လါဒံၣ်စ့ဘၢၣ် ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
ကီၢ်သူလ့ၤသုးမုၢ်ဒိၣ်(KTLA)အသုးကျိၤခံကျိၤဟဲက့ၤပာ်ဖှိၣ်ထီၣ်သးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) အဂ့ၢ်န့ၣ် ကရူၢ်ဘၣ်ထွဲထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
ဖဲတနံၣ်အံၤလါအ့ဖြ့ၣ် ၆ သီအနံၤန့ၣ် (KTLA)ပၢဆှၢရဲၣ်ကျဲၤဖီဃာ် သုးခိၣ်စီၤ၀့မၠ့ၣ် တီခိၣ်ရိၣ်မဲ(Venom)သုးကျိၤ ဟဲက့ၤပာ်ဖှိၣ်ထီၣ်သးလၢ(KNLA) သုးက့(၆)အအိၣ်ဒီးဒ်န့ၣ်အသိးဖဲလါနိၣ်၀့ဘၢၣ် ၆ သီအနံၤစ့ၢ်ကီး သုးခိၣ် အဲၣ်စ့၀ါ တီခိၣ်ရိၣ်မဲ(Lion Battalion Commando)သုးကျိၤအံၤစ့ၢ်ကီးဟဲက့ၤပာ်ဖှိၣ်ထီၣ်သးဒီး(KNLA) သုးက့(၆) အဂ့ၢ်န့ၣ် အ၀ဲသ့ၣ်ကရူၢ်ထုးထီၣ်ပာ်ဖျါ၀ဲန့ၣ်လီၤႉ
ဘၣ်ဃးတၢ်ဂ့ၢ်အိၣ်ဖျါလၢတၢ်ဖီခိၣ်သ့ၣ်တဖၣ်အံၤန့ၣ်(ခ့ၣ်အဲၣ်ယူၣ်)ၦၤကတိၤတၢ်ပၢ ပဒိၣ်စီၤတိနံ စံး၀ဲလၢ “မ့မ့ၢ်ယၤဒုယထံၣ်လၢပကဒုးဖျိးထီၣ်ကွံာ်သုးမီၤစိရိၤတဒူၣ်လီၤလီၤဆီဆီအမဲာ်ညါန့ၣ်ပာ်ဖှိၣ်ထီၣ်သးဖီၣ်လိာ်စု ဒုးသကိးတပူၤဃီဒီး(KNLA)န့ၣ်အဘျုးကအိၣ်ဒိၣ်၀ဲလီၤႉအဃိ(Lion Battalion)သုးကျိၤဟဲက့ၤဖီၣ်လိာ်စုဟူးဂဲၤ ကဒါလၢကရူၢ်တဒူၣ်ဃီဒ်အံၤမ့ၢ်တၢ်လၢအဂ့ၤတခါလီၤႉပသးခုဒိၣ်မးဒီးပအိၣ်ခိးသဂၢၢ်လီၤအ၀ဲသ့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
ဒ်(KNLA)အတၢ်သိၣ်တၢ်သီတၢ်ဘျၢအိၣ်အသိးန့ၣ်(Lion Battalion Commando)သုးကျိၤအံၤ ကပာ်ဖှိၣ်ဖီၣ်လိာ်စု မၤသကိးဒုးဖျိးထီၣ်ကွံာ်သုးမီၤစိရိၤအဂ့ၢ်န့ၣ် သုးခိၣ်အဲၣ်စ့၀ါ အသုးကျိၤလံာ်တၢ်ထုးထီၣ်ပာ်ဖျါအပူၤ စံး၀ဲန့ၣ်လီၤႉ
ဘၣ်ဃးသုးခိၣ်အဲၣ်စ့၀ါတီခိၣ်ရိၣ်မဲ(Lion Battalion Commando)သုးကျိၤအတၢ်ဟဲက့ၤပာ်ဖှိၣ်မၤသကိးတၢ်ဒီး (KNLA)တၢ်ဂ့ၢ်အံၤအဖီခိၣ် ဖဲလါဒံၣ်စ့ဘၢၣ် ၂၅ သီအနံၤ ဒ်(KTLA)လီၢ်ခၢၣ်သးထုးထီၣ်ပာ်ဖျါ၀ဲလံာ်တၢ်ပာ်ဖျါပူၤ အသိးန့ၣ် ခီဖျိစီၤအဲၣ်စ့၀ါ ဒီး စီၤဖါသီခါ တဖၣ်အံၤ ဃုထၢတၢ်ရၢကရိလၢအဂၤတဒူၣ်လံအဃိ စးထီၣ်(၂၅ႉ၁၂ႉ၂၀၂၃)န့ၣ် အ၀ဲသ့ၣ်တမ့ၢ်(KTLA)အၦၤလၢၤဘၣ်အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
ဘၣ်ဃးသုးခိၣ်အဲၣ်စ့၀ါကရူၢ်လဲၤပာ်ဖှိၣ်မၤသကိးတၢ်ဒီး(KNLA)န့ၣ်သ့ၣ်ညါဃာ်လၢညါလံၤလံၤလံဒီးဘၣ်ဆၣ်မ့ၢ်လၢအက့ၤဒုးခီၣ်ဆၢကဒါသုးမီၤစိရိၤလီၤအဃိပျၢ်အ၀ဲသ့ၣ်လံအဂ့ၢ်န့ၣ် (KTLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤနၢၤဒါမၠး စံးလီၤ၀ဲလၢ(KKLE News YouTube)အံၤဖဲလါဒံၣ်စ့ဘၢၣ် ၂၆ သီ အနံၤန့ၣ်လီၤႉ
အ၀ဲစံး၀ဲလၢ“ဘၣ်ဃးသုးခိၣ်အဲၣ်စ့၀ါအတၢ်လဲၤကဒါလၢ(KNLA)တၢ်ဂ့ၢ်အံၤန့ၣ်ပသ့ၣ်ညါဖးယံၤလံပတတဲတၢ်နီမံၤ ဒံးဘၣ်ပကွၢ်လီၤႉဘၣ်မနုၤအဃိလဲၣ်န့ၣ်တမ့ၢ်ထဲတၢ်လီၢ်တတီၤဘၣ်စးထီၣ်လၢပဒုးအိၣ်ထီၣ်၀ဲဒၣ်(KTLA)အံၤန့ၣ်ၦၤအိၣ်ဒီးတၢ်ရဲၣ်တၢ်ကျဲၤလၢၦၤကလီၤမၢ်ၦၤလီၤႉပကွၢ်လၢအ၀ဲသ့ၣ်တၢ်အိၣ်သးဖီခိၣ်ဒီးပပျဲကွံာ်အီၤလီၤႉပစးထီၣ်ဒုးအိၣ်ထီၣ်(KTLA)အံၤန့ၢ်တနံၣ်ဘျဲၣ်ႉတၢ်မၤစၢၤသ့ၣ်တဖၣ်န့ၣ်ဟဲလၢထံဖိကီၢ်ဖိကမျၢၢ်အအိၣ်ကမျၢၢ်ဆီၣ်ထွဲၦၤလီၤတမ့ၢ်လၢပန့ၢ်ဘၣ်တၢ်ဒိၣ်ဒိၣ်မုၢ်မုၢ်ဘၣ်ႉခီဖျိထံဖိကီၢ်ဖိဆီၣ်ထွဲၦၤအဃိပဂဲၤဆၢထၢၣ်သ့၀ဲလီၤႉတၢ်လၢယအဲၣ်ဒိးတဲန့ၣ်မ့အဲၣ်ဒိးလဲၤန့ၣ်လဲၤ၀ဲဒုပတတြီဘၣ်ႉသနါက့တဘျီန့ၣ်ပမ့ၢ်၀ဲဒၣ်သုမိၢ်သုပၢ်အဃိန့ၣ်တဘၣ်မ့ၢ်လၢထိၣ်လၢအယူၤထီၣ်ဒီးထူတကျာ်သ့ၣ်ဒ့ဘၣ်ႉ တၢ်လၢတၢ်ဘျုးတၢ်ဖှိၣ်န့ၣ်ဘၣ်သ့ၣ်ညါ,တဘၣ်မ့ၢ်လၢတဲအၢတဲသီပ(KTLA)ဘၣ်”အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါစဲးပထ့ဘၢၣ်အခါန့ၣ်(KTLA)စုတီၤဖီလာ်ဆၣ်ကဆီသုးကျိၤ သုးခိၣ်အဲၣ်ခွံကရူၢ် လၢအအိၣ်ဆီလီၤသးဖဲတနီသရံၣ်ပူၤအံၤစ့ၢ်ကီး အၦၤ(၁၆)ဂၤဟဲက့ၤပာ်ဖှိၣ်ထီၣ်သးလၢ(KNLA) သုးက့(၄) သုးရ့ၣ်(၁၂) အအိၣ် ဃုာ်ဒီးတၢ်စုက၀ဲၤကျိချံၦာ်သၣ်အဂ့ၢ်န့ၣ် သ့ၣ်ညါဘၣ်လၢ(သုးက့ ၄)အအိၣ်န့ၣ်လီၤႉ
