Home တၢ်ကစီၣ် ချၢၣ်လွံၢ်ထူၣ်ကီၢ်ရ့ၣ် မၤ၀ဲ(၂၄)၀ီတ၀ီခီကရဲးတၢ်အိၣ်ဖှိၣ်ဒီးဃုထၢထီၣ်ခိၣ်နၢ်လၢအသီ၀ံၤ၀ဲ

ချၢၣ်လွံၢ်ထူၣ်ကီၢ်ရ့ၣ် မၤ၀ဲ(၂၄)၀ီတ၀ီခီကရဲးတၢ်အိၣ်ဖှိၣ်ဒီးဃုထၢထီၣ်ခိၣ်နၢ်လၢအသီ၀ံၤ၀ဲ

193
0
Photo- KNU

လါဖ့ၤဘြူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃) ၀ဲၤလီၢ်ခိၣ်သ့ၣ်တၢ်လီၢ်န့ၣ် ဖဲအပူၤကွံာ်လါယနူၤအါရံၤအခါ တၢ်မၤ၀ဲ(၂၄)၀ီတ၀ီခီကရဲးတၢ်အိၣ်ဖှိၣ်ဒီးခီကရဲးတၢ်အိၣ်ဖှိၣ်အပူၤ တၢ်ဃုထၢထီၣ်က့ၤ၀ဲခိၣ်နၢ်သီသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ(၁)သီ အနံၤန့ၣ်လီၤႉ

ချၢၣ်လွံၢ်ထူၣ်ကီၢ်ရ့ၣ် (၂၄)၀ီတ၀ီခီကရဲးတၢ်အိၣ်ဘျီ၀ဲအံၤဘၣ်တၢ်စးထီၣ်မၤအီၤဖဲအပူၤကွံာ်(၂၀၂၄)နံၣ်လါယနူၤအါရံၤ ၉ သီ တုၤလၢ ၂၀ သီ လၢတဆံခံသီအတီၢ်ပူၤဒီး ဒ်န့ၣ်အသိးတၢ်အိၣ်ဖှိၣ်ဘျီ၀ဲအံၤအပူၤန့ၣ်တၢ်ဃုထၢထီၣ်၀ဲ ထီဘိကမံးတံာ်(၂၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဃးချၢၣ်လွံၢ်ထူၣ်ကီၢ်ရ့ၣ် မၤ၀ဲခီကရဲးတၢ်အိၣ်ဖှိၣ်ဒီးဃုထၢထီၣ်ခိၣ်နၢ်သီအံၤအဖီခိၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢစ့ စံး၀ဲလၢ“တၢ်ဆီတလဲလၢတၢ်ဃုထၢခီကရဲးဘျီ၀ဲအံၤန့ၣ်မီၤနီၤ လၢကီၢ်ရ့ၣ်ချၢၣ်လွံၢ်ထူၣ်ခိၣ်နၢ်ဒု ဆီတလဲအိၣ်၀ဲႉ ကီၢ်ရ့ၣ်ခိၣ်ဆီတလဲႇ ကီၢ်ရ့ၣ်ခိၣ်န့ၣ်ခဲအံၤတၢ်ဟ့ၣ်အီၤမူဒါလၢသုးခိၣ်ကျၢၢ်ဖိစီၤအဲၣ်ကလုာ်သ့န့ၣ် ကဲထီၣ်က့ၤ၀ဲကီၢ်ရ့ၣ်ခိၣ်အသိးလၢကီၢ်ရ့ၣ်နဲၣ်ရွဲၣ်စ့ၢ်ကီးန့ၣ်အိၣ်ဒီးတၢ်ဆီတလဲသ့ၣ်တဖၣ်လီၤႉ ဒီး၀ဲၤကျိၤ၀ဲၤဒ့သ့ၣ်တဖၣ်န့ၣ်အါတက့ၢ်ဒုအိၣ်၀ဲလီၢ်လီၢ်လီၤႉတၢ်ဆီတလဲဒုအိၣ်၀ဲတဒိၣ်တဆံးဖိမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤကီၢ်ရ့ၣ်ကိးဘ့ၣ်ဒဲးဃၣ်ဃၣ်ဘၣ်ကွၢ်ဆၢၣ်မဲာ်၀ဲတၢ်ဒုးတၢ်ယၤအိၣ်၀ဲဒီးဒ်န့ၣ်အသိး ဖဲတၢ်ဒုးတၢ်ယၤဆူၣ်ထီၣ်အကတီၢ်အံၤလၢ(၂၄)၀ီတ၀ီခီကရဲးဘျီ၀ဲအံၤကကဲထီၣ်လိၣ်ထီၣ်အဂီၢ်န့ၣ် ချၢၣ်လွံၢ်ထူၣ်ကီၢ်ရ့ၣ်ဘၣ်ကွၢ်ဆၢမဲာ်၀ဲဒၣ်တၢ်ကီတၢ်ခဲအါမးအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံးအါထီၣ်၀ဲန့ၣ်လီၤႉ

လၢ(၂၄)၀ီတ၀ီခီကရဲးအပူၤန့ၣ် တၢ်ဃုထၢထီၣ်၀ဲထီဘိကမံးတံာ်(၂၁)ဂၤဒီးဖဲန့ၣ်အကျါ ကီၢ်ရ့ၣ်ခိၣ်န့ၣ်မ့ၢ်၀ဲ (ပဒိၣ်စီၤအဲၣ်ကလုာ်သ့)၊ကီၢ်ရ့ၣ်ခိၣ်ခံန့ၣ်မ့ၢ်၀ဲ(ပဒိၣ်စီၤလ့တယီ)ႇကီၢ်ရ့ၣ်နဲၣ်ရွဲၣ်(ပဒိၣ်စီၤလၢ်ဖိ)ႇ နဲၣ်ရွဲၣ်သဃဲၤ (ပဒိၣ်စီၤကနဲထူပၠဲၣ်)ဒီးကီၢ်ရ့ၣ်စံၣ်ညီၣ်ပီတ့န့ၣ်မ့ၢ်၀ဲ(ပဒိၣ်စီၤခါမဲ)သ့ၣ်တဖၣ်န့ၣ်လီၤႉ

လၢန့ၣ်အမဲာ်ညါတၢ်အိၣ်ဖးဒိၣ်ဘျီ၀ဲအံၤအပူၤန့ၣ်ခိၣ်နၢ်ခၢၣ်စးတဖၣ်က့ၤသမံသမိးကဒါက့ၤ၀ဲပၢပြးဂ့ၢ်၀ီတၢ်ဖံးတၢ်မၤႇ သုးဂ့ၢ်၀ီႇရိၣ်ဖှိၣ်ဂ့ၢ်၀ီႇထံရူၢ်ကီၢ်သဲးဂ့ၢ်၀ီႇ ၦၤဂ့ၢ်၀ီတၢ်ဖံးတၢ်မၤတဖၣ်ဒီးလၢသဲစးတၢ်ဒိၣ်စိအဂီၢ်စံၣ်ညီၣ်ပီတ့တၢ်မၤလၢ တၢ်မၤတ့ၢ်အီၤလၢခီကရဲးလွံၢ်နံၣ်အတီၢ်ပူၤတဖၣ်ဒီးတကးဒံးဘၣ်တၢ်ပာ်လီၤတၢ်မၤခါဆူညါတၢ်ရဲၣ်တၢ်ကျဲၤလၢကပာ်ဖှိၣ်မၤသကိးတၢ်ဒီးထံဖိကီၢ်ဖိကမျၢၢ်ဒ်ခ့ၣ်အဲၣ်ယူၣ်ဂံၢ်ခီၣ်ထံးကျဲသနူအိၣ်၀ဲအသိးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးလၢခီကရဲးတဘျီအံၤအပူၤန့ၣ်ခါဆူညါ(၄)နံၣ်လၢတၢ်ကတီခိၣ်ရိၣ်မဲတၢ်အဂီၢ်တၢ်ဃုထၢထီၣ်ဃုာ်စ့ၢ်ကီး ၀ဲထီဘိကမံးတံာ်ႇ ပၢဆှၢတၢ်ကမံးတံာ်ႇ ၀ဲၤကျိၤ၀ဲၤဒ့ခိၣ်နၢ်ဒီးကမံးတံာ်လၢတၢ်သူၣ်ထီၣ်ဆီလီၤလၢအဖိးသဲစးတဖၣ်အသိးတၢ်ပာ်လီၤတၢ်မၤခါဆူညါတၢ်ရဲၣ်တၢ်ကျဲၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢ(၂၄)၀ီတ၀ီချၢၣ်လွံၢ်ထူၣ်ကီၢ်ရ့ၣ်ခီကရဲးတၢ်အိၣ်ဖှိၣ်ဖးဒိၣ်တဘျီအံၤအပူၤန့ၣ်ခိၣ်နၢ်ခၢၣ်စးဟဲထီၣ်၀ဲ(၈၅)ဂၤႇ လီၢ်ခၢၣ်သးခိၣ်နၢ်၊သုးမုၢ်ဒိၣ်၀ဲၤလီၢ်ခိၣ်သ့ၣ်ခိၣ်နၢ်၊ၦၤမၤစၢၤတၢ်(၈)ဂၤႇကီၢ်ရ့ၣ်ခိၣ်နၢ်ဒ်အမ့ၢ်ဒူသထူၣ်ကီၢ်ရ့ၣ်ႇ တီအူကီၢ်ရ့ၣ်ႇမုၢ်တြီၢ်ကီၢ်ရ့ၣ်ခဲလၢာ်(၉)ဂၤဒီးၦၤမၤနီၣ်မၤဃါတၢ်(၂၆)ဂၤဟဲထီၣ်ပၣ်ဃုာ်ပၣ်ဂီၢ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ