ဆီထံးကီၢ်ဆၣ်ပူၤ တနံၣ်အတီၢ်ပူၤ လီၢ်က၀ီၤၦၤကမျၢၢ်သၢကလးဃၣ်ဃၣ်ဘၣ်ဃ့ၢ်မှံဟးဖျိးအဂ့ၢ် KNU ထုးထီၣ်ပ၁်ဖျါ

လါဒံၣ်စ့ဘၢၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်အပူၤ တနံၣ်အတီၢ်ပူၤ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်လၢဒူသ၀ီပူၤအဃိ သ၀ီပာ်ဖှိၣ်ခဲလၢာ် (၃၁)ဖျၢၣ် ၦၤနီၣ်ဂံၢ်(၂၉ႇ၈၁၂)ဂၤဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲ ဖဲလါဒံၣ်စ့ဘၢၣ် ၅ သီအနံၤန့ၣ်လီၤႉ

ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်လၢဒူသ၀ီပူၤဒီးဖီၣ်၀ဲဒၣ်ၦၤကမျၢၢ်ဃ့အီၣ်စ့အဃိ ၦၤကမျၢၢ်သံဘၣ်ဒိ ဘၣ်ထံးအိၣ်အဖီခိၣ်ၦၤဒူဖိသ၀ီဖိသ့ၣ်တဖၣ်အံၤအိၣ်လၢသ၀ီပူၤတဘူၣ်လၢၤဘၣ်ဃ့ၢ်ထီၣ်၀ဲဒၣ် အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါပယီၤသုးခီၣ်ချ့သုးရ့ၣ်(ခမရ–၂၀)ဒီးခီၣ်သုးရ့ၣ်(ခလရ–၇၅)လၢအိၣ်ဆီလီၤသး ဖဲချၢၣ်လွံၢ်ထူၣ် ကီၢ်ရ့ၣ် ပစိၤမၠီတၤပၠဲၣ်ႇဆီထံးႇမိၣ်ခမူၤႇသၤစ့ၣ်သုးကလၢၤသ့ၣ်တဖၣ်အံၤဒီး (ခမရ–၅၉၈),(ခမရ–၃၅၁),(ခမရ–၅၈၉), (ခလရ–၂၆၄)လၢအိၣ်စလိၣ်ကၠံႇကွ့စ့ၣ်ႇဒိၤစယ့ၣ်ႇပ့စလိၣ်သုးကလၢၤသ့ၣ်တဖၣ်အံၤ အ၀ဲသ့ၣ်ခးလီၤ (၁၅၅ မမ),(၁၂၂ မမ), (၁၂၀ မမ),(၈၀ မမ),(၆၀ မမ)ကျိဖးဒိၣ်သ့ၣ်တဖၣ်အံၤလၢသ၀ီပူၤအိၣ်၀ဲခဲလၢာ်(၂၅)ဘျီဒီး ခးလီၤ၀ဲအဖျၢၣ်ခဲလၢာ်အိၣ်၀ဲ (၈၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ

ခီဖျိကဘီယူၤဟဲခးလီၤတၢ်ဒီးပယီၤသုးခးလီၤကျိဖးဒိၣ်အဃိကျိဖးဒိၣ်လီၤတဲာ်ပိၢ်ဖးထီၣ်၀ဲလၢထီလူၢ်ခိၣ်ႇ၀ဲၤကၠိႇ ယ့ၤဖၠူၤကၤ ပၠံၤယ့ၤႇကွ့ကိႇကီၣ်မဲၣ်သူၤႇခၠိၤအ့ႇခၠီ၀ၣ်ႇကွ့ဒလၣ်ကၠံႇ၀ဲၤသ့ၣ်စ့ၣ်ႇပၠံၤယ့ၤကၠံႇသဲၣ်ကဲၤကိႇညီၤပ့ၤကၠံႇ ၀ဲၤမ့ၤကလၤကိႇကၠိၤခၠီၤႇသယဲၣ်သမ့ၤႇကၠိၤကၠဲၣ်ႇအ့ဘလၤႇကွံစဲၤလီၤသ၀ီသ့ၣ်တဖၣ်အံၤအပူၤအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဘၣ်ဃးတၢ်ဂ့ၢ်ကဲထီၣ်သးအံၤကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စံး၀ဲဒၣ်လၢ“ပထံၣ်ဘၣ် တၢ်ကဲထီၣ်သးအံၤဆီထံးဃုာ်ဒီးခ့ၣ်အဲၣ်ယူၣ်ကီၢ်ရ့ၣ်(၇)ဘ့ၣ်လၢာ်အပူၤလီၤႉလီၤဆီဒၣ်တၢ်လၢကီၢ်ရ့ၣ်(၇)ဘ့ၣ်အံၤအကျါ မ့မ့ၢ်ဒူသထူၣ်ကီၢ်ရ့ၣ်(သုးက့ ၁)တုၤလၢ(သုးက့ ၆)န့ၣ်ဟဲနးဒိၣ်ထီၣ်မီၤနီၤႉပထံၣ်ဘၣ်လၢတၢ်မၤကမၣ်ၦၤဂ့ၢ်၀ီခွဲးယာ် ဟဲကဲထီၣ်မီၤနီၤႉခီဖျိပယီၤသုးကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်အဃိၦၤကမျၢၢ်သံဘၣ်ဒိဘၣ်ထံးႇပယီၤဖီၣ်မၤသံမၤ၀ီ၀ဲမ့၀ံၤကိးသူ၀ဲဒ်တၢ်ဒီသဒၢစုက၀ဲၤတခါအသိးတၢ်သ့ၣ်တဖၣ်အံၤ စးထီၣ်(၂၀၂၁) သုးဟံးန့ၢ်တၢ်စိတၢ်ကမီၤ တုၤလၢခဲအံၤန့ၣ်မ့ၢ်တၢ်မၤကမၣ်ၦၤဂ့ၢ်၀ီခွဲးယာ်အတၢ်အိၣ်သးလၢအဟဲကဲထီၣ်လၢကညီ ကီၢ်စဲၣ်အပူၤအံၤန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

သုးမီၤစိရိၤအတၢ်လုၢ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ်အံၤတမ့ၢ်ထဲလၢ(၂၀၂၁)သုးဟံးန့ၢ်တၢ်စိတၢ်ကမီၤကဲထီၣ်၀ံၤအလီၢ်ခံအံၤမးဘၣ်ဒီးမ့မ့ၢ်တခီအပူၤကွံာ်လၢညါလံၤလံၤလၢသုးပၢတၢ်အစိၤဘၣ်အစိၤအခါန့ၣ်အ၀ဲသ့ၣ်လုၢ်သ့ၣ်ခါပတာ်မၤကမၣ်၀ဲၦၤဂ့ၢ်၀ီခွဲးယာ်အံၤလီၤအဂ့ၢ်န့ၣ် (KHRG)ၦၤကတိၤတၢ်ပၢ စီၤနၢၤဒၣ်ဆူ စံးအါထီၣ်၀ဲန့ၣ်လီၤႉ