ဒူပျာ်ယာ်ကီၢ်ရ့ၣ်ပူၤ ပယီၤသုးခးလီၤကျိဖးဒိၣ်အဃိကမျၢၢ်ဘၣ်ဒိ ၃ ဂၤအကျါပၣ်ဃုာ်ဖံ၀ါလၢအသးနံၣ်တၦဲၤဒံးဘၣ် ၂ ပါ

လါယနူၤအါရံၤ ၁၀ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤ ခီဖျိပယီၤသုးခးလီၤကျိ ဖးဒိၣ်ဆူလီၢ်က၀ီၤကမျၢၢ်တၢ်အိၣ်တၢ်ဆိးလီၢ်ဒူသ၀ီပူၤအဃိကမျၢၢ်ဘၣ်ဒိဘၣ်ထံး(၃)ဂၤအကျါပၣ်ဃုာ်၀ဲဖံ၀ါလၢ အသးနံၣ်တၦဲၤဒံးဘၣ်(၂)ပါအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပာ်ဖျါတၢ်ကစီၣ်ဖဲမဟါလါယနူၤအါရံၤ ၉ သီ အနံၤ န့ၣ်လီၤႉ

ဖဲလါယနူၤအါရံၤ ၅ သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် (စကခ)စုတီၤဖီလာ်(ခလရ–၂၃၀)သုးရ့ၣ် ခးလီၤ၀ဲ(၁၂၀ မမ)ကျိဖးဒိၣ်လၢမၠီၣ်ကၠၤအ့ကရူၢ် ၀့ၣ်စၤကိသ၀ီအပူၤအဃိကမျၢၢ်ဘၣ်ဒိ၀ဲတဂၤဒီး သီခါဖၠၣ်ႇဟံၣ်တၢ်သူၣ်ထီၣ်စ့ၢ်ကီးဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးလၢဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤ ဖဲလါယနူၤအါရံၤ ၇ သီ ၁၂ နၣ်ရံၣ်ဃၣ်ဃၣ်အဆၢကတီၢ် စ့ၢ်ကီး (ခမရ–၅၄၅)သုးရ့ၣ် ခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲလၢကီၢ်၀ါလဲကရူၢ် ကီၢ်၀ါလဲသ၀ီပူၤ အ့ခၠါသၤယၤတီယၣ်သီခါဖၠၣ်ကရၢၢ်ပူၤအဃိ သီခါဖၠၣ်တၢ်သူၣ်ထီၣ်အံၤဟးဂီၤ၀ဲဒီး ဖံ၀ါဘၣ်ဒိဘၣ်ထံး စ့ၢ်ကီး၀ဲ(၂)ပါအဂ့ၢ်န့ၣ် လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ

လၢတၢ်ဂ့ၢ်ကဲထီၣ်သးဒ်အံၤအဖီခိၣ် ဒူပျာ်ယာ်ကီၢ်ရ့ၣ် လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိပာ်ဖျါအမံၤတဂၤစံး၀ဲလၢ “ဘၣ်ဃးမဟါတဟါတၢ်ကဲထီၣ်သးတခါန့ၣ်ဒ်ညီနုၢ်ဒုၣ်ဒါတဖၣ်ခးနါစိၤ၀ဲကျိဖးဒိၣ်အဃိအလီၤဘၣ်၀ဲလၢၦၤဟံၣ်ၦၤဃီႇတၢ်ဘူၣ်တၢ်ဘါတၢ်သူၣ်ထီၣ်ကရၢၢ်ပူၤဒီးဘၣ်၀ဲဒၣ်ဖၠၣ်ႇဘၣ်ဃုာ်စ့ၢ်ကီး၀ဲဒီးဖံ၀ါတဖၣ်စ့ၢ်မီၤနီၤႉဘၣ်မနုၤလၢၦၤသ့ၣ်တဖၣ်အံၤဘၣ်လဲၣ်န့ၣ်အ၀ဲသ့ၣ်န့ၣ်အိၣ်၀ဲဒၣ်လၢဖၠၣ်ပူၤကျိဖးဒိၣ်လီၤတဲာ်လၢအ၀ဲသ့ၣ်အိၣ်အဃိဘၣ်ဒိဘၣ်ထံး၀ဲလီၤႉ လၢအဘၣ်ဒိဘၣ်ထံးတဘျီဃီန့ၣ်ၦၤဆှၢထီၣ်အီၤလၢတၢ်ဆါဟံၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲတနံၤအံၤလါယနူၤအါရံၤ ၁၀ သီအနံၤန့ၣ်လီၤႉ

ဖံ၀ါလၢအဘၣ်ဒိဘၣ်ထံး(၂)ပါအံၤအ၀ဲတဂၤန့ၣ်အိၣ်၀ဲ(၁၃)နံၣ်ဘၣ်၀ဲဒၣ်အစုစ့ၣ်ဒီးမ့မ့ၢ်အ၀ဲတဂၤခီန့ၣ်အသးနံၣ်အိၣ်၀ဲ (၁၆)နံၣ်ကျိဖးဒိၣ်အက့အခီဘၣ်၀ဲဒၣ်အမဲာ်ဖံးလၢအထွဲတကပၤအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးတၢ်ကစီၣ် စံး၀ဲန့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤလၢဒူပျာ်ယာ်ကီၢ်ရ့ၣ် တီၤကၠၤအ့ဒီးမၠီၣ်ကၠၤအ့တကပၤန့ၣ်တၢ်ဒုးဂၢၢ်ဒံး၀ဲဒီး ဘၣ်ဆၣ် ပယီၤသုးအံၤမုၢ်ဆါခီမ့တမ့ၢ်မုၢ်နၤခီန့ၣ်ခးလီၤ၀ဲဒၣ်ကျိဖးဒိၣ်အိၣ်မၢ်မၢ်န့ၣ်လီၤႉလၢတၢ်န့ၣ်အဃိၦၤကမျၢၢ်ဒူသ၀ီလၢ အိၣ်ခိၣ်တၢ်ဃၢၤဖဲန့ၣ်သ့ၣ်တဖၣ်ဃ့ၢ်ထီၣ်၀ဲဒၣ်ခဲလၢာ်လီၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤဃီ ၀ဲန့ၣ် စံးအါထီၣ်၀ဲန့ၣ်လီၤႉ

လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်အပူၤ ခီဖျိသုးကီၣ်ကးအၦၤခးလီၤကျိဖးဒိၣ်ဒီးကဘီယူၤဟဲခးလီၤတၢ်အဃိ ၦၤကမျၢၢ်ဘၣ်သံဘၣ်ဒိဘၣ်ထံး၀ဲဒၣ်အါအါဂီၢ်ဂီၢ်တကးဒံးဘၣ်ဟံၣ်ဃီတၢ်သူၣ်ထီၣ်ဃုာ်ဒီးဆၣ်ဖိကီၢ်ဖိစ့ၢ်ကီး သံဟးဂူာ်ဟးဂီၤ၀ဲဒၣ်အါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ