Home တၢ်ကစီၣ် ခီဖျိကီၢ်ဆၢပနံ၁်တၢ်ဖိတၢ်လံၤကျဲဆိကတီၢ်သးအဃိဟီၣ်က၀ီၤအပူၤတၢ်လုၢ်တၢ်ၦ့ၤဒိၣ်ထီၣ်

ခီဖျိကီၢ်ဆၢပနံ၁်တၢ်ဖိတၢ်လံၤကျဲဆိကတီၢ်သးအဃိဟီၣ်က၀ီၤအပူၤတၢ်လုၢ်တၢ်ၦ့ၤဒိၣ်ထီၣ်

145
0
Photo: CJ

လါယနူၤအါရံၤ ၁၀ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲမုၢ်ခိၣ်န့ၣ် ခီဖျိတၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအဃိကျဲတၢ်လဲၤထီၣ်က့ၤလီၤဆိကတီၢ်ကွံာ်သးအဃိ ကီၢ်ပယီၤတၢ်ဖိတၢ်လံၤတၢ်အီၣ်တၢ်အီတဖၣ်အၦ့ၤဒိၣ်ထီၣ်၀ဲဒၣ်အဂ့ၢ်န့ၣ် မၠၣ်၀တံၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

“တချုးသုးဟံးန့ၢ်တၢ်စိတၢ်ကမီၤဒံးဘၣ်အခါန့ၣ်ဟုသးန့ၣ်အၦ့ၤကအိၣ်ဖဲယဲၢ်ကလးႇနွံကလးဒ်န့ၣ်လီၤႉ ခဲအံၤ ဖဲမၠၣ်၀တံၣ်အံၤဟုသးအၦ့ၤထီၣ်တုၤလၢခံကလီၢ်ခိၣ်ဃၢၤလံႉလၢညါခါသိအီၣ်တကိန့ၣ်အၦ့ၤအိၣ်(၁၅၀၀)ကၠး ခဲအံၤအၦ့ၤထီၣ်တုၤလၢ(၄၅၀၀)ႇ(၅၀၀၀)ဘျဲၣ်လံႉအဃိတၢ်ၦ့ၤန့ၣ်ထီၣ်၀ဲဒၣ်သၢဆးဃၣ်ဃၣ်ညါမီၤနီၤႉ လၢညါသွၣ်(မံသွ့)တထၢၣ်န့ၣ်အိၣ်၀ဲ(၄၀၀၀),(၅၀၀၀)ခဲအံၤအၦ့ၤထီၣ်လၢ(၁၄၀၀၀)လံႉအပူၤကွံာ်ဆီဒံၣ်တကးန့ၣ်အၦ့ၤအိၣ်၀ဲ(၂၀၀၀)ကၠးဘျဲၣ်လီၤခဲအံၤတကးန့ၣ်အၦ့ၤအိၣ်လၢ(၈၀၀၀)လံ”အဂ့ၢ်န့ၣ် မၠၣ်၀တံၣ်ကမျၢၢ်တဂၤ စံး၀ဲန့ၣ် လီၤႉ

လၢန့ၣ်အမဲာ်ညါမ့မ့ၢ်ဂံၢ်ခီၣ်ထံးတၢ်အီၣ်တၢ်အီလၢတၢ်ဟဲက့ၤလီၤစိာ်၀ဲလၢကီၢ်ကၠီၣ်တဲၣ် ၀့ၢ်မဲးဆီး–မၠၣ်၀တံၣ် ကီၢ်ဆၢသ့ၣ်တဖၣ်အံၤ ခီဖျိသုးသကီၣ်အၦၤတကးဒံးဘၣ်ဖီၣ်စုက၀ဲၤကရူၢ်တဖၣ်ထၢ၀ဲတြဲၤတၢ်ခိတၢ်သွဲအါအဃိ တၢ်ဖိိတၢ်လံၤတၢ်အီၣ်တၢ်အီအၦ့ၤဘၣ်ထီၣ်၀ဲဒၣ်ဒ်အံၤလီၤအဂ့ၢ်န့ၣ် ၦၤကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ

တကီၢ်ခါခဲအံၤခီဖျိအ့ရှါကျဲပံးအဃိဂံၢ်ခီၣ်ထံးတၢ်အီၣ်တၢ်အီတဖၣ်ၦၤဘၣ်က့ၤလီၤစိာ်က့ၤအီၤလၢထိၣ်ကီၤကိႇ တန့ခၠါကျဲတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

Photo: CJ

“အ့ရှါကျဲဒုလဲၤတန့ၢ်လၢၤဘၣ်ႉနဘၣ်လဲၤက့ၤလၢထိၣ်ကီၤကိကျဲ၀ံၤမးနလဲၤဆူမီၣ်လမၠဲၣ်ႇဖၣ်အၣ်ႇ၀့ၢ်တကူၣ်သ့မီၤနီၤႉ ခဲအံၤ၀့ၢ်တကူၣ်–မၠၣ်၀တံၣ်သိလ့ၣ်အဘူးအလဲန့ၣ်ထီၣ်တုၤလၢဃိးလကးႇတကလီၢ်လံႉ လၢကျဲန့ၣ်နဟဲက့ၤ တၢ်အ၀ဲသ့ၣ် မ့အဲၣ်ဒိးအီၣ်၀ဲႇအ၀ဲသ့ၣ်မ့ဟံ၀ဲန့ၣ်နတဲမးတဘူၣ်ဘၣ်ႉတၢ်ဖိတၢ်လံၤအၦ့ၤန့ၣ်ပဘၣ်လိးလီၤက့ၤႉခဲအံၤတၢ်ဖိတၢ်လံၤ တၢ်ဘိၣ်န့ၣ်အကစၢ်မ့ပၣ်မးပတီၣ်ဘူၣ်လီၤႉမ့မ့ၢ်ထဲတၢ်ဖိတၢ်လံၤတခါဒုပတူၢ်လိာ်တဘူၣ်လၢၤဘၣ်”အဂ့ၢ်န့ၣ် မၠၣ်၀တံၣ်–၀့ၢ်တကူၣ် ၦၤနီသိလ့ၣ်ဖိတဂၤ စံး၀ဲန့ၣ်လီၤႉ

တကီၢ်ခါခဲအံၤလၢထိၣ်ကီၤကိကျဲန့ၣ်တၢ်ပာ်ပနီၣ်က့ၤ၀ဲလၢထီၣ်တသီလီၤတသီဒီးဘၣ်ဆၣ်လၢကျဲပူၤန့ၣ် သိလ့ၣ်ကတာ်ထီကဲထီၣ်သးအိၣ်၀ဲခဲအံၤခဲအံၤအဃိၦၤလဲၤတၢ်က့ၤတၢ်ဖိတဖၣ်ဘၣ်အိၣ်ခိးမံတ့ၢ်လၢကျဲပူၤအိၣ်၀ဲအဂ့ၢ်န့ၣ် ၦၤနီသိလ့ၣ်ဖိလၢအလ့ၢ်ထီၣ်လ့ၢ်လိၤဖဲန့ၣ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ