ပယီၤသုးကဘီယူၤဟဲတ့ၢ်လီၤကဒီးတၢ်ဘိၣ်လၢတးပီသုးကလၢၤဒီးခးလီၤတၢ်အဃိကမျၢၢ်ဟံၣ်ဟးဂီၤ ၉ ဖျၢၣ်

လါဖ့ၤဘြူၤအါရံၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ ဖဲလါဖ့ၤဘြူၤအါရံၤ ၁၀ သီ အနံၤန့ၣ် ခီဖျိပယီၤသုးကဘီယူၤဟဲတ့ၢ်လီၤကဒီးတၢ်ဘိၣ်လၢတးပီသုးကလၢၤပူၤဒီးခးလီၤစ့ၢ်ကီးတၢ်အဃိ ၦၤသ၀ီဖိဟံၣ်ဟးဂီၤ၀ဲဒၣ်(၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါလါဖ့ၤဘြူၤအါရံၤ ၁၂ သီ အနံၤန့ၣ်လီၤႉ

ဖဲလါဖ့ၤဘြူၤအါရံၤ ၁၀ သီ မုၢ်ဃ့ၢ်လီၤ ၁း၄၀ မံးနံးဃၣ်ဃၣ်အဆၢကတီၢ်န့ၣ် ပယီၤသုးကဘီယူၤဟဲတ့ၢ်လီၤ၀ဲ တၢ်အီၣ်တၢ်အီအဘိၣ်ဒီးကျိချံၦာ်သၣ်အဘိၣ်သ့ၣ်တဖၣ်လၢတးပီသုးကလၢၤအပူၤဒီးဖဲအတ့ၢ်လီၤတၢ်ဘိၣ်အဆၢ ကတီၢ်ခီဖျိခးလီၤဃုာ်စ့ၢ်ကီး၀ဲစဲးလးအဃိၦၤသ၀ီဖိအဟံၣ်ဘၣ်ဟးဂီၤ၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ် လီၤႉ

တးပီသ၀ီဖိတဂၤစံး၀ဲဒၣ်လၢ“စးထီၣ်ခး၀ဲန့ၣ်ဖဲမုၢ်ဃ့ၢ်လီၤ ၁း၃၀ တုၤလၢ ၂ နၣ်ရံၣ်န့ၣ်ပတုာ်သးလီၤႉ အခးတၢ်အခါန့ၣ် ဟဲကွံာ်လီၤ၀ဲဒီးတၢ်ဘိၣ်ႉလၢၦၤဟံၣ်ၦၤဃီဒုဘၣ်အိၣ်ႉဘၣ်နါက့မ့ၣ်အူအီၣ်ထီၣ်ဒုတအိၣ်ဘၣ်ႉဘၣ်၀ဲဒၣ်ဟံၣ်အကပိၤကပၤ,ဟံၣ်ခိၣ်ဟံၣ်အဒုၣ်အဒါအိၣ်တၢ်တဖၣ်န့ၣ်လီၤႉၦၤဟံၣ်ဟးဂီၤဒုအိၣ်တဘျုးဖျၢၣ်ညါႉတၢ်ဘၣ်ဒိဘၣ်ထံးဒုတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါဖ့ၤဘြူၤအါရံၤ ၁၃ သီ အနံၤ န့ၣ်လီၤႉ

ပယီၤသုးကဘီယူၤဟဲတ့ၢ်လီၤတၢ်အီၣ်တၢ်အီႇကျိချံဘိၣ်ဘျီ၀ဲအံၤန့ၣ်တၢ်ပၢၢ်ဆၢသုးကရူၢ်ထၢန့ၢ်၀ဲဒၣ်ကျိချံဒီး ဟုသးဘိၣ်တဖၣ်အိၣ်၀ဲအဂ့ၢ်န့ၣ် (KNDO)သုးရ့ၣ်–၂ သုးရ့ၣ်ခိၣ်-၂ စီၤခၠံးခၠံး စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ကဘီယူၤန့ၣ်အဟဲခးလီၤတၢ်၀ံၤဘျီကွံာ်လီၤတၢ်ဘိၣ်ႉၦၤမၤန့ၢ်ဟုသးခံထၢၣ်ႇပဲဒီးကျိချံတကထိၣ်ဘျဲၣ်ႉ အကွံာ်လီၤတၢ်ဘိၣ်န့ၣ်ကအိၣ်လၢအဘိၣ်တဆံဃၣ်ဃၣ်ညါႉတၢ်မၢၤပတထံၣ်ခဲလၢာ်ဘၣ်ႉပမၤန့ၢ်အ၀ဲသ့ၣ်တၢ်တနီၤ မီၤနီၤႉအ၀ဲသ့ၣ်ကစၢ်နါက့န့ၢ်၀ဲတၢ်ဘိၣ်တနီၤစ့ၢ်ႉပမၤန့ၢ်ကျိချံတဖၣ်န့ၣ်နသူတသ့လၢၤဘၣ်အလီၤတဲာ်တဘှံး တဘှးလၢာ်လံႉနခးမးတန့ၢ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါပယီၤအံၤခးလီၤ၀ဲကျိးဖဒိၣ်လၢသ၀ီပူၤအိၣ်၀ဲကိးမုၢ်နံၤကိးမုၢ်နၤဒဲးဒီး ဒ်န့ၣ်အသိးပယီၤသုးလၢ အိၣ်တးပီသုးကလၢၤပူၤသ့ၣ်တဖၣ်အံၤဘၣ်ယိၣ်၀ဲလၢတၢ်ကဟဲခးအ၀ဲသ့ၣ်အဃိ ခးပိၢ်ထီၣ်ကျိအိၣ်၀ဲအဂ့ၢ်န့ၣ် တးပီသ၀ီဖိတဂၤဃီ၀ဲန့ၣ်စံးအါထီၣ်၀ဲဒၣ်ဒ်အံၤန့ၣ်လီၤႉ

အ၀ဲစံး၀ဲလၢ“ကျိဖးဒိၣ်ဒုဟဲကိးမုၢ်နၤဒဲးလီၤႉမုၢ်နၤမုၢ်ဆါဟဲမၢ်မၢ်လီၤႉပယီၤသုးခးစိလီၤတၢ်လၢကမၤမိၢ်တကပၤန့ၣ်ႉမ့၀ံၤလၢဘံလ့(အမတ)တကပၤန့ၣ်နါက့ခးစိတၢ်စ့ၢ်ႉခးတဘျီဃီန့ၣ်ခံကပၤႉတးပီသုးကလၢၤဒုခးတၢ်တဘူၣ်လၢၤဘၣ်ႉမုၢ်မ့ဟါန့ၣ်တးပီသုးကလၢၤန့ၣ်ခးပိၢ်ထီၣ်ကျိဖိဒ်န့ၣ်ဒုအိၣ်လီၤႉသးအုး၀ဲလၢၦၤကလဲၤခးအီၤဧါသၢၣ်ႉအ၀ဲသ့ၣ်နါက့ဟးထီၣ်လၢတၢ်ချၢတဘူၣ်စ့ၢ်ဘၣ်ႉခဲအံၤပနၢ်ဟူလၢပယီၤသုး(စစ်ကူ)ဟဲထီၣ်မီၤဟဲထီၣ်တုၤလၢပနွဲၢ်ကျါလံ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်တလါအံၤလါဖ့ၤဘြူၤအါရံၤ ၁ သီအနံၤန့ၣ်စ့ၢ်ကီး ပယီၤသုးကဘီယူၤဟဲတ့ၢ်လီၤဒံး တၢ်အီၣ်တၢ်အီ, ကျိချံဘိၣ်တဖၣ်လၢတးပီသုးကလၢၤပူၤဒီးခီဖျိခးလီၤစ့ၢ်ကီးတၢ်အဃိၦၤကမျၢၢ်အဟံၣ်အဃီဟးဂီၤအိၣ်၀ဲဒီး ဒ်န့ၣ်အသိး ဖဲကဘီယူၤဟဲတ့ၢ်လီၤတၢ်ဘိၣ်ဘျီ၀ဲအံၤအခါန့ၣ် ဟီၣ်က၀ီၤတၢ်ပၢၢ်ဆၢသုးကရူၢ်မၤန့ၢ်၀ဲတၢ်အီၣ်တၢ်အီႇကသံၣ်ကသီဘိၣ် ဃုာ်ဒီးကျိချံဘိၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ