လါဖ့ၤဘြူၤအါရံၤ ၇ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကရံၣ်နံၣ်ကီၢ်စဲၣ် ဒံၣ်မီစိၤကီၢ်ဆၣ် မၠၣ်သလဲသ၀ီကရူၢ် ဒီၣ်အံၣ်စံၣ်သ၀ီအပူၤန့ၣ် ဖဲမဟါလါဖ့ၤဘြူၤအါရံၤ(၅)သီ ဂီၤခီ(၁၀)နၣ်ရံၣ်အဆၢကတီၢ် သုးကီၣ်ကးပညိၣ်ခး၀ဲလီၢ်အိၣ်ကမှံကၠိ(၂)ဖျၢၣ်အဖီခိၣ်အံၤ ထီဒါ၀ဲတဲာ်တဲာ်ဖျုဖျု အဂ့ၢ်န့ၣ် ကရ့ၣ်နံၣ်ၦၤကညီဂ့ၢ်၀ီခွဲးယာ်ကရူၢ် KnHRG ထုးထီၣ်ပာ်ဖျါ၀ဲဖဲမဟါ လါဖ့ၤဘြူၤအါရံၤ ၅ သီအနံၤ န့ၣ်လီၤႉ
ခီဖျိသုးကီၣ်ကးအကဘီယူၤဟဲခးလီၤတၢ်လၢလီၢ်ကအိၣ်ကမှံကၠိသ့ၣ်တဖၣ်အံၤအဃိၦၤကၠိဖိဃုာ်လီၢ်က၀ီၤၦၤကမျၢၢ်သံဘၣ်ဒိဘၣ်ထံးအါမးဒီးတကးဒံးဘၣ်တၢ်သူၣ်ထီၣ်သ့ၣ်တဖၣ်စ့ၢ်ကီးဟးဂီၤ၀ဲဒၣ် အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးကီၣ်ကးပညိၣ်၀ဲကၠိဒ်အံၤအဖီခိၣ်မ့ၢ်တၢ်မၤထီဒါ၀ဲၦၤဖိသၣ်ခွဲးယာ်ဃုာ်ဒီးၦၤဟီၣ်ခိၣ်ဖိခွဲးယာ်အဃိလ့ၤတက့ၤတူၢ်လိာ်တသ့ဘၣ်ထီဒါ၀ဲသုးကီၣ်ကးအတၢ်ဖံးတၢ်မၤအံၤဒီးထံဂုၤကီၢ်ဂၤခိၣ်နၢ်တဖၣ်ကဟံထီၣ်ဖီၣ်ထီၣ်သုးကီၣ်ကးတဖုအံၤအရ့တုၤလီၤတီၤလီၤအဂ့ၢ်န့ၣ် ကရ့ၣ်နံၣ်ကတီၢ်ဘၢၣ်စၢၤပၢပြးကီၣ်ကး နဲၣ်ရွဲၢ်သဃဲၤ(၂)ကိၤဘညါစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ “ ဘၣ်မနုၤအဃိယဘၣ်ထီဒါ၀ဲသုးကီၣ်ကးတၢ်မၤအံၤလဲၣ်န့ၣ်အ၀ဲသ့ၣ်တဖၣ်အတၢ်ထီၣ်ဒုး၀ဲကၠိခံဖျၢၣ်အံၤန့ၣ်အိၣ်၀ဲဒီးအတၢ်ပညိၣ်လီၤတံၢ်လီၤဆဲးလီၤမီၤႉအဃိတၢ်အံၤမ့ၢ်၀ဲတၢ်မၤကမၣ်သုးကွီၣ်မ့ၣ်တၢ်သိၣ်တၢ်သီအသိး မ့ၢ်စ့ၢ်ကီးတၢ်မၤကမၣ်ၦၤကညီတၢ်ဒိသူၣ်ဒိသးတၢ်ဘျၢသ့ၣ်တဖၣ်အမဲာ်ညါန့ၣ်မၤကမၣ်၀ဲဖိဒံဖိသၣ်လၢအတၢ်ကမၣ်တအိၣ်ဘၣ်သ့ၣ်တဖၣ်အံၤအတၢ်ခွဲးတၢ်ယာ်မီၤနီၤအဃိန့ၣ်ပအဲၣ်ဒိးပာ်ဖျါထီၣ်ပသးလၢသုးကီၣ်ကးအတၢ်မၤ၀ဲအံၤန့ၣ်လ့ၤတက့ၤပတူၢ်လိာ်တသ့ဘၣ်ႉပအဲၣ်ဒိးလၢထံဂုၤကီၢ်ဂၤၦၤဘၣ်မူဘၣ်ဒါတဖၣ်ကဟံထီၣ်ဖီၣ်ထီၣ်သုးကီၣ်ကးတဖၣ် အံၤအရ့တဲာ်တဲာ်ဖျုဖျုလၢအဆိအချ့အါန့ၢ်ဒံးအလီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါသုးကီၣ်ကးပညိၣ်ဟဲခးလီၤတၢ်လၢကၠိဒ်အံၤန့ၣ်မ့ၢ်တၢ်မၤပျံၤမၤဖုး၀ဲဖိဒံဖိသၣ်ဒီးမိၢ်ပၢ်သ့ၣ်တဖၣ် လၢတၢ်ကူၣ်ဘၣ်ကူၣ်သ့တကပၤဒီးတၢ်မၤဒ်အံၤအဖီခိၣ်ဘၣ်ဒိဘၣ်ထံးစ့ၢ်ကီး၀ဲဖိဒံဖိသၣ်တၢ်ကူၣ်ဘၣ်ကူၣ်သ့အဃိ မ့ၢ်တၢ်မၤလၢအလီၤရၢၢ်လီၤစၢၢ်တခါအဂ့ၢ်န့ၣ် ကိၤဘညါ စံးအါထီၣ်၀ဲန့ၣ်လီၤႉ
ဖဲသုးကီၣ်ကးကဘီယူၤဟဲခးလီၤတၢ်ဘျီ၀ဲအံၤန့ၣ်ဘၣ်သံ၀ဲကၠိဖိ(၄)ဂၤ˜ သးၦၢ်(၁)ဂၤဒီး ˜ ဘၣ်ဒိဘၣ်ထံး၀ဲဖိသၣ်ဆံး (၁၅)ဂၤ˜ကၠိသရၣ်(၂)ဂၤလီၢ်က၀ီၤဖိ(၅)ဂၤတကးဒံးဘၣ်အမဲာ်ညါဘၣ်ဟးဂီၤ၀ဲကၠိခံဖျၢၣ်၊တၢ်ဘါယွၤသရိာ်(၁)ဖျၢၣ်ဃုာ်ဒီးတၢ်သူၣ်ထီၣ်လၢအဂၤသ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးသုးကီၣ်ကးအတၢ်မၤထီဒါဖိဒံဖိသၣ်ခွဲးယာ်ဒီးၦၤကညီဂ့ၢ်၀ီခွဲးယာ်ဒ်အံၤအဖီခိၣ်လ့ၤတက့ၤတူၢ်လိာ် တသ့ဘၣ်အသိးအဲၣ်ဒိးလၢကရူၢ်ကရၢလၢအဘၣ်ဃးဒီးၦၤကညီဂ့ၢ်၀ီခွဲးယာ်တဖၣ်ဃုာ်ဒီးဘီမုၢ်စၢဖှိၣ်ကရၢတဖၣ် ကဟံထီၣ်ဖီၣ်ထီၣ်ဘၣ်သုးကီၣ်ကးအရ့တုၤလီၤတီၤလီၤအဂ့ၢ်န့ၣ် ကညီကူၣ်သ့ဆဲးလၤ၀ဲၤကျိၤ(KECD) လီၢ်ခၢၣ်သးနဲၣ်ရွဲၣ် သရၣ်စီၤအဲၣ်ကလုာ်ထူ စံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ “ သုးကီၣ်ကးအတၢ်သူမ့ၣ်ပိၢ်ပညိၣ်ထီၣ်ဒုးမၤဟးဂီၤကၠိတၢ်သူၣ်ထီၣ်အံၤန့ၣ်ပတူၢ်လိာ်တသ့ဘၣ်˜ ပတူၢ်လိာ်တသ့ဘၣ်စံးတၢ်န့ၣ်တၢ်လၢၦၤဖိသၣ်န့ၣ်ကဲ၀ဲဒၣ်ၦၤသ့ၣ်တဖၣ်လၢအိၣ်ဒီးတၢ်ခွဲးတၢ်ယာ်လၢကဘၣ်ဟံန့ၢ် တၢ်ကူၣ်ဘၣ်ကူၣ်သ့လၢတၢ်သဘျ့လၢအ၀ဲသ့ၣ်တၢ်ဒိၣ်ထီၣ်ခါဆူညါအဂီၢ်မီၤနီၤႉအဃိန့ၣ်ခီဖျိသုးကီၣ်ကးမၤဒ်အံၤ အဃိမ့ၢ်တၢ်မၤကမၣ်ၦၤဟီၣ်ခိၣ်ဖိခွဲးယာ်ဖးဒိၣ်အဃိန့ၣ်မုၢ်နံၤခံကတၢၢ်န့ၣ်တၢ်ဂ့ၢ်သ့ၣ်တဖၣ်အံၤန့ၣ်အ၀ဲသ့ၣ်ကဘၣ်က့ၤဘှါရှဲ၀ဲတကးဒံးဘၣ်ဒ်အ၀ဲသ့ၣ်မၤကမၣ်တၢ်အသိးန့ၣ်ပအဲၣ်ဒိးဒီးပဆၢမုၢ်လၢ်ပဃ့ကညးထီၣ်လၢဟီၣ်ခိၣ်ဒီဖျၢၣ် ၦၤဘၣ်မူဘၣ်ဒါလၢၦၤဂ့ၢ်၀ီခွဲးယာ်သ့ၣ်တဖၣ်ဃုာ်ဒီးဘီမုၢ်စၢဖှိၣ်ကရၢသ့ၣ်တဖၣ်န့ၣ်ကဟံထီၣ်ဖီၣ်ထီၣ်အရ့တုၤလီၤတီၤလီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ
သုးကီၣ်ကးကဘီယူၤဟဲခးလီၤတၢ်လၢကရ့ၣ်နံၣ်ကီၢ်စဲၣ် ဒံၤမီစိၤကီၢ်ဆၣ်ဘျီ၀ဲအံၤန့ၣ် ˜ ဟဲတ့ၢ်လီၤ၀ဲဒၣ်(၅၀၀)ပီၣ် မ့ၣ်ပိၢ်ဒီးဒ်န့ၣ်အသိးခးလီၤဃုာ်စ့ၢ်ကီး၀ဲကျိဖးဒိၣ်၊ကျိဆဲးတကးဒံးဘၣ်ကဘီယူၤဟဲခးလီၤတၢ်ခဲအံၤအဘျီအါန့ၢ်ဒံး လၢညါအပူၤကွံာ်အဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
