ပယီၤသုးကဘီယူၤဟဲတ့ၢ်လီၤကျိဖးဒိၣ်လၢတနီသရံၣ်ကီၢ်ဆၣ် (KNLA) သုးရ့ၣ် ၁၁ တၢ်လီၢ်

လါဖ့ၤဘြူၤအါရံၤ ၆ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)တနီသရံၣ်ဟီၣ်က၀ီၤအပူၤ ဖဲမဟါလါဖ့ၤဘြူၤအါရံၤ ၅ သီ မုၢ်ဃ့ၢ်လီၤ ၁ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးအကဘီယူၤဟဲတ့ၢ်လီၤ ကျိဖးဒိၣ်လၢ(KNLA) သုးရ့ၣ်(၁၁)တၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ဖဲမဟါကဘၣ်ဖဲမုၢ်ဃ့ၢ်လီၤ ၁း၄၀ မံးနံးအဆၢကတီၢ်န့ၣ် ပယီၤသုးအဟဲၣ်လံၣ်ခီးပတၢၣ်တဘ့ၣ်ဟဲတ့ၢ်လီၤ၀ဲဒၣ် ကျိဖးဒိၣ်(၁၁)ဖျၢၣ်လၢ ကီၢ်ကၠီၣ်တဲၣ်ကီၢ်ဆၢ ကီၢ်ဆၢဖိ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၁ ဟီၣ်က၀ီၤပူၤ အဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤႉ

ဘၣ်ဃးဒီးပယီၤသုးကဘီယူၤဟဲတ့ၢ်လီၤမ့ၣ်ပိၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ “ကဘီယူၤ ဟဲတ့ၢ်လီၤမ့ၣ်ပိၢ်န့ၣ်မ့ၢ်၀ဲဒၣ်(သုးက့ ၄) သုးရ့ၣ် ၁၁ ဟီၣ်က၀ီၤမီၤနီၤႉ ဒုၣ်ဒါဟဲတ့ၢ်လီၤကျိဖးဒိၣ်န့ၣ်ကဘၣ်လၢ ၁း၄၀ မုၢ်ဃ့ၢ်လီၤအဆၢကတီၢ်န့ၣ်မီၤနီၤႉ တၢ်လီၢ်လၢပယီၤသုးကဘီယူၤဟဲတ့ၢ်လီၤမ့ၣ်ပိၢ်န့ၣ် မ့ၢ်၀ဲပခ့ၣ်အဲၣ်ယူၣ်အတၢ်လီၢ် ဒီး ဖဲန့ၣ်ပသုးမုၢ်အိၣ်ႇပတြဲၤအိၣ်၀ံၤဒီးထံဆဲးမဲးယွၤသုးကျိၤအိၣ်မီၤဖဲန့ၣ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲတနံၤအံၤန့ၣ်လီၤႉ

ဒ်န့ၣ်အသိးပယီၤသုးကဘီယူၤဟဲတ့ၢ်လီၤကျိဖးဒိၣ်ဘျီ၀ဲအံၤလီၢ်က၀ီၤကမျၢၢ်သံဘၣ်ဒိဘၣ်ထံးတအိၣ်၀ဲဘၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တကပၤစ့ၢ်ကီးတၢ်ဘၣ်ဒိဘၣ်ထံးတအိၣ်၀ဲဒၣ်နီမံၤဘၣ်အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲဒၣ်န့ၣ်လီၤႉ

လၢန့ၣ်အမဲာ်ညါသုးမီၤစိရိၤဟံးန့ၢ်တၢ်စိတၢ်ကမီၤ၀ံၤလီၢ်ခံခ့ၣ်အဲၣ်ယူၣ်ဘိးဘၣ်ရၤလီၤလၢတတူၢ်၀ဲလိာ်သုးမီၤစိရိၤ အံၤဘၣ်အဃိတၢ်ကဘၣ်ထုးကွံာ်၀ဲဒၣ်သုးမီၤစိရိၤတၢ်ပၢတၢ်ပြးအဂ့ၢ်န့ၣ် ပဒိၣ်စီၤအဲၣ်နၤစံးအါထီၣ်၀ဲဒၣ်ဒ်အံၤန့ၣ်လီၤႉ

အ၀ဲစံး၀ဲလၢ“တၢ်လၢပယီၤသုးမီၤစိရိၤဒီး(ခ့ၣ်အဲၣ်ယူၣ်)အဘၢၣ်စၢၤန့ၣ်တၢ်ဖ့ၣ်စၢအိၣ်တကးဘၣ်တၢ်ဖ့ၣ်စၢအါတလၢထီၣ်တဲာ်ဒီးအိၣ်က့ၤလၢစုက၀ဲၤတၢ်ဒုးတၢ်ယၤလံနီၤႉအဃိမ့ၢ်ဒၣ်ပအိၣ်လၢတၢ်ဒုးတၢ်ယၤအပျီပူၤလီၤခဲအံၤန့ၣ်ႉလၢပယီၤသုးမီၤစိရိၤထီၣ်ဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ်(ခ့ၣ်အဲၣ်ယူၣ်)ထုးထီၣ်ဘိးဘၣ်ရၤလီၤ၀ဲလံတူၢ်လိာ်သုးမီၤစိရိၤတသ့ဘၣ်ႉထံရူၢ်ကီၢ်သဲးတၢ်တဲသကိးန့ၣ်တဲသကိးတသ့ဘၣ်ႉအဃိမ့ၢ်ဒၣ်တၢ်လဲၤဒ်ခ့ၣ်အဲၣ်ယူၣ်တၢ်ရဲၣ်တၢ်ကျဲၤလၢတၢ်ကဘၣ်ထုးကွံာ်၀ဲဒၣ်သုးမီၤစိရိၤတၢ်ပၢတၢ်ပြးဒီးသူၣ်ထီၣ်က့ၤဖဲၣ်ဒရၢၣ်ဒံၣ်မိၣ်ခြ့ၣ်စံၣ်ထံကီၢ်န့ၣ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ

တကီၢ်ခါခဲအံၤလၢဟီၣ်က၀ီၤဖဲန့ၣ်အပူၤခံခီခံကပၤအဘၢၣ်စၢၤတၢ်ဖ့ၣ်စၢအိၣ်ဒံး၀ဲအဖၢမုၢ်လီၤဒီး ဒ်န့ၣ်အသိးလီၢ်ခံအံၤ ပယီၤသုးအံၤတဟဲထီၣ်ခးတၢ်လၢအသုးဂံၢ်ဘါလၢၤဘၣ်မ့မ့ၢ်တခီအါဒၣ်တက့ၢ်သူက့ၤ၀ဲလၢကလံၤတၢ်ဒုးဟဲတ့ၢ်လီၤ၀ဲကျိဖးဒိၣ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ