စယၣ်ကၠံတၢ်ဒုးအဃိကမျၢၢ်လၢအလဲၤစံၣ်အိၣ်ပကိတၢ်ဘါယွၤသရိာ်ဘျီၣ်ပူၤတဖၣ်လိၣ်ဘၣ်တၢ်အီၣ်တၢ်အီ

လါဖ့ၤဘြူၤအါရံၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် တီအူကီၢ်ရ့ၣ် ထီတထူၣ်ကီၢ်ဆၣ် (စယၣ်ကၠံ)သ၀ီအပူၤ ဖဲလါဖ့ၤဘြူၤအါရံၤ(၇)သီအနံၤန့ၣ် ခီဖိတျၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒီးသုးကီၣ်ကးအဘၢၣ်စၢၤအဃိကမျၢၢ်လၢအလဲၤစံၣ်အိၣ်လၢပကိတၢ်ဘါယွၤသရိာ်ဘျီၣ်ပူၤတဖၣ်လိၣ်ဘၣ်၀ဲဒၣ်တၢ်အီၣ်တၢ်အီယၣ်လုးႇ တၢ်ကူတၢ်ကၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ခီဖျိတၢ်ဒုးတၢ်ယၤကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢစယၣ်ကၠံ၀့ၢ်ပူၤအဃိလီၢ်က၀ီၤကမျၢၢ်တဖၣ်ဃ့ၢ်ထီၣ်၀ဲခဲလၢာ်ဒီးတနီၤန့ၣ်လဲၤစံၣ်ထီၣ်၀ဲလၢတီအူ၀့ၢ်တကပၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢ(ပကိ)တၢ်ဘါယွၤသရိာ်ဘျီၣ်ပူၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤကမျၢၢ်လၢအလဲၤဃ့ၢ်အိၣ်ကဒုသးလၢ(ပကိ)တၢ်ဘါယွၤသရိာ်ဘျီၣ်ပူၤတဖၣ်အံၤအနီၣ်ဂံၢ်ကအိၣ်ထီၣ်ဘးလၢ(၉၀၀)ဘျဲၣ်လံဒီးတကီၢ်ခါခဲအံၤလၢအ၀ဲသ့ၣ်အဂီၢ်လိၣ်ဘၣ်၀ဲဒၣ်တၢ်အီၣ်တၢ်အီႇ တၢ်ကူတၢ်ကၤႇ ယၣ်လုးသ့ၣ်တဖၣ်အဂ့ၢ်န့ၣ် သရၣ်မၠးထူလၢအကွၢ်ထွဲမၤစၢၤၦၤဃ့ၢ်မှံဟးဖျိးအံၤ စံးဘၣ်ခ့ၣ်အဲးစံၣ်-ကညီိတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ “မ့မ့ၢ်လၢမဟါကၢၤယလဲၤကွၢ်နီၣ်ဂံၢ်(၅)တၢ်ဘါယွၤလၢပကိန့ၣ်အိၣ်၀ဲ(၉၀၀)ဘျဲၣ်လံမီၤနီၤႉ အ၀ဲန့ၣ် မ့ၢ်ထဲပၦၤကညီဖိဒံးလီၤမီၤႇ မ့မ့ၢ်ပယီၤဒီးတီသူန့ၣ်ကအိၣ်လၢကၠိတၢ်လီၢ်အဂၤတနီၤဒီးလၢတၢ်လီၢ်အဂၤစ့ၢ်ကီးလီၤႉ မ့မ့ၢ်လၢပကိခီန့ၣ်ဒုအိၣ်ဘၣ်ယၤလၢ(၉၀၀)ဘျဲၣ်လံမီၤနီၤႉ လၢတၢ်လိၣ်ဘၣ်အဖီခိၣ်န့ၣ်အ၀ဲသ့ၣ်န့ၣ်တနီၤနီၤန့ၣ် ဃ့ၢ်ထီၣ်အနီၢ်ကစၢ်အလိၤဆ့ကၤလီၤႉ အဃိသးန့ၣ်ယၣ်လုၣ်ယၣ်မံႇ ပ့ၢ်ပီၤဖိဒီးတၢ်ကူတၢ်ကၤသ့ၣ်တဖၣ်လိၣ်ဘၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လီၢ်က၀ီၤၦၤကမျၢၢ်လၢအလဲၤဃ့ၢ်အိၣ်ကဒုသးဖဲပကိတၢ်ဘါယွၤသရိာ်ဘျီၣ်ပူၤအဂၤ(၉၀၀)ဘျဲၣ်အံၤန့ၣ် အါဒၣ်တက့ၢ်မ့ၢ်၀ဲဒၣ်(ပၤလၤကိ)(သၤယၤကိ)(အ့ပၠီ)ဒီး(စယၣ်ကၠံ)ၦၤသ၀ီဖိသ့ၣ်တဖၣ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါခီဖျိလၢတၢ်ဒုးကဲထီၣ်တကးဒံးဘၣ်ပယီၤသုးခးလီၤကျိာ်ဖးဒိၣ်ႇ ကဘီယူၤစ့ၢ်ကီးဟဲခးလီၤတၢ် အဃိစယၣ်ကၠံ၀့ၢ်ပူၤကမျၢၢ်ဃုာ်ဒီးဒူသ၀ီလၢအိၣ်ဘူးဖဲန့ၣ်သ၀ီတစှၤန့ၣ်အဖျၢၣ်တဆံဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သရၣ်မၠးထူစံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“လၢတၢ်ခးလိာ်သးအကတီၢ်န့ၣ်ကျိဖးဒိၣ်ဟဲလီၤတဲာ်၀ဲမီၤနီၤႇ ကျိဖးဒိၣ်လီၤတဲာ်၀ံၤမးကဘီယူၤဟဲနုာ်လီၤ၀ဲလၢမုၢ်၀ါဖဲန့ၣ်မီၤနီၤ တၢ်လီၢ်အကပိၤကပၤဖဲန့ၣ်ၦၤဃ့ၢ်ထီၣ်ခဲလၢာ်လံႉ ကအိၣ်၀ဲဒူသ၀ီအဖျၢၣ်တဆံဘျဲၣ်ႉ ခီဖျိလၢတၢ်ဒုးကဲထီၣ်ဒ်အံၤအဖီခိၣ်ထံဖိကီၢ်ဖိတဖၣ်ခဲအံၤန့ၣ်ဘၣ်နးဘၣ်ဖှီၣ်ဒိၣ်မးလီၤႉ လၢတၢ်ဖံးအီၣ်မၤအီၣ်အဖီခိၣ်နါက့န့ၣ် တနီၤန့ၣ်မ့ၣ်အူအီၣ်ကွံာ်အ၀ဲသ့ၣ်တၢ်မုၢ်တၢ်ဘိသ့ၣ်တဖၣ်အိၣ်မီၤနီၤႉ ခီဖျိလၢဘၣ်ဃ့ၢ်ထီၣ်ဃ့ၢ်လီၤတၢ်လီၢ်ႇ တၢ်ကျဲတအိၣ်အဃိသ၀ီဖိတနီန့ၣ်လၢတၢ်မဲာ်ထံမဲာ်နိႇ သူၣ်ဟးဂီၤသးဟးဂီၤအိၣ်၀ဲန့ၣ်လီၤ” အဂ့ၢ်စံး၀ဲဒၣ်န့ၣ်လီၤႉ

တကီၢ်ခါခဲအံၤၦၤကမျၢၢ်လၢအလဲၤစံၣ်အိၣ်ဖဲပကိတၢ်ဘါယွၤသရိာ်ဘျီပူၤသ့ၣ်တဖၣ်အံၤတၢ်ကရၢကရိလဲၤမၤစၢၤ အ၀ဲသ့ၣ်တအိၣ်နီမံၤဒံးဘၣ်ဒီးဘၣ်ဆၣ်တၢ်ဘူၣ်တၢ်ဘါကရူၢ်ကရၢလၢအိၣ်ဖဲန့ၣ်တဖၣ် အသ့ဖဲအသ့အ၀ဲသ့ၣ်ပာ်ဖှိၣ်ထီၣ်သးဆီၣ်ထွဲမၤစၢၤဆိဃာ်၀ဲတၢ်အီၣ်တၢ်အီႇ တၢ်ကူတၢ်ကၤအိၣ်၀ဲအဂ့ၢ်န့ၣ်သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးဖိအအိၣ်န့ၣ်လီၤႉ