဲအဂ့ၢ်န့ၣ် ကီးတရံးကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

အ၀ဲစံး၀ဲလၢ“ဖဲ၀့ၢ်ပူၤအံၤဟံၣ်အူအီၣ်တလီၢ်လီၢ်လီၤႉဟံၣ်တနီၤအအူအီၣ်န့ၣ်တမ့ၢ်အကဲထီၣ်သးယိယိဘၣ်ႉ ကဲထီၣ်အါလၢၦၤဒွဲၣ်အူအီၣ်၀ဲလီၤႉဘၣ်မနုၤအဃိဟံၣ်အူအီၣ်န့ၣ်ကျိဖးဒိၣ်လီၤတဲာ်မးတအိၣ်ဘၣ်န့ၣ်ႉ ဖဲမဟါတသီ ခံသီန့ၣ်တၢ်လီၢ်လၢမ့ၣ်အူအီၣ်ဟံၣ်တကပၤန့ၣ်အိၣ်ဒၣ်ပယီၤသုးအၦၤဟူးဂဲၤလ့ၢ်ထီၣ်လ့ၢ်လိၤ၀ဲလီၤႉ ခဲအံၤဒ်ယသ့ၣ်ညါ အသိးန့ၣ်ၦၤဟံၣ်အူအီၣ်ကအိၣ်အဖျၢၣ်(၃၀)ဘျဲၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၂၅ သီ ဟါခီအဆၢကတီၢ်န့ၣ်စ့ၢ်ကီး မ့ၣ်အူအီၣ်ကဒီး၀ဲဟံၣ်(၁၅)ဖျၢၣ်လၢကီးတရံး က၀ီၤဒ့(၅)ပူၤဒီးဘၣ်ဃးတၢ်ကဲထီၣ်သးအဂ့ၢ်အကျိၤလီၤတံၢ်လီၤဆဲးန့ၣ်အံၤပခ့ၣ်အဲးစံၣ်–ကညီတၢ်ကစီၣ်ပာ်ဂၢၢ် ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ

ဖဲမဟါလါဒံၣ်စ့ဘၢၣ် ၂၇ သီဂီၤခီအဆၢကတီၢ်စ့ၢ်ကီး လၢကီးတရံး၀့ၢ်ပူၤၦၤနၢ်ဟူဒံး၀ဲကျိဖးဒိၣ်ကျိဖိအကလုၢ်သီၣ် ဒံး၀ဲဒီးဒ်န့ၣ်အသိးၦၤကမျၢၢ်လၢအဃ့ၢ်တၢ်ထီၣ်တဖၣ်တနီၤန့ၣ်အ၀ဲသ့ၣ်က့ၤဟံအတၢ်ဖိတၢ်လံၤလၢအဟံၣ်အိၣ်၀ဲဒၣ် စ့ၢ်ကီးအဂ့ၢ်န့ၣ် ကီးတရံးကမျၢၢ်တဂၤ စံး၀ဲဒ်အံၤန့ၣ်လီၤႉ

Photo: CJ

“ၦၤက့ၤဟံတၢ်ဖိတၢ်လံၤလၢက၀ီၤဒ့ပူၤအိၣ်တနီၤမီၤနီၤႉလၢတတါအူလၢ၀့ၢ်ပူၤတကပၤန့ၣ်ၦၤက့ၤကွၢ်ၦၤဟံၣ်ၦၤဃီ အိၣ်မီၤဘၣ်က့ၤ၀ဲလၢတၢ်ပလီၢ်ပဒီအပူၤန့ၣ်ႉမ့မ့ၢ်လၢပအိၣ်ခၠီတီၤတကပၤန့ၣ်ဒုက့ၤနုာ်လီၤတန့ၢ်နီတစဲးဘၣ်ႉ ပဟံၣ်ဒုကဲထီၣ်တၢ်ဟုၣ်အခီၣ်လီၢ်လၢာ်လံ”အဂ့ၢ်န့ၣ် စံး၀ဲန့ၣ်လီၤႉ

ကီးတရံး၀့ၢ်ပူၤစးထီၣ်ဖဲလါဒံၣ်စ့ဘၢၣ်ထီၣ် ၁ သီန့ၣ် တၢ်ဒုးက့ၤကဲထီၣ်ကဒါ၀ဲလၢသုးကီၣ်ကးအၦၤဒီး ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီးလၢတၢ်န့ၣ်အဃိ၀့ၢ်ပူၤၦၤကမျၢၢ်လၢကလးဘၣ် ဃ့ၢ်ထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါခီဖျိတၢ်ဒုးကဲထီၣ်အဃိၦၤကမျၢၢ်လၢအဃ့ၢ်တဖၣ်တဖၣ်တနီၤန့ၣ်မ့ၣ်အူအီၣ်အ၀ဲသ့ၣ်အဟံၣ်အဃီ တကးဒံးဘၣ်ခီဖျိပယီၤသုးခးလီၤကျိဖးဒိၣ်ကျိဖိႇကဘီယူၤစ့ၢ်ကီးဟဲခးလီၤတၢ်အဃိ ဟံၣ်ဒီးကျးဟးဂီၤအိၣ်လၢ အကယၤညါလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လၢန့ၣ်အမဲာ်ညါၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤခီဖျိအ၀ဲသ့ၣ်ဃ့ၢ်ထီၣ်ကအိၣ်လၢတလါဃၣ်ဃၣ်လံဒီး တကးဒံးဘၣ်ခီဖျိတၢ်ၦ့ၤထီၣ်ႇၦၤဟဲမၤစၢၤတၢ်စ့ၢ်ကီးလီၤစှၤ၀ဲဒၣ်အဃိၦၤလီၢ်အိၣ်ကဒုလီၢ်လၢအိၣ်ဘူးဖဲတန့ခၠါဒီး သၤမညၣ်အခိၣ်အဃၢၤတဖၣ်တနီၤန့ၣ်တၢ်အီၣ်တၢ်အီလီၤတူာ်ထီၣ်၀ဲလံအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ် မှံဟးဖျိးတဖၣ်အအိၣ်န့ၣ်လီၤႉ