လါယနူၤအါရံၤ ၂၄ သီ ၂၀၂၄ နံၣ် ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတီအူကီၢ်ရ့ၣ်(သုးက့ ၂)ဟီၣ်က၀ီၤအပူၤ ဖဲမဟါလါယနူၤအါရံၤ(၂၃)သီအနံၤပယီၤသုးကျိၤနုာ်လီၤ၀ဲလၢ ယ့ၤတၤဆ့ၤကီၢ်ဆၣ် မယိခိၤ သ၀ီအပူၤဒီးနီစံၣ်လီၤကွံာ်ၦၤသ၀ီဖိလၢဟံၣ်ပူၤ၀ံၤ ဒွဲၣ်အူကွံာ်၀ဲကမျၢၢ်အဟံၣ်တစှၤန့ၢ်(၃၀)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
ဖဲအပူၤကွံာ်လါဒံၣ်စ့ဘၢၣ် ၂၅ သီအနံၤန့ၣ်လၢ မယိခိၤ သ၀ီကပၤတၢ်ဒုးကဲထီၣ်လၢခံခီခံကပၤအဘၢၣ်စၢၤဒီး မုၢ်ဆ့ၣ်ထီၣ် ၂၆ သီအနံၤန့ၣ် ပယီၤသုးနုာ်လီၤလၢသ၀ီပူၤဒီးအဆိကတၢၢ်တဘျီဒွဲၣ်အူအီၣ်၀ဲၦၤကမျၢၢ်အဟံၣ် (၄၂)ဖျၢၣ်န့ၣ်လီၤႉ
ဖဲန့ၣ်အ၀ံၤလီၢ်ခံဖဲမဟါလါယနူၤအါရံၤ၂၃ သီမုၢ်ဃ့ၢ်လီၤ ၁း၃၀ မံးနံးအဆၢကတီၢ်န့ၣ် ပယီၤသုးကျိၤလၢၦၤနီၣ်ဂံၢ်အိၣ် ၁၅၀ ဃၣ်ဃၣ်အံၤဟဲနုာ်လီၤကဒီး၀ဲလၢ မယိခိၤ သ၀ီပူၤ၀ံၤနီစံၣ်လီၤၦၤသ၀ီလၢဟံၣ်ပူၤဒီးခံဘျီတဘျီဒွဲၣ်အူထီၣ်ကွံာ်၀ဲကမျၢၢ်အဟံၣ်အဂ့ၢ်န့ၣ် လီၢ်က၀ီၤဖိလၢအိၣ်ဘူးဖဲန့ၣ်တဂၤစံး၀ဲန့ၣ်လီၤႉ
အ၀ဲစံး၀ဲလၢ “ဖဲၦၤသ၀ီဖိအိၣ်လၢသ၀ီပူၤအဆၢကတီၢ်အ၀ဲသ့ၣ်ဟဲနုာ်လီၤမီၤႉ ဟံၣ်လၢၦၤအိၣ်သ့ၣ်တဖၣ်န့ၣ် မၢ၀ဲၦၤသ၀ီဖိသ့ၣ်တဖၣ်ဟးထီၣ်ကွံာ်ဒီးဒွဲၣ်အူကွံာ်၀ဲမီၤနီၤႉ အ၀ဲသ့ၣ်စးထီၣ်ဒွဲၣ်အူ၀ဲလၢသ၀ီအခိၣ်ထိးတကပၤလီၤႉ ဖံသးၦၢ်လၢအဟံၣ်အိၣ်လၢသ၀ီခိၣ်ထိးတဂၤန့ၣ်ၦၤမၢအဟးထီၣ်လၢဟံၣ်ပူၤမီၤႉ ဖံသးၦၢ်တဂၤန့ၣ်တဲ၀ဲလၢမ့ၢ်အဲၣ်ဒိးဒွဲၣ်န့ၣ်ဒွဲၣ်ကွံာ်ခီမ့ၢ်လၢဖံသးၦၢ်တဂၤန့ၣ်ကလံၤဖၠးအီၤအဃိအ၀ဲတဲလၢအဟးတကဲဘၣ်မီၤနီၤႉ အဃိန့ၣ်တၢ်ပာ်တ့ၢ်ကွံာ်၀ဲဟံၣ်တဖျၢၣ်န့ၣ်လီၤႉ ဟံၣ်အူအီၣ်န့ၣ်ကအိၣ်လၢအဖျၢၣ်(၃၀)ဘျဲၣ်ညါ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
မယိခိၤ သ၀ီပူၤအံၤတၢ်သဘံၣ်သဘုၣ်ကဲထီၣ်သးတအိၣ်၀ဲဘၣ်ဒီးဘၣ်ဆၣ်ပယီၤသုးနုာ်လီၤဒွဲၣ်အူကွံာ်ၦၤကမျၢၢ် အဟံၣ်အဃီအံၤအိၣ်၀ဲခံဘျီလံဒီးဖဲတနံၤဃီ၀ဲန့ၣ်ပယီၤသုးဟးထီၣ်ကွံာ်လၢသ၀ီအပူၤန့ၣ်လီၤႉ မ့မ့ၢ်လၢလီၢ်က၀ီၤဖိသ့ၣ်တဖၣ်ဃ့ၢ်ထီၣ်လဲၤအိၣ်၀ဲဒၣ်လၢခိခိၣ်ၦၢ်လၢ်ကျါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ်အအိၣ်န့ၣ်လီၤႉ
ဖဲလါယနူၤအါရံၤထီၣ်သီသီအခါန့ၣ်လၢ ပကိကီၢ်ခီဒိၣ် ဃုာ်ဒီး ယ့ၤတၤစှ့ၤကီၢ်ဆၣ် ဒူသ၀ီသ့ၣ်တဖၣ်အပူၤန့ၣ် ပယီၤသုးဟးထၢ၀ဲၦၤသ၀ီဖိသ့ၣ်တဖၣ်လၢကထီၣ်၀ဲဂၢၤကီၢ်သုးတၢ်မၤလိဒီးဖဲန့ၣ်အကျါပၣ်ဃုာ်စ့ၢ်ကီး၀ဲမယိခိၤ သ၀ီအံၤန့ၣ်လီၤႉ ဒ်န့ၣ်အသိးၦၤပိာ်ခွါအိၣ်လၢသ၀ီပူၤတဖၣ်ဘၣ်ယိၣ်၀ဲလၢကပၣ်ဃုာ်အ၀ဲသ့ၣ်အဃိ ဖဲအ၀ဲသ့ၣ်ဟးအိၣ်ခူသူၣ်အဆၢကတီၢ်တၢ််ကဲထီၣ်အသးဒ်အံၤလီၤအဂ့ၢ်န့ၣ်တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ
တီအူကီၢ်ရ့ၣ် တၢ်ဒီသဒၢကမျၢၢ်သုးကရူၢ် သုးရ့ၣ် ၃၅၀၁ တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ် နၣ်မီၣ် စံး၀ဲလၢ “မယိခိၤ သ၀ီန့ၣ်ပယီၤသုးထၢ၀ဲကမျၢၢ်လၢကထီၣ်သုးတၢ်သိၣ်လိလီၤႉ မ့မ့ၢ်လၢဒူသ၀ီပိာ်ခွါသ့ၣ်တဖၣ်န့ၣ်ၦၤဘၣ်တဲလၢလဲၤခူၣ်သယီတံၢ်လၢၦၢ်ပူၤဒီးဘၣ်ဃ့ၢ်အိၣ်ပူၤဖျဲးအသးမီၤနီၤႉ မ့မ့ၢ်လၢသ၀ီအပူၤန့ၣ်အိၣ်တ့ၢ်က့ၤထဲၦၤပိာ်မုၣ်ဒီးၦၤဖိသၣ်သ့ၣ်တဖၣ်အိၣ်ခိးဟံၣ်လီၤႉ မ့ၢ်လၢတၢ်ကဲထီၣ်သးဒ်အံၤအဃိသ၀ီပူၤဖိသၣ်သ့ၣ်တဖၣ်ဘၣ်ဟးစံၣ်အိၣ်ခူသူၣ်မီၤနီၤႉ မ့မ့ၢ်လၢၦၤဘၣ်ဒိဘၣ်ထံးဒုတအိၣ်ဘၣ်” အဂ့ၢ်န့ၣ်စံး၀ဲန့ၣ်လီၤႉ
ပယီၤသုးသ့ၣ်တဖၣ်ခီဖျိအ၀ဲသ့ၣ်ဟးထၢသုးတန့ၢ်ဘၣ်အဃိမ့ၢ်အ၀ဲသ့ၣ်ဒွဲၣ်အူအီၣ်ကွံာ်ၦၤကမျၢၢ်အဟံၣ်အဃီ မ့ၢ်ဧါတမ့ၢ်ဧါန့ၣ်တသ့ၣ်ညါလီၤတံၢ်ဒံးဘၣ်အဂ့ၢ်န့ၣ် နၣ်မီၣ် စံးအါထီၣ်၀ဲန့ၣ်လီၤႉ
ဖဲပူၤကွံာ်လါယနူၤအါရံၤ(၁၄)သီအနံၤန့ၣ်စ့ၢ်ကီးလၢ ပကိကီၢ်ဒိၣ် မုၢ်နုာ် ပီတံၤ၀့ၢ် မအူၤကွ့ တီၤခမီၣ် သ၀ီအပူၤန့ၣ် ပယီၤသုးထၢ၀ဲၦၤစရီလၢၦၤကထီၣ်၀ဲဒၣ်သုးတၢ်သိၣ်လိဒီးခီဖျိၦၤတတီၣ်ထီၣ်ဘၣ်အဃိ ဒွဲၣ်အူအီၣ်ကွံာ်၀ဲသ၀ီ(၂)ဖျၢၣ် ဟံၣ်(၁၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
စးထီၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤတုၤ(၂၀၂၃)နံၣ်လါဒံၣ်စဲဘၢၣ်န့ၣ်ခီဖျိလၢသုးကီၣ်ကးအၦၤဒီး အ၀ဲသ့ၣ်စုတီၤဖီလာ်တဖၣ်အဃိထံကီၢ်ဒီတဘ့ၣ်အပူၤၦၤကမျၢၢ်အဟံၣ်အဃီလၢအဘၣ်တၢ်ဒွဲၣ်အူကွံာ်အီၤအိၣ်၀ဲ ခဲလၢာ် ၇၈ ၇၃၇ ဖျၢၣ်အဂ့ၢ်န့ၣ် သ့ၣ်ညါဘၣ်လၢ Data for Myanmar စရီပူၤအသိးန့ၣ်လီၤႉ